எர்துகானின் வெற்றி சொல்ல வரும் சேதி!

முஹம்மத் பகீஹுத்தீன்
துருக்கி ஜனாதிபதி பதவிக்கான தேர்தலில் போட்டியிட்ட ரஜப் தையிப் எர்துகான் மீண்டும் புதிதாய் 2018 இல் தலைவர் பதவியை கைப்பற்றியுள்ளார். 2003இல் பிரதமராக பதவிக்கு வந்த எர்துகான் 2014இல் ஜனாதிபதியாக பதவியேற்றார். அன்று முதல் இன்றுவரை அவர் துருக்கி மக்கள் மனம் கவர்ந்த தலைவராகவே காணப்படுகிறார்.
மேற்கத்திய ஊடகங்கள் இம்முறை எர்துகான் பெரும் நெருக்கடிக்கு உள்ளாகுவார் என்றும் அவர் கேட்டு வாங்கும் தோல்வி இதுதான் என்றெல்லாம் கொக்கரித்தன. ஆனால் வாக்குப்பதிவு முடிந்த நிலையில், 52 சதவீதத்துக்கும் மேல் வாக்குகள் பெற்று ரஜப் தையிப் அர்துகான் வெற்றி பெற்றுள்ளார்.
இருபது ஆண்டுகளுக்கு முன்னர் இஸ்தான்பூல் நகரத் தலைவராக தேர்வானதிலிருந்து இன்று வரை அர்துகான் தன்னை ஒரு போதும் மக்கள் தலைவனாக கருதியது கிடையாது. மக்கள் சேவகனாகவே தன்னை எண்ணி கடைமையாற்றி வருவதாக அர்துகான் வெற்றிவாகை சூடிய தருணத்தில் கூறியுள்ளார்.
மேலும் எதிர்க் கட்சியினரை விழித்துப் பேசும் போது ‘தேசத்தை கட்டியெழுப்புவதில் பகைமைகளை மறந்து நாட்டின் எழுச்சிக்காக சேவையை தொடர்வதே இனி நமது கடமை’ என வெளிப்படையாக அழைப்பு விடுத்துள்ளார்.

கடந்த ஆண்டு துருக்கியில் சர்ச்சைகளுக்கு இடையில் கருத்து கணிப்பு ஒன்றின் மூலம் நடந்த புதிய அரசியல் சீர்திருத்த நடைமுறையின்படி பிரதமர் அலுவலகம் என ஒன்று இருக்காது. நாட்டை வழிநடத்தும் அதிகாரம் ஜனாதிபதிக்கு மாற்றப்படும். நாட்டின் ஜனாதிபதியே இனி நாட்டின் தலைவராகவும் அரசின் தலைவராகவும் இருப்பார். அவருடைய பதவிக்காலம் 2030 வரை தொடரும்.
ஜனாதிபதியாக இருப்பவரே அமைச்சர்களை, நீதிபதிகளை, அதிகாரிகளை நியமிப்பார். ஒன்று அல்லது அதற்கு மேற்பட்ட துணை தலைவர்களையும் ஜனாதிபதியே நியமிப்பார். அவ்வாறே ராணுவ நீதிமன்றங்கள் ஒழிக்கப்பட்டு அதிகாரங்கள் ஜனாதிபதியடம் வழங்கப்படும். இத்தகைய புதிய அரிசயல் சீர்த்திருத்தங்களை நடைமுறைப்படுத்தி புவியரசியலில் மாற்றங்கள் ஏற்பட வாய்ப்புள்ளது. அதனாலேயே எதிரிகள் மீடியா உலகத்தில் அர்துகானின் தோல்விக்கான பிம்பத்தை வளர்த்தார்கள்.
அரபுலகம் அப்பாவிகளான இஸ்லாமியவாதிகளையும் அழைப்பாளர்களையும், அநீதிக்கு குரல் கொடுக்கும் பெருந்தகைகளையம் சிறையில் தள்ளி வதைத்து வந்த வேளையில், இரண்டு ஆண்டுகளுக்கு முன்பு நல்லிரவில் துருக்கியின் மக்கள் எர்துகானை சதிப் புரட்சியில் கவிழ்த்து விட்டு நினைத்ததை நடத்தி முடிக்கலாம் என இஸ்லாத்தின் எதிரிகள் கனவு கண்டனர்.

மக்களின் பிரார்த்தனை காரணமாக அல்லாஹ்வின் உதவியால் ஒரே இரவில் சதிப்புரட்சி தோல்வி கண்டது. அர்துகான் இறையுதவியால் பெரும் நெருக்கடியிலிருந்து தப்பிப்பிழைத்தார்.