தொடர் கட்டுரைகள்

தொடர் கட்டுரைகள் (55)

சனிக்கிழமை, 19 மே 2018 09:34

சர்வாதிகாரத்தை நோக்கி இந்தியா?

Written by

இந்திய உச்சநீதிமன்றம் மற்றும் உயர்நீதிமன்றங்களில் நீதிபதிகளை நியமனம் செய்ய 30 ஆண்டுகளாக(1986 முதல்) வழக்கத்தில் இருந்து வரும் கொலிஜியம் அமைப்புக்கு மாற்றாக மத்திய அரசு 2014 ஆம் ஆண்டு இயற்றிய நீதிபதிகள் நியமன தேசிய ஆணையத்தை(National Judicial Appointment Commission-NJAC),இந்திய உச்சநீதிமன்றத்தின் 5 நீதிபதிகள் கொண்ட அமர்வு 2015,அக்டோபர் 16 அன்று செல்லாது என ரத்து செய்து உத்தரவு போட்டது.5 நீதிபதிகளில் 4 நீதிபதிகள் மத்திய அரசு ஆணையத்தை எதிர்த்தும் 1 நீதிபதி ஆதரித்தும் தீர்ப்பளித்தனர்.4 நீதிபதிகள் பெரும்பான்மை என்ற எண்ணிக்கையில் மத்திய அரசு கொண்டு வந்த ஆணையம் ரத்து ஆனது.99 வது திருத்தம் மூலம் கொண்டு வரப்பட்ட இந்த அரசியலமைப்பு சட்டத்தை உச்சநீதிமன்றம் தனக்குரிய அதிகாரத்தை பயன்படுத்தி ஒரு தன்னேற்பு வழக்காக எடுத்துக்கொண்டு குப்பை கூடைக்குள் வீசியது.

மத்திய அரசு இதனை வேறு ஒரு சந்தர்ப்பத்தில் வேறு ஒரு வடிவத்தில் கொண்டு வரும்.இந்த ஆணையம் சட்டமானதும் கொலிஜியம் உடனடியாக ரத்தாகி விடும். உச்சநீதிமன்றத்தின் தன்னாட்சி உரிமைகளை இந்த ஆணையம் கைப்பற்றிக் கொள்ளும்.இந்த நீதிபதிகள் நியமன தேசிய ஆணையத்துக்கு சட்ட அமைச்சரே தலைவராக இருப்பார். சட்ட அமைச்சரின் அதிகாரத்தின் கீழ் இந்த ஆணையம் வந்து விடும்.

மத்திய அரசு பல அரசியல் சட்ட வழக்குகளை உச்சநீதிமன்றத்தில் எதிர் கொள்கிறது. அதனல், அரசு உச்சநீதிமன்றத்தில் ஒரு வாதி ஆகிறார். உயர் நீதிமன்றங்கள் மற்றும் உச்சநீதிமன்றத்தின் நீதிபதிகளை தேர்வு செய்வதில் ஒரு வாதி எப்படி தலையிட முடியும்? என்கிறார் உச்சநீதிமன்ற மூத்த வழக்கறிஞர் பிஸ்வஜித் பட்டாச்சார்யா. இவர்,மத்திய அரசின் கூடுதல் தலைமை வழக்கறிஞராகவும் இருந்தவர். இந்த வழக்கில் இவரும் ஒரு மனுதாரர்.2015 கோடை விடுமுறையில் 32 நாட்கள் காலை 10:30 முதல் மாலை 04:00 மணி வரையில் இந்த வழக்கு உச்சநீதிமன்றத்தில் நடைபெற்றது.வழக்கின் முடிவில் நீதிபதிகள் நியமன தேசிய ஆணையத்தை தள்ளுபடி செய்து கொலிஜியத்துக்கான அதிகாரத்தை நீதிமன்ற அமர்வு காப்பாற்றி கொண்டது.அரசு ஆணையத்தை இழந்தது.மத்திய அரசு கொண்டு வந்த ஜனநாயக விரோத சட்டங்கள் பலவற்றை கேள்வி கேட்காத உச்சநீதிமன்றம் தனது உரிமைக்கும் அதிகாரத்துக்கும் ஒரு ஆபத்து வந்துவிட்ட உடன் தானே தலையிட்டு தனது அதிகாரத்தை காப்பாற்றியது.

இந்த தீர்ப்புக்குப் பிறகு அரசுக்கும் நீதித்துறைக்குமான சிக்கல் வரலாற்று முக்கியம் கொண்ட இந்த தீர்ப்புக்கு பிறகு கடுமையானது.இந்த முடிவினை மத்திய அரசால் சகித்துக் கொள்ள முடியவில்லை.இந்த தீர்ப்பு வெளியாகிய பின்னர் 27 மாதங்கள் கழித்தும் நீதிபதிகளை நியமனம் செய்ய தேவையான நடைமுறை குறிப்பாணையை(Memorandum of Procedure) மத்திய அரசு வெளியிடாமல் நிறுத்தி வைத்தது.மத்திய அரசு தலைமை நீதிபதியை ஆலோசித்து நடைமுறை குறிப்பானையை இறுதி செய்யும் படி உச்சநீதிமன்றம் தேசிய ஆணையத்தை ரத்து செய்து இட்ட உத்தரவுடன் சேர்த்து அறிவுறுத்தியது.

இருந்தும்,மத்திய அரசு குறிப்பாணையை வெளியிடாமல் நிறுத்தி வைத்தது. குறிப்பாணை வெளியிடாமல் உச்சநீதிமன்ற தீர்ப்பினை மீறி தனது அதிகாரத்தை பயன்படுத்தி நீதிபதிகளை நியமனம் செய்ய மத்திய அரசு முயல்கிறது.உச்சநீதிமன்றம் தனது பரந்த அதிகாரத்தை பயன்படுத்திக் கொண்டு அரசியலமைப்பு சட்டத்தின் 129, 141 மற்றும் 144 என்ற விதிகளின் கீழ் மத்திய அரசின் மீது நீதிமன்ற அவமதிப்பு வழக்கு போட்டிருக்க முடியும்.இருந்தும்,மத்திய அரசை பகைத்துக் கொள்வது நல்ல விளைவுகளை தராது என்று சகித்துக் கொண்டுள்ளது.

இந்த சூழல் காரணமாக நீதித்துறையின் செயல்பாடுகளில் மந்த நிலை ஏற்பட்டு இருக்கிறது. நீதிபதிகளை நியமிப்பதில் இடையூறு ஏற்பட்டு வழக்குகள் மூச்சு திணறும் அளவுக்கு அதிகரித்து உள்ளது.உயர்நீதிமன்றங்களில் 40 விழுக்காடு பதவிகள் காலியாக இருக்கின்றன.இதில்,வழக்கு போட்டவர்கள் தான் அதிகம் பாதிக்கப்பட்டு பரிதாபமாக நிற்கின்றனர்.இந்த நிலையில் தான் மத்திய அரசு நீதிமன்ற செயல்பாடுகளில் தலையிட்டு வருகிறது என்று நான்கு நீதிபதிகள் ஊடகங்களை சந்தித்து புகார் கூறினார்கள்.

தி வாஷிங்டன் போஸ்ட் என்ற நாளிதழின் இளம் செய்தியாளர் பாப் உட்வர்ட்(Bob Woodward) கார்ல் பெர்ன்ஸ்டீன் (Carl Bernstein) உடன் இணைந்து 1972 ல் அமெரிக்காவில் நடந்த வாட்டர் கேட் ஊழலை வெளிப்படுத்தினார்.இதில்,அமெரிக்க அதிபரான ரிச்சர்டு நிக்சன் பதவி விலக நேர்ந்தது.அதே போல்,அலகாபாத் உயர்நீதிமன்ற முன்னாள் நீதிபதி ஜக்மோகன் லால் சின்கா பிரதமராக இருந்த இந்திரா காந்தி நாடாளுமன்ற தேர்தலில் பெற்ற வெற்றி செல்லாது என்று தீர்ப்பளித்தார். தேர்தலில் மோசடி செய்த குற்றவாளி என்றும் தீர்ப்பளித்தார்.இந்திரா காந்தி 6 ஆண்டுகளுக்கு தேர்தலில் போட்டியிட கூடாது என்றும் தடை விதித்தார்.

இந்திரா காந்தி தனக்கு ஏற்பட்ட நெருக்கடியை சமாளிக்க இந்தியாவே நெருக்கடியில் இருப்பதாக கூறி அவசர நிலையை பிரகடனம் செய்தார்.சுதந்திர இந்தியாவில் அது முதல் முயற்சி. எனினும்,ஆங்கிலேயர் ஆட்சியிலும் அதற்கு முந்திய காலங்களிலும் அப்படி ஒரு நிலையை இந்தியா சந்திக்க வில்லை. அவசர நிலை அமலுக்கு வந்ததால் அரசியலமைப்பு சட்டத்தின் அதிகாரமே ரத்தாகி விட்டது. நீதிமன்றத்துக்கான அதிகாரம் முடக்கப்பட்டது. இந்திய மத்திய அரசுக்கும் இந்திய நீதித்துறைக்கும நடந்த பெரிய அதிகார யுத்தமாக அது இருந்தது. அதன் பிறகு,நீதிமன்ற நியமன ஆணையத்தின் அதிகாரத்தை ரத்து செய்து உச்சநீதிமன்றம் மத்திய அரசின் அதிகாரத்தை முட்டித் தள்ளி இருக்கிறது.பத்திரிகை துறையோடும் நீதித்துறையோடும அரசு மோதும் போது அது ஒரு போராக மாறுகிறது.

1960 களிலும்,1970 களிலும் அரசியல் நீதித்துறை மீது தனது அதிகாரத்தை செலுத்தியது.அரசியல் முற்போக்கு அம்சங்களில் ஆர்வம் காட்டுவதாகவும் நீதித்துறை பிற்போக்காக இருக்கிறது என்றும் பார்க்கப்பட்டது.ஐ.சி.கோலக்நாத் மற்றும் பல நீதிமன்ற தீர்ப்புகள் கடும் சட்டங்கள் இயற்றுவதில் நாடாளுமன்றத்துக்கான அதிகாரத்தை கட்டுப்படுத்தின. இந்திரா காந்தியின் இடதுசாரி தோழர்களான மோகன் குமாரமங்கலம் போன்றவர்கள் நீதித்துறையை கட்டுப்படுத்தும்(committed judiciary) தேவை உள்ளதாக வெளிப்படையாக கூறினார்கள்.

1980 களிலும்,1990 களிலும் மத்திய அரசு தனிப் பெரும் பலம் கொண்டதாக அமையவில்லை. கூட்டணி அரசுகளும் சிறுபான்மை அரசுகளும் ஏற்பட்டன.அரசு பலம் குன்றிப் போனதால் நீதித்துறை அரசு மீது தனது அதிகாரத்தை செலுத்தியது.பொது நல வழக்குகள் மீது தொடர்ச்சியாக தீர்ப்புகள் வழங்கி குடி மக்கள் உரிமைகளை பலப்படுத்தியது.தனது அதிகாரத்தையும் விரிவு படுத்தியது.அரசு அதிகாரத்தை அதிக பொறுப்புடையதாக மாற்றியது.

1973 ல்-நீதிபதிகள் ஜே.எம்.ஷெலத்(J.M.shelat),கே.எஸ்.ஹெக்டே(K.S.Hegde),ஏ.என்.குரோவர்(A.N.Grover) ஆகியோரை மீறி ஏ.என்.ரேயை(A.N.Ray) தலைமை நீதிபதியாக மத்திய அரசு நியமனம் செய்தது.இதனை தொடர்ந்து நீதிபதிகள் ராஜினாமா செய்தார்கள்.

1975 ல் ஏ.டி.எம்.ஜபல்பூர் வழக்கில் இந்திய குடி மகன் ஒருவன் அடிப்படை உரிமைகளை கேட்க நீதிமன்ற தீர்வை நாடுவதற்கு மத்திய அரசு தடை ஏற்படுத்திய போது நீதித்துறை ஒளிந்து கொண்டது.

1977 ல் எச்.ஆர்.ஹன்னா(H.R.Khanna) ஏடிஎம் ஜபல்பூர் தீர்ப்பில் முரண்பட்டார் என்பதற்காக மத்திய அரசு அவரை மீறி எம்.எச்.பேக்கை (M.H.Beg) தலைமை நீதிபதியாக அமர்த்தியது.இதனை எதிர்த்து எச்.ஆர்.கண்ணா பதவி விலகினார்.

1982 ல் நீதிபதிகள் சம்பந்தப்பட்ட முதல் வழக்கான எஸ்.பி.குப்தா வழக்கு.இந்த வழக்கில் நீதிபதிகளை நியமனம் செய்வதில் தலைமை நீதிபதியின் பரிந்துரையின் முக்கியத்துவத்தை மத்திய அரசு நிராகரிக்க முடியும் என்பதை நீதிபதி பகவதி அமர்வு ஒப்பு கொண்டது.இது, நீதிபதிகளை நியமிப்பதில் அரசு அதிகாரத்தின் ஏதேச்சதிகாரத்தை உருவாக்கியது.

1993 ல் மத்திய அரசு, உச்சநீதிமன்ற நீதிபதி வி.ராமஸ்வாமிக்கு எதிராக நம்பிக்கையில்லா தீர்மானத்தை கொண்டு வந்தது.நீதிபதி ஒருவருக்கு எதிராக நம்பிக்கையில்லா தீர்மானம் கொண்டு வந்த முதல் நிகழ்வும் அது தான்.ஆனால்,ஆட்சியில் இருந்த காங்கிரஸ் இதில் இருந்து விலகியதால் நம்பிக்கையில்லா தீர்மானம் தோல்வி கண்டது.

1993 ல் Supreme Court Advocates -on-Record Association என்பது பிரபலமான வழக்கு.நீதிபதிகள் தொடர்பான இரண்டாவது வழக்கு இது.இந்த வழக்கில் தான் நீதிபதி ஜே.எஸ்.வெர்மா அமர்வு நீதிபதிகளை நியமிக்கும் உரிமையை உச்சநீதிமன்றத்துக்கு வழங்கியது.கொலிஜியம் அமைப்பை உருவாக்கவும் வழி காட்டியது.

1998 ல் உச்சநீதிமன்ற நீதிபதி எஸ்.பி.பரூச்சா அமர்வு ஜனாதிபதியின் கேள்வி ஒன்றுக்கு பதிலளித்த வழக்கில் கொலிஜியம் முறையை புதுப்பித்தது.அதே நேரம்,நீதிபதிகளை நியமனம் செய்யும் விவகாரம் கொலிஜியத்துக்கு தான் உண்டு என்று பரூச்சா அமர்வு உறுதிபட கூறியது.

2009 ல் மத்திய அரசு உச்சநீதிமன்ற நீதிபதி சௌமித்ரா சென்னை பதவி நீக்கம் செய்ய மேலவையில் நம்பிக்கையில்லா தீர்மானம் கொண்டு வந்தது.கீழவையில் நம்பிக்கையில்லா தீர்மானம் வரும் முன்னரே சௌமித்ரா சென் பதவி விலகினார்.

2014 ல் நாடாளுமன்றம் நீதிபதிகள் நியமன தேசிய ஆணைய சட்டத்தை நிறைவேற்றியது.இந்த ஆணையத்தின் படி நீதிபதிகளை தேர்ந்தெடுக்க ஒரு குழு உருவாக்கப்படும்.இந்த குழுவில் நீதித்துறை,சட்டத்துறை மற்றும் அரசு துறை சேர்ந்தவர்கள் இடம் பெறுவார்கள்.

2015 ல் உச்சநீதிமன்றம், நீதிபதிகள் நியமன தேசிய ஆணையம் அரசியல் சட்டத்துக்கு விரோதமானது என்று கூறி தள்ளுபடி செய்தது. கொலிஜியம் முறையை மீண்டும் உறுதி செய்து, நீதிபதிகளை நியமனம் செய்ய ஒரு புதிய நடைமுறையையும் சுட்டிக் காட்டியது.இப்போது இது தான் நடைமுறையில் இருக்கிறது.

2018 ல் 4 மூத்த நீதிபதிகள் ஊடகங்கள் முன்பு தலைமை நீதிபதி தீபக் மிஸ்ரா மீது ஊழல் புகார்களை வைத்து உச்சநீதிமன்றத்துக்குள் நடக்கும் தில்லுமுல்லுகளை போட்டுடைத்தனர்.

1960 கள் மற்றும் 1970 களில் நீதித்துறை மீது அரசியல் அழுத்தம் இருந்தது.அரசு மற்றும் நீதித்துறைக்கு இடையான கொள்கை முரண்கள் துருத்தி நின்றன.நீதித்துறை பழமைவாத போக்குள்ளதாகவும் அரசியல்துறை முற்போக்கு நோக்கம் கொண்டதாகவும் கூறப்பட்டது. ஐ.சி.கோலக்நாத் மற்றும் இதர தீர்ப்புகள், கடுமையான சட்டங்களை இயற்றவிடாமல் நாடாளுமன்றத்தின் அதிகாரத்தை முடக்கின. இந்திரா காந்தி காலத்தில் இடதுசாரி கொள்கையுடைய மோகன் குமார மங்கலம் போன்றவர்கள் நிதித்துறையை அரசின் கட்டுக்குள் வைக்க வேண்டும் என்று வெளிப்படையாக பேசினார்கள்.

1980 களுக்கும் 1990 களுக்கும் மத்தியில் இந்தியாவில் கூட்டணி அரசுகளும் சிறுபான்மை அரசுகளும் அமைந்து மத்திய அரசு நெகிழ்வாக இருந்து.இந்த சந்தர்ப்பத்தில் இந்திய நீதித்துறை தன்னை வலிமை படுத்திக் கொண்டது. தொடர்ச்சியான பொது நல வழக்குகள் மூலம் நீதித்துறை குடி மக்கள் உரிமைகளை விரிவு படுத்தியது.தனது அதிகாரத்தையும் ஆழப்படுத்திக் கொண்டது. அரசின் மீது அதிக சுமைகளை ஏற்றியது.

1990 களின் பிற்பகுதியிலும் 2000 ஆம் ஆண்டுகளின் முற்பகுதியிலும் நீதிமன்ற கடுமையை நெகிழச் செய்ய வேண்டும் என்ற பேச்சு கனமாக எழுந்தது. அரசின் சமூக நலத் திட்டங்கள்(உ.ம்: இட ஒதுக்கீடு,கல்லூரி மாணவர் சேர்க்கை வழக்குகள்); சுற்று சூழல்( உ.ம்: கடற்புற மேலாண்மை, டீசல் வாகனங்களுக்கு கட்டுப்பாடு) சட்ட அவையில் மூக்கை நுழைப்பது( நம்பிக்கை தீர்மானம் கோருவதில் நாடாளுமன்றம் மற்றும் சட்ட மன்றங்களுக்கு உத்தரவு போடுவது) ஆகியவற்றில் நீதிமன்றம் தனது கொள்கையை திணிக்கிறது என்று நீதிமன்றத்தின் மீது குற்றம் சாட்டப்பட்டது.

ஓரினச்சேர்க்கைக்கு தண்டனை அளிக்கும் சட்டப் பிரிவு 377 ஐ நீக்கம் செய்ய அரசு மறுத்த போது, முற்போக்குவாதிகள் கேட்டுக் கொண்ட போதிலும் நீதிமன்றம் தலையிட மறுத்தது. (இப்போது மாற்றிக் கொண்டது தனிக் கதை). பல்வேறு மாநிலங்களின் உயர்நீதிமன்றங்கள் மற்றும் உச்சநீதிமன்றம் நீதிபதிகள் மீது தொடர்ந்து கூறப்படும் ஊழல் குற்றச்சாட்டுகள் நீதித்துறையை கட்டுப்படுத்தும் பலத்தை நாடாளுமன்றத்துக்கு கொடுத்திருக்கிறது.

சனிக்கிழமை, 19 மே 2018 08:46

மனதைக் கவரும் மதரஸாபட்டினம்

Written by

ஆங்கிலேயர் ஆண்டபோது மதரஸா ராஜதானியில் ஒரிஸா முதல் கேரளா வரை இருந்தது. மதராஸ்தான் தலைமையகம். மொழி, இன, பிரதேச வெறி இல்லாத கால கட்டம். மதராஸ் ராஜதானியின் ஆட்சித் தலைவர் பிரதமர் என அழைக்கப்பட்டார். நம் ராஜதானியின் முதல் பிரதமர் கடலூரைச் சேர்ந்த மேதகு சுப்ராய ரெட்டியார். அவர் நீதிக் கட்சிக்காரர். காங்கிரஸ் கூட ஒருமுறை பதவியை பிடித்தது. அப்போதைய பிரதமர் மேதகு ராஜகோபாலாச்சாரியார்.
மதராஸ் இன்று சென்னையெனப் பெயர் மாற்றம் பெற்றாலும் உயர்நீதிமன்றத்தின் பெயர் மதராஸ் ஹை கோர்ட்டே.
மதராஸ் எனப் பெயர் பெறும் முன் இந்நகரம் வடக்கில் மண்ணடி எனப் பெயர் பெற்றிருந்தது. தெற்குப் பகுதி சென்னக்குப்பம் எனப் பெயர் பெற்றிருந்தது. இரண்டும் சிறிய கடலோரக் கிராமங்களாகவே இருந்தன. இவை கூவத்துக்கு வடக்கில் இருந்தன தெற்கில் திருவல்லிக்கேணியும் மயிலாப்பூரும் பழமையான ஊர்களாய் இருந்தன.
மண்ணடி மேட்டுப் பகுதியாகவும் அதன் கடலோரம் தாழ்ந்தும் இருந்ததால் அது தோணித்துறையாக தானாகவே அமைந்தது. தோணித்துறைக்கு மேற்கில் இன்று ‘றேவு’ என அழைக்கப்படும் இடத்தில் தோணிகள் கட்டப்பட்டு கடலில் விடப்பட்டுள்ளன.
‘றேவு’ என்றால் பொருள் என்னவென ஆய்வு செய்யும் வாய்ப்பு எனக்குக் கிடைத்தது. அண்மையில் நான் பழவேற்காட்டுக்குப் பயணம் செய்தபோது ‘தோணிறேவு’ எனும் கடலூரைப் பற்றிக் கேள்விப்பட்டேன். அன்றிலிருந்து ‘றேவு’ என் மனதுக்குள் அலையடித்துக் கொண்டே இருந்தது.
அதன் பின் ‘பழவேற்காட்டிலிருந்து நீரோடி வரை’ எனும் நூலைப் படித்தேன். அதன் ஆசிரியர் வறீதையா ‘தோணிறேவை’ தோணி இறவு எனக் குறிப்பிட்டு அது அண்மைக் காலம் வரை தோணிகள் கட்டப்பட்ட ஊர் என்றும் தோணிகளை கட்டிய முஸ்லிம்கள் ஓடாவிகள் என்றும் அந்நூலில் குறிப்பிட்டிருந்தார்.
நான் இறவுக்கான பொருளை அகராதிகளில் தேடினேன். கிடைக்கவில்லை. கணினி ‘எல்லை’ என்றது. தோணி இறவு என்றால் தோணி எல்லை. ஒரு வகையில் சரி என்றாலும் முழுப் பொருளை அடையமுடியவில்லை.
முகநூலில் அறிவித்த போது மூத்த எழுத்தாளர் இலங்கையைச் சேர்ந்த சகோதரர் மானா மக்கீன் யாழ்பாணத்துக்கு தெற்கேயுள்ள யானை இறவைப் பற்றி பதிந்து அதன் ஆங்கில வாசகமான ‘ELEPHANT PASS’ என்பதையும் ஞாபக மூட்டினார். அப்படியென்றால் இறவின் பொருள் PASS - கடப்பது. தோணிகள் கடக்கும் இடம் தோணியிறவு என பொருளாகிறது.
மண்ணடி எனப் பெயர் இருக்கும் போதே நம்பட்டினம் மதரஸாபட்டினம் எனப் பெயர் பெற்றுள்ளது. சோனகர்களின் சேரி - மூர்தெரு. சில பள்ளிவாசல்களின் - அவற்றைச் சேர்ந்த மதரஸாக்களின் உருவாக்கத்தால் மதரஸா எனப் பெயர் பெற்றிருக்கிறது.
மதரஸாபட்டினத்துக்குள்ளேயே முத்தியால் பேட்டை, கொத்தவால் சாவடி, பெத்து நாயக்கன் பேட்டை என சில பகுதிகள். இவை மூன்றும் அதிகாரம் வகித்தோரின் பெயரை குறிப்பிடும் பெயர்கள்.
ஆங்கிலேயர் சென்னைக் குப்பத்தை விலைக்கு வாங்கி செயிண்ட் ஜார்ஜ் கோட்டையைக் கட்டி அதற்கு ‘ஒயிட் டவுன்’ எனப் பெயரிட்டனர். கோட்டைக்கு வடக்கேயிருந்த மண்ணடியையும் மேற்கிலிருந்த பேட்டைகளையும் சுவர் எழுப்பி செயிண்ட் ஜார்ஜ் டவுன் என அழைத்ததோடு ‘பிளாக்டவுன்’ எனவும் குறிபிட்டனர். நான்கு புறச் சுவர்களின் நான்கு மூலைகளில் கொத்தளங்கள் அமைத்து பாதுகாவலர்களை நியமித்தனர். அதன் எச்சமாகவே இன்றும் மூலக் கொத்தளம் எனும் பெயர் விளங்குகிறது.
மேற்கு புறச் சுவரை வரி வசூல் செய்து கட்டினர். அதனாலேயே இன்றும் மேற்குப் பகுதி சாலை ‘வால்டாக்ஸ் ரோடு’ என அழைக்கப்படுகிறது.
நான்கு பக்க சுவர்களும் பிரெஞ்சுக் காரர்களின் ஒரு படையெடுப்பின் போது உடைக்கப்பட்டு விட்டன. இன்றும் பெயர் சொல்லும் தெருக்களில் ஆங்கிலேயர் பெயர்கள் உள்ளன. இந்துக்களின் பெயர் சொல்லும் தெருக்கள் பலவும் ஆங்கிலேயரிடம் துபாஷாக - தரகராக - மொழி பெயர்ப்பாளர்களாக செயல்பட்டவர்களின் பெயர்கள்.
இவற்றில் காசிச் செட்டி தெரு என்பது சாந்தோமில் மிகப் பெரும் வணிகராக விளங்கிய காசி வீரண்ணா பெயரை நினைவு கூரும் தெரு, கோல்கொண்டா முஸ்லிம் ஆட்சியாளரிடம் நட்புறவு கொண்டு வாழ்ந்த காசி வீரண்ணா இஸ்லாத்தைத் தழுவியதோடு மயிலாப்பூர் மசூதி தெருவில் ஒரு பளிவாசலையும் கட்டியுள்ளார்.
மண்ணடியின் கிழக்கில் ஜஹாங்கீர் தெரு, மரைக்கா லப்பைத் தெரு, வட மரைக்கார் தெரு, இபுறாஹீம் ஜி தெரு என முஸ்லிம்களின் பெயர்களில் தெருக்கள் உள்ளன. மேற்கில் முல்லா சாகிபு தெரு, இபுறாஹீம் தெருவோடு கொண்டித் தோப்பு பகுதியிலும் முஸ்லிம்களின் பெயர்களில் தெருக்கள் உள்ளன.
பெரிய மேட்டில் படா மஸ்ஜிதோடு அதைச் சூழ்ந்துள்ள தெருக்களில் முஸ்லிம்களின் பெயர்களில் பல தெருக்கள் உள்ளன. பல முஸ்லிம்களின் தோல்மண்டிகளும் உள்ளன.
பெரிய மேட்டுக்கு வட மேற்கே சூளை, பட்டாளம் பகுதிகள் உள்ளன. முதன் முதலில் செங்கல் சூளை உருவான பகுதியே சூளை என அழைக்கப்படுகிறது. இதையடுத்து பட்டாளம் உள்ளது. மிலிட்டரி-பட்டாளம் குவிக்கப்பட்டிருந்த பகுதியே பட்டாளம் என அழைக்கப்படுகிறது. இவ்விரு பகுதிகளிலும் பரவலாக முஸ்லிம்கள் வாழ்கின்றனர்.
பட்டாளத்துக்கு மேற்கே தாதாஷா மகான் பகுதி உள்ளது. இங்கு தாதா ஷா எனும் சூஃபி ஞானி அடங்கியுள்ளார். அவர் பெயராலேயே இப்பகுதி அழைக்கப்படுகிறது. இப்பகுதியில் கணிசமான அளவில் முஸ்லிம்கள் வாழ்கின்றனர். இவர்களின் தாய்மொழி உருது. இங்கு இரு மசூதிகள் உள்ளன.
தாதாஷா மகானுக்கு வட மேற்கில் ஜமாலியா நகர் உள்ளது. இங்கு மூன்று மசூதிகள் உள்ளன. இவற்றில் ஒன்றான ஜமாலியா மசூதியில் தான் ஜமாலியா அரபிக் கல்லூரி இயங்குகிறது. இதன் எதிரில் தான் ‘சமரசம்’ தமிழிதழ் அலுவலகமும் இஸ்லாமிய நிறுவனம் அறக்கட்டளையும் (IFT) பதிப்பகமும் உள்ளன. இவற்றுக்கு வடக்கே ஜமாலியா மேல்நிலைப் பள்ளி உள்ளது.
ஜமாலியா நகருக்கு வட மேற்கே பெரம்பூர் உள்ளது. இங்கு சில மசூதிகளும் உள்ளன. கணிசமான முஸ்லிம் குடும்பங்கள் உள்ளன.
புரசைவாக்கத்தில் சில பள்ளிகளும் கணிசமான முஸ்லிம் குடும்பங்களும் உள்ளன. வணிகப்பகுதியான புரசையில் பல முஸ்லிம்களின் கடைகள் உள்ளன. மதார் ஷா துணிக்கடல் 1938 - இல் தொட்ங்கபட்டதாகும். சங்கிலித் தொடராக ஆயிஷாவின் துணிக்கடைகள் உள்ளன.
எழும்பூரில் புதுப்பேட்டையிலும் பல பள்ளிவாசல்கள் உள்ளன. எழும்பூர் பல திருமண மண்டபங்களைக் கொண்ட ஊர். புதுப்பேட்டை பழைய மோட்டார் சாமான்கள் விற்கும் கடைகளைக் கொண்ட பேட்டை. இங்கும் கணிசமாக முஸ்லிம்கள் வாழ்கின்றனர். கடைகளில் பெரும்பாலானவை முஸ்லிம்களுக்கு சொந்தமானவை.
புதுப்பேட்டைக்கு தென் கிழக்கில் மவுண்ட் ரோடு மூஸா காதிர் தர்காவும் அதையடுத்த மக்கா மஸ்ஜிதும் உள்ளன. இவற்றுக்கு தென்கிழக்கில் தான் திருவல்லிக்கேணியும் சேப்பாக்கமும் உள்ளன.
திருவல்லிக்கேணி பெரிய மசூதி ஆற்காடு நவாபுகள் கட்டியது. இதைச் சுற்றிலும் கணிசமாக முஸ்லிம்களின் பெயர்களைத் தாங்கிய தெருக்கள் உள்ளன. கணிசமான முஸ்லிம்களும் காலாதிகாலமாக வாழ்கின்றனர்.
பெரிய மசூதி வளாகத்தின் முன்புறம் நவாப்களின் குடும்பத்தினரும் சில மேதைகளும் அடக்கம் செய்யப்பட்டிருக்கின்றனர். இவர்களுடன் ‘காயிதே மில்லத்’ இஸ்மாயில் சாகிப் சமாதியும் உண்டு.
ஜாம்பஜாரில் பாரதி சாலையில்தான் ‘அமீர் மஹால்’ எனும் ஆற்காட்டு நவாப்களின் அரண்மனை உள்ளது. சேப்பாக்கத்தில் உள்ள ‘எழிலகம்’ கூட ஆற்காட்டு நவாப்களின் இல்லமாக இருந்துதான்.
ஐஸ் ஹவுஸ், மீர் சாகிப் பேட்டை, கிருஷ்ணாம் பேட்டை, ராயப்பேட்டை ஆகிய இடங்களிலும் பல மசூதிகள் உள்ளன. இங்கெல்லாம் முஸ்லிம்களும் கணிசமாக வாழ்கின்றனர்.
மயிலாப்பூரில் மட்டும் நான்கைந்து மசூதிகள் உள்ளன. இப்பகுதியில் முஸ்லிம்கள் திட்டுத் திட்டாக வாழ்கின்றனர்.
ஆயிரம் கதைகளைச் சொல்லக் கூடியது ஆயிரம் விளக்கு. இங்குள்ள ஷியா முஸ்லிம்களின் மசூதி அண்ணா சாலையையும் பீட்டர்ஸ் சாலையையும் இணைக்கிறது.
தக்காணத்தில் நடந்த தலைக்கோட்டைப் போருக்குப் பின் கி.பி.1565-இல் விஜயநகர சாம்ராஜ்ஜியம் வீழ்ந்தது. பாமினி அரசுகள் கர்நாடகத்தையும் தம் கைக்குள் போட்டன. பாமினி அரசுகளில் ஒன்றான பீஜப்பூர் செஞ்சியைப் பிடித்தது. கோல்கொண்டா மதரஸா பட்டினம் வரை வந்தது. (1647 - 1687)
கோல்கொண்டா அரசின் பழைய பெயர் வாரங்கல். புதிய பெயர் நிஜாமிய அரசு. நிஜாமிய அரசுக்கு முந்தைய கோல்கொண்டா அரசு மதரஸா பட்டினத்திற்கு வந்தபோது விஜயநகர அரசின் உதிரி ஆட்சி பூந்தமல்லியிலும் கிளை பரப்பி சந்திரகிரியில் இருந்தது.
பூந்தமல்லி நிர்வாகியாக தாமரல குடும்பத்து வெங்கடாத்ரி இருந்தார். அவரிடமிருந்தே ஆங்கிலேய தலைமை அதிகாரி ஃப்ரான்சிஸ் டே. 1639 - இல் சென்னைக்குப்பப் பகுதியை வணிகம் செய்யவும் பண்டக சாலை அமைக்கவும் உரிமை பெற்றார்.
கி.பி.1647 - இல் கோல்கொண்டா பிரதிநிதி மதரஸாபட்டினம் வர ஆட்சி மாற்றம். நிர்வாகம் செய்யவும் அரசுப் பணியாற்றவும் ஆயிரக் கணக்கானவர்கள் கோல்கொண்டாவிலிருந்து மதரஸா பட்டினத்திற்கு வந்தார்கள்.
கச்சேரி தெருவில் அரசு அலுவலகங்கள் ஆயிரம்விளக்கில் குடியிருப்புகள் என மதரஸாபட்டினம் விரிவடைந்த நிலையில் கட்டப்பட்டதுதான் ஆயிரம் விளக்கு அப்பாஸி ஆஸர் கானா பள்ளிவாசல். இது ஷியா முஸ்லிம்களின் மசூதி என்பதால் முஹர்ரம் பண்டிகை இங்கு மிக விமர்சையாகக் கொண்டாடப்பட்டது. ஆயிரம் அகல் விளக்குகள் ஏற்றி முஸ்லிம்களோடு மாற்று மதத்தினரும் பண்டிகையை இங்கு கொண்டாடியதால் இப்பகுதி ஆயிரம் விளக்கு எனப் பெயர் பெற்றது.
ஆயிரம்விளக்கில் உருதும் தமிழும் பேசும் முஸ்லிம்களும் கணிசமாக உள்ளனர். கிரீம்ஸ் சாலை முனையில் ஒரு மசூதியும் ஜெமினி அண்ணா பாலம் தாண்டி ஒரு மசூதியும் உள்ளன.
அண்ணா பாலத்தின் கீழுள்ள மசூதியின் பெயர் சர்பு நிஷா பேகம் சாகிபா பள்ளிவாசல். இது நவாப் குடும்ப மகளிர் கட்டிய மசூதி, மேலும் மூன்று மசூதிகள் நவாப் குடும்பப் பெண்களால் கட்டப்பட்டுள்ளன. அவை : நந்தனத்திலுள்ள நவாப் பஜீலத்துல் நிஷா பேகம் சாகிபா மசூதி, ராயப்பேட்டை கபர்ஸ்தானிலுள்ள அமீரு நிஷா பேகம் சாகிபா மசூதி, கிருஷ்ணாம் பேட்டையிலுள்ள ஹைருன்னிசா பேகம் சாகிபா மசூதி.
இன்றைய சைதாப்பேட்டையின் அசல் பெயர் செய்யத் கான் பேட்டை. ஆற்காடு நவாப் அன்று செய்யத்கான் எனும் நிர்வாகிக்கு அளித்த பகுதி செய்யத் கான் பேட்டையானது. செய்யது கான் தமக்களித்த நிலப்பரப்பை நெசவாளிகளுக்கும் பாட்டாளிகளுக்கும் பகிர்ந்தளித்தார். அதில் ஒரு பகுதியை தமக்காக வைத்துக் கொண்டு மசூதி ஒன்றையும் கட்டுவித்தார். அம்மசூதியே நவாப் சாதத்துல்லா கான் மசூதி.
சைதாப்பேட்டைக்கு மேற்கில் உள்ளது ஜாபர்கான் பேட்டை. வடக்கில் உள்ளது மாம்பலம். மாம்பலத்தின் விழியே அதன் கிழக்கேயுள்ள தியாகராய நகர். இந்நகர் நீதிக் கட்சிக் காலத்தில் அமைக்கப்பட்டதால் அவர்களின் கட்சிப் பிரமுகர்களான உஸ்மான், ஹபீபுல்லாஹ், மூசா, பசுலுல்லாஹ் போன்றவர்களின் பெயர்களால் தெருக்கள் அமைக்கப்பட்டுள்ளன.

மாம்பலத்திற்கு வடக்கே கோடம்பாக்கம் அமைந்துள்ளது. ஆற்காடு நவாபுகளின் குதிரை லாயங்கள் இங்கு அமைந்திருந்ததால் குதிரையைக் குறிக்கும் ‘கோடக்’ எனும் உருதுச் சொல்லால் அமைந்தது இப்பகுதி. இப்பகுதியின் தொடக்க ஊராக இருப்பது புலியூர். புலியூர் அக்காலத்தில் மதரஸா பட்டினத்துப் புறநகர்ப் பகுதி. இங்கு மசூதியோடு கபர்ஸ்தானும் இருக்கிறது.
கோடம்பாக்கம் பாலத்தின் மேற்குப் பகுதியின் கீழ் மசூதி உள்ளது. இதனருகில்தான் ‘ஜக்கரியா காலனி’ உள்ளது. ஜகரியா எனும் பெரும் தோல் வணிகரின் நிறுவனம் இருந்த பகுதி இது. இதன் வடக்கில் சூளைமேடு உள்ளது.
தொடக்கத்தில் சுபேதார் தோட்டம் உள்ளது. வடக்கில் வகாப் தெரு அப்துல்லாஹ் தெரு என முஸ்லிம்களின் பெயர்களைக் கொண்டது சூளைமேடு.
குதிரைகளுக்கான லாயங்கள் கோடம்பாக்கத்தில் இருந்தது போல் ஒட்டகங்களுக்கான தரிப்பிடமும் இருந்தது. அந்த தரிப்பிடம் இருந்த இடம் இன்று ஒட்டக பாளையம் என அழைக்கப்படுகிறது. வடபழநி நாற்சந்திக்கு தெற்கே நூறடி சாலையில் அசோக்நகரின் தொடக்கத்தில் அப்பகுதி உள்ளது.
கோல்கொண்டா சுல்தான்களுக்குப் பின் 1687 - இல் மதரஸாபட்டினம் மொகலாயர்களின் ஆட்சியின் கீழ் வந்தது. செஞ்சிக் கோட்டையைப் பிடித்த ஆலம்கீர் அவுரங்கசீபின் தளபதி ஜுல்பிகார் அலிகான் கர்நாடக நவாப் ஆனார்.
அதன்பின் தாவூது கான் சாதத்துல்லா கானின் ஆட்சிக் காலத்திலேயே ஆஸிப்ஜா எனும் நிஜாமுல் முல்க் ஹைதராபாத்தின் நிஜமாகி தனியரசு கண்டார்.
பின்னர் நிஜாம்கள் மாற ஆர்காட்டு நவாப்களும் மாற வாலாஜா முகம்மது அலி ஆற்காட்டு நவாப் ஆனார். இவர் ஆங்கிலேயரைக் கொண்டாடியதால் தம் இருப்பிடத்தை மதரஸாபட்டினத்திற்கே மாற்றிக் கொண்டார்.
செயிண்ட் ஜார்ஜ் கோட்டைக்குள் அரண்மனையை அமைத்துக் கொண்டவர் பின் அங்கிருந்து வெளியேறி அமீர்மகாலில் குடிபுகுந்தார்.
பின்னர் 1647 - இல் கர்நாடகத்தில் காலடி எடுத்துவைத்த கோல்கொண்டா, 1687 - இல் தடம்பதித்த டெல்லி, 1724 - இல் வந்த ஹைதராபாத் ஆற்காடு என மதரஸாபட்டினம் 1799 - இல் மைசூர் புலி திப்பு சுல்தான் இறக்கும் வரை ஏறத்தாழ 15 ஆண்டுகள் முஸ்லிம்களின் கரங்களில் இருந்தது.
தொடக்க காலத்தில் மண்ணடிப் பகுதியில் முஸ்லிம்கள் குடியேறினார்கள். அவர்கள் தென்னகத்தின் கடலோரப்பட்டினக்களைச் சேர்ந்தவர்கள். ஆயிரம் விளக்கு பள்ளிவாசலைச் சுற்றி குடியேறிவர்கள் கோல்கொண்டா பகுதியைச் சேர்ந்தவர்கள், மொகலாயர் காலத்திலும் தக்கான முஸ்லிம்கள் மதரஸாபட்டினத்திற்கு வந்தார்கள்.
குதிரைகளிலும் குதிரை வண்டிகளிலும் நேரடியாக வடக்கிலிருந்து வந்தவர்களைத் தவிர மதரஸாபட்டினத்திற்கு கப்பலில் வந்தவர்கள் பெருந்தொகையினர். டெல்லியிலிருந்தும் கோகொண்டாவிலிருந்தும் குதிரை வண்டிகளிலும் ஆந்திரத்து மசூலிப்பட்டினத்திற்கு வந்தவர்கள் அங்கிருந்து கப்பல்கள் மூலமும் மதரஸாபட்டினம் வந்து சேர்ந்திருக்கிறார்கள். இவ்வாறுதான் மதரஸாபட்டினம் முஸ்லிம்களின் பட்டினமாக மாறியிருக்கிறது.
மதரஸாபட்டினம் - கோல்கொண்டா - ஆக்ரா - டெல்லி என தொடர்பு வைத்திருந்தவர்களில் ஒரு முக்கியமான அளுமை தளபதி ஜியாவுத்தீன் கான். ஆலம்கீர் அவுரங்கசீபின் ஆட்சிக்குப்பின் மூத்த மகன் முஆஜம் பகதூர் ஷா எனும் பெயரோடு சக்கரவர்த்தி ஆனார். பகதூர்ஷாவின் அமைச்சர்களில் ஒருவராகவும் விளங்கிய ஜியாவுதீன் கானின் மனைவி மதராஸ்பட்டின சாந்தோமைச் சேர்ந்தவர்.
அப்போதைய மதரஸாபட்டின ஆளுநர் பிட் ஜியாவுதீன்கானோடு நல்லுறவு வைத்திருந்தார். அவ்வுறவின் மூலம் ஆங்கிலேயர் தம் பழைய பிராமணங்களை நீட்டித்துக் கொண்டார். புதிய பிராமணங்களும் செய்து கொண்டனர். ஐந்து கிராமங்களை புதிதாய்ப் பெற்றனர். டெல்லி மாமன்னர் கேட்ட பொருள்களையெல்லாம் மசூலிப்பட்டினத்திற்கு அனுப்பி அங்கிருந்து டெல்லி செல்ல குதிரை வண்டிகளையும் ஏற்பாடு செய்தனர். (1708)
தளபதி ஜியாவுதீன் கானின் புதல்வரே ஆஸிப்ஷா. நிஜாமுல் முல்க் எனப் பட்டம் பெற்ற ஆஸிப் ஷா பகதூர்ஷா காலத்தில் தக்காண ஆளுநராகவும் டெல்லி அமைச்சராகவும் இருந்தார். 1708 - முதல் 1724 வரை டெல்லியோடு இணைப்பில் இருந்த நிஜாமுல் முல்க் 1724 இல் நிஜாமிய அரசை ஹைதராபத்தில் உருவாக்கினார், இவர் மதரஸாபட்டின மாதரசியின் மைந்தர் என்பது குறிப்பிடத்தக்கது.
உருதுவையும் தமிழையும் தாய்மொழியாகக் கொண்ட முஸ்லிம்கள் மதரஸாபட்டினத்தில் பெரும்பான்மையாக வாழ்ந்தாலும் வேறு வேறு மொழி பேசும் முஸ்லிம்களும் பட்டினத்தில் கணிசமாக வாழ்கின்றனர்.
மலையாளம் பேசும் முஸ்லிம்கள் ஆங்காங்கு வாழ்கின்றனர். அவர்களுக்கான அமைப்புகளும் மதராஸில் உண்டு. அவற்றில் முக்கியமானது மலபார் முஸ்லிம் அசோசியேசன். இதன் தலைமையகம் எழும்பூர் கென்னட் சாலையில் உள்ளது. அங்கு ஒரு மசூதியும் தங்கும் விடுதியும் உள்ளன. பல்வேறு வணிகங்கள் செய்யும் அவர்கள் முக்கியமாக மரவாடிகளும் உணவு விடுதிகளும் வைத்துள்ளனர்.
அதேபோல் மதரஸாவில் காலாதிகாலமாய் வாழ்வோர் மேமன் முஸ்லிம்கள். இவர்கள் குஜராத்தின் கட்ச் பகுதியிலிருந்து வந்து மதராஸில் வாழ்பவர்கள். பெரும் வணிகங்களும் முக்கியமாக துணி வணிகமும் செய்தனர். இவர்கள் ஈவினிங் பஜார், சைனா பஜார், கொத்தவால் சாவடி பகுதிகளில் வணிகப் பெரும் புள்ளிகளாக வாழ்ந்தவர்கள்.
இவர்கள் கட்டிய பள்ளிவாசல்கள் கிடங்குத் தெருவிலும் ஆண்டர்ஸன் தெருவிலும் உள்ளன. ஆண்டர்ஸன் தெரு பள்ளிவாசல் இன்றும் மேமன் மசூதி எனவே அழைக்கப்படுகிறது. ‘கட்ச்’ மொழியை தாய்மொழியாகக் கொண்ட இவர்கள் உருது மொழியும் பேசுகின்றனர். பெரும்பாலானோர் கல்விக்கு முதலிடம் கொடுப்பதால் குஜராத்தி, பார்ஸி, அரபி, ஆங்கிலம், தமிழ் என பன்மொழிப் புலமையுடையோராய் திகழ்கின்றனர்.
இவர்கள் கட்டிய ‘முஸாபர்கானா’ கொத்தவால்சாவடி சின்னத் தம்பித் தெருவில் உள்ளது. குறைந்த வாடகையில் வெளியூர்க்காரர்கள் தங்க சிறந்த இடமாக முஸாபர்கானா விளங்குகிறது.
காங்கிரஸ், கிலாபத் இயக்கங்களில் பங்கேற்ற இவர்கள் பெருங்கொடையாளர்கள். ‘ஹோம் ரூல்’ இயக்கத்திலும் இவர்களில் சிலர் பங்கேற்றுள்ளனர்.
மதராஸ் ராஜதானியில் அமைந்த இடைக்கால அரசில் 1916 - இல் யாக்கூப் ஹஸன் சேட் என்ற மேமன் பிரமுகர் உறுப்பினராகவும் 1941 - இல் அமைந்த ராஜாஜி மந்திரி சபையில் அமைச்சராகவும் இருந்துள்ளார். இவர்தான் மதரஸா பட்டினத்திற்கு குடிநீர் தரும் பூண்டி நீர்த் தேக்கத்தை தெரிவு செய்தவர். இவருடைய துணைவி கதீஜா பீவி 1937 - இல் சட்டமன்ற உறுப்பினராக இருந்தவர்.

மேமன் முஸ்லிம்களைப் போலவே மதரஸாபட்டினத்தில் போரா முஸ்லிம்களும் வாழ்கின்றனர். இவர்கள் மண்ணடி, பிராட்வே பகுதிகளில் வன்பொருள் (Hardwares) தொழிலகங்கள் நடத்திவருகின்றனர். இவர்களின் குடியிருப்புகள் மண்ணடிப் பகுதியிலேயே உள்ளன. இங்கேயே அவர்களின் இரு வணக்கத்தலங்களும் உள்ளன.
இவர்களும் குஜராத்திலிருந்து வந்து குடியேறியவர்களே. ‘போஹ்ரா’ என்ற குஜராத்தி சொல்லுக்கு வணிகர்கள் என்று பொருளாகும். ஷியா - சன்னிகளான இவர்கள் ஆதியில் விவசாயிகளாக இருந்தவர்கள்.
ஷியாக்களில் பெரும்பாலோர் இஸ்மாயிலி பிரிவினர். மேலும் பல பிரிவுகள் உள்ளன. இவர்கள் ஒரு தலைவரின் கீழ் அமைப்பாக உள்ளனர். தலைவருக்கு போராக்கள் தலை சாய்த்து முகமன் கூறுகின்றனர். இவர்களில் பிரபலமான அஸ்கர் அலி எஞ்சினியர் தலைவருக்கு தலை சாய்த்தல் போன்றவற்றால் போராக் குழுவிலிருந்து வெளியேறி இஸ்லாத்துக்கு எதிரான கருத்துக்களை கூறி வருகிறார்.
வேற்று மொழிகளைத் தாய்மொழியாகக் கொண்ட முஸ்லிம்களும் மதராஸ் பட்டினத்தின் பல பகுதிகளில் வாழ்கின்றனர். தெலுங்கைத் தாய்மொழியாகக் கொண்டவர்கள் தற்போது வில்லிவாக்கம் சிட்கோ நகரில் கணிசமாக வாழ்கின்றனர்.
பல்வேறு முஸ்லிம்கள் பல்வேறு வாழ்க்கைத் தரங்களில் வாழ்ந்தாலும் மிக ஏழ்மையான பல முஸ்லிம்கள் சில குறிப்பிட்ட பகுதிகளில் வாழ்கின்றனர். வண்ணாரப்பேட்டை லாலா குண்டாவிலும் பெரம்பூரின் ஓரங்களிலும் புளியந்தோப்பிலும் திருவல்லிக்கேணி நீலம் பாஷா தர்கா பகுதியிலும் கிருஷ்ணாம்பேட்டை பகுதியிலும் வறுமைக் கோட்டுக்குக் கீழுள்ளவர்கள் வாழ்கின்றனர்.
ஏழை எளியவராய் பாமரராய் வாழும் இங்குள்ள முஸ்லிம்களைத்தான் சச்சார் கமிஷன் அஷ்ரப், அஜ்லப், அர்ஸல் என மூன்று வித நசுக்கப்பட்டவர்களாய் அடையாளம் காட்டுகிறது. இவர்களில் பெரும்பாலோர் பீடி முறங்களை மடியில் ஏந்தியவர்கள். பெண்கள் பீடி சுற்ற, ஆண்கள் டீ வாங்கி வர, பிள்ளைகள் பீடிகளின் வாய்மூட லேபிள் ஒட்ட என வாழ்க்கையைச் சுருக்கிக் கொண்டவர்கள்.
வறுமையைப் போக்க பீடி சுற்றக் கற்றுக் கொண்டவர்கள் தம்மையும் தொலைத்து தம் வருங்காலத்தையும் சிதைத்துக் கொண்டார்கள். படிப்பறிவில்லாத அவர்கள் தம் பிள்ளைகளையும் பள்ளிக்கு அனுப்பாதவர்கள். கிடைத்த கூலியைத் தவிர அவர்களுக்குக் கேட்காமல் போனசும் கிடைத்தது. அது காசநோய்.
ஆங்கிலேயர் காலத்தில் கல்வியை இரண்டாக்கினர் முஸ்லிம் மேதாவிகள்… இம்மை மறுமைக் கல்வியெனப் பிரித்து வழங்கிய பத்வா - மார்க்கத் தீர்ப்பினால் சமுதாயம் கல்வியை இழந்தது போல் பீடி சுற்றுவதாலும் பேரிழப்பைச் சந்தித்தனர் முஸ்லிம்கள்.
காலப்போக்கில் விழிப்படைந்த முஸ்லிம் சமுதாயம் கல்வியைப் பிடித்துக் கொண்டு கரையேறி விட்டது. கரையேறிய சமுதாயத்தை உரிய வழியில் அழைத்துச் செல்லாத தலைவர்கள் தாமும் தடுமாறி சமுதாயத்தையும் தடுமாறச் செய்து கொண்டுள்ளனர். இயக்கங்களால் பிரிந்து கிடக்கும் சமுதாயம் மீண்டெழப் பிரார்த்தனை செய்வதோடு பாடாற்றுவோம். பண்பாட்டுப் பாட்டையில் பயணிப்போம்.
ஊர்வலம் தொடரும்…
தொடர்புக்கு : 9600989963

திங்கட்கிழமை, 07 மே 2018 14:29

தொழில் செய்வோம் வளம் பெறுவோம்-2

Written by

வெற்றியின் சூத்திரமான முதல் மூல மந்திரம் “தன்னம்பிக்கை (Self-confidence)”
சாதனையாளர்களின் தலைவாசல் – தன்னம்பிக்கை
பிறப்பு முதல் இறப்பு வரை வாழ்நாள் முழுவதும் உயிர் வாழ சுரக்கும் வற்றாத ஜீவநதி-யாக இரத்தத்தை இறைவன் பிறப்பிலேயே உருவாக்கி உள்ளான். அது போல் எல்லா மனிதர்களையும் இறைவன் படைக்கும் போதே தன்னம்பிக்கை விதையை மனதில் விதைத்துள்ளான். விதைக்கப்பட்ட அனைத்து விதைகளுக்கும் இறைவன் பாரபட்சமின்றி ஒரே காற்றையும், நீரையும் தந்துள்ளான். உயிர்ப்புள்ள விதைகள் மட்டுமே மண்ணை கிழித்துக் கொண்டு வெளி வந்து செடியாகி, மரமாகி, விருட்சமாகி பரந்து விரிந்து பயன் அளிக்கின்றது. அதுபோல் ஒவ்வொரு மனிதனுக்கும் ஆற்றல், அறிவு திறமைகள் வாய்ப்புகள் போன்றவற்றை தன்னம்பிக்கை விதைகள் பெற தந்துள்ளான்.
ஒரு முட்டை வெளியில் இருந்து உடைபட்டால் ஒரு உயிர் போகின்றது. ஆனால் உள்ளுக்குள் இருந்து உடைபட்டு வெளிவந்தால் ஒரு குஞ்சாக ஓர் உயிராக வெளிவருகின்றது.
அதுபோல் தாழ்வு மனப்பான்மை, முடியாது என்ற முயலாமை போன்ற மனத்தடைகளை உடைத்துக் கொண்டு, தன்னம்பிக்கை கொண்டு “இதுவும் கடந்து போகும்” என்ற எண்ணத்துடன் செயல்பட்ட சாதனைப் பெண்களில் ஒருவர் தான் கோவை கணபதி நகர் பகுதியில் டெக்ஸ்டைல் இயந்திரங்களுக்கான ரப்பர் ஸ்பேர்பார்ட்ஸ் தயாரிப்புத் தொழிற் சாலை நடத்திக் கொடிருப்பவர் திருமதி ஷோபனா அவர்கள். மகிழ்வான குடும்ப வாழ்க்கையில் திடீரென ஏற்பட்ட சாலை விபத்தில் தன் கணவரை இழந்துவிட்டார். வாழ்க்கைத் துணைவரை இழந்து உறவுகளை இழந்து பல்வேறு கேவலங்கள் அவமானங்களைப் பெற்ற நிலையில் தன்னமிபிக்கை என்ற கடிவாளத்தை உயர்த்திப் பிடிதன்னையும் வளர வைத்து தன்னைப் போல் பலரையும் உயர வைத்த சாதனை பெண்ணின் தாரக மந்திரம் தன்னம்பிக்கைதான்.
ஓர் பழத்தில் எத்துனை விதைகள் என்பதை எல்லோராலும் எண்ணி விட முடியும். ஆனால் ஓர் விதைக்குள் எத்தனை மரங்கள் கனிகள் என்பதை யாராலும் கற்பனை கூட செய்ய முடியாது.
அப்படி சிறு விதைக்குள் இருந்து விருட்சமாக வெளி வந்தவர்கள் தான் ஓசூர் அருகில் கொண்டபள்ளி கிராமப் பகுதியில் செயல்பட்ட பெண்கள் சுய உதவி குழுக்களில் இருந்து வெளி வந்த 60 பெண்கள் கொண்ட ஒரு குழு சிறு முதலீட்டில் ஆரம்பிக்கப்பட்ட சப்பாத்தி வணிகம் இன்று தினம் தோறும் 12 ஆயிரம் முதல் 15 ஆயிரம் வரை சப்பாத்திகளை விற்பனை செய்யும் அளவிற்கு உயர்ந்து உள்ளார்கள். அசாதாரணமான வெற்றிகளை பல சாதரணமானவர்கள் பெறுவதற்கு மூல மந்திரம் தன்னம்பிக்கைதான் தான்.
ரூபாய் நோட்டு எத்துனை முறை மடித்தாலும் கசக்கினாலும் கிழிந்தாலும் தன் மதிப்பு மாறுவதில்லை. அதுபோல் தன்னம்பிக்கை கொண்டவர்களுக்கும் எத்துனை கேவலங்கள் அவமானங்கள் நடந்தாலும் தன் மதிப்பு மாறாமல் இருப்பார்கள்.
அப்படிப்பட்டவர்களில் ஒருவர்தான் கோவை முருகானந்தம் அவர்கள் பெண்களுக்கான மிகக்
குறைந்த விலையில் தரமான சானிடரி நேப்கின்களை உருவாக்க வேண்டும் என்ற உயரிய எண்ணத்தில் செயல்பட துவங்கிய போது பல்வேறு கேவலங்கள், அவமானங்கள், முடியாது என்ற சொற்களை குடும்ப உறவுகள், சமூகத்தில் பெற்ற போதும் கூட முடியாது என்பது இயலாதது மட்டுமே, நம்மால் முடியாதது யாராலும் முடியாதது. யாராலும் முடியாதது நம்மால் முடியும் என்ற தன்னம்பிக்கை எண்ணத்தை உள்ளத்தில் கொண்டு இன்று 10 ஆயிரம் பெண்களுக்கு வேலை வாய்ப்பு தந்து, நாட்டில் 27 மாநிலங்களில், மத்திய கிழக்கு ஆசிய நாடுகள் மற்றும் ஆப்பிரிக்க நாடுகளில் மலிவான விலை தனித் தரமான சானிடரி நேப்கின்களை விற்பனை செய்யும் தயாரிப்பு நிறுவனத்தை உருவாக்கியுள்ளார்.
பொருட்களை, மதிப்புக் கூட்டப்பட்ட பொருட்களாக மாற்றி (Value added products) விற்பனை செய்தால் தான் குடும்ப பொருளாதாரமும் மதிப்பு கூடும் என்ற எண்ணத்தில் தன்னம்பிக்கையோடு செயல்பட்டு வெற்றி கண்டுள்ளவர்கள் இளநீரை மதிப்பு கூட்டும் பொருட்களாக ஏற்றுமதி செய்து கொண்டிருக்கும் திருச்சி காஜா மொய்தீன் அவர்களும், பால் பொருட்களை மதிப்பிக் கூட்டும் பொருட்களாக தயாரித்து விற்பனை
செய்து கொண்டிருக்கும் தஞ்சாவூர் வல்லத்தைச் சேர்ந்த ஷகிலா பானு தம்பதியினரும் இவர்கள் போல் தனி நபர்களாக, குழுக்களாக தன்னம்பிக்கையுடன் செயல்பட்டு கொண்டிருக்கும் தமிழகத்தில் பலநூறு தொழில் துறை சாதனையாளர்களை ஆதாரத்துடன் அறிந்து வைத்துள்ளேன். நேற்றைய கேள்விக் குறியாளர்கள் இன்றைய ஆச்சரியக்குறிகளாக உள்ளார்கள்.
நேற்றைய நிழல், இன்றைய நீளும்… நாளைய சரித்திரம் என்பதை மெய்ப்பிக்கும் முதல் மூல மந்திரம் தன்னம்பிக்கை…..

வெள்ளிக்கிழமை, 27 ஏப்ரல் 2018 12:50

முதல் தலைமுறை மனிதர்கள் 14

Written by

சேயன் இப்ராகிம்

காதிமே மில்லத் திருச்சி K.S அப்துல் வகாப் ஜானி
திருச்சி மாவட்டம் பல சுதந்திரப் போராட்ட வீரர்களையும், சமுதாயச் சேவையாளர்களையும் தமிழ் கூறும் நல்லுலகிற்குத் தந்துள்ளது. காஜா மியான் இராவுத்தர், ஸையத் முர்த்துஸா ஹழ்ரத் போன்ற சுதந்திரப் போராட்ட வீரர்களும், மறுமலர்ச்சி ஆசிரியர் A.M. யூசுப், K.S. அப்துல் வஹாப் ஜானி, A.K. பாஷா, எழுத்தரசு A.M. ஹனீப், குலாம் ரசூல், மதனி போன்ற சமுதாயச் சேவையாளர்களும் இம்மாவட்டத்தைச் சார்ந்தவர்களே! இவர்களுள் இந்திய யூனியன் முஸ்லிம் லீகின் தமிழ் மாநிலத் தலைவராகவும், சட்டமன்ற மேலவை உறுப்பினராகவும் பதவிகள் வகித்த திருச்சி K.S. அப்துல் வஹாப் ஜானி சாகிப் அவர்களைப் பற்றி இந்த இதழில் பார்க்கவிருக்கிறோம்.
பிறப்பு - கல்வி:
இருபதாம் நூற்றாண்டின் தொடக்ககாலம் முதல் தொடர்ந்து பல ஆண்டுகள் திருச்சி நகரில் பல பீடிக் கம்பெனிகள் செயல்பட்டு வந்தன. பெரும்பாலான பீடிக் கம்பெனிகளின் அதிபர்களாக முஸ்லிம்களே இருந்தனர். பீடிசுற்றும் தொழிலிலும் முஸ்லிம்களே பெரும்பாலும் ஈடுபட்டிருந்தனர். அப்போது திருச்சி நகரில் செயல்பட்டு வந்த பீடிக் கம்பெனிகளில் குறிப்பிடத்தக்கது மான்மார்க் பீடிக் கம்பெனியாகும். அதன் உரிமையாளர் அப்துல் ஸமது சாகிபின் இரண்டாவது மகனான ஜானிபாய் என்றழைக்கப்பட்ட அப்துல் வஹாப் 14.11.1922ல் பிறந்தார். தனது ஆரம்ப மற்றும் இடைநிலைக் கல்வியை திருச்சி அரசினர் இஸ்லாமிய உயர் நிலைப்பள்ளியில் கற்றுத் தேறிய ஜானிபாய், பட்டப்படிப்பிற்காக அந்நகரிலிருந்த செயிண்ட் ஜோசப் கல்லூரியில் சேர்ந்தார். எனினும் அவரால் படிப்பைத் தொடர முடியவில்லை. அவரது தகப்பனார் அப்துல் ஸமத் சாகிப் 1942ஆம் ஆண்டு திடீரென மரணமுற்றதால், பீடிக் கம்பெனியின் நிர்வாகத்தைக் கவனிப்பதற்காக கல்லூரிப் படிப்பை இடையிலேயே விட்டுவிட்டார் கம்பெனியின் நிர்வாகப் பொறுப்பினை இளம் வயதிலே ஏற்றுக் கொண்டார்.
அரசியல் ஈடுபாடு:
பீடிக் கம்பெனியின் நிர்வாகத்தைக் கவனித்துக் கொண்டிருந்த அவருக்கு அரசியலிலும் ஆர்வம் இருந்தது. அப்போது அகில இந்திய முஸ்லிம் லீக் மிகவும் விறுவிறுப்புடன் செயல்பட்டுக் கொண்டிருந்தது. அப்போதிருந்த பெரும்பாலான முஸ்லிம் இளைஞர்களைப் போல் அவரும் லீகில் தன்னை இணைத்துக் கொண்டார். முஸ்லிம் லீக் நடத்திய ஊர்வலங்களிலும், பொதுக்கூட்டங்களிலும் கலந்து கொண்டார். 1946ஆம் ஆண்டு திருச்சி நகர முஸ்லிம் லீகின் பொருளாளராகத் தேர்ந்தெடுக்கப்பட்ட அவர், அதே ஆண்டு திருச்சி மாவட்ட முஸ்லிம் லீகின் பொதுக்குழு உறுப்பினராகவும் தேர்ந்தெடுக்கப்பட்டார். அதன் பின்னர் அவரது கட்சிப்பணிகள் தீவிரமடைந்தன. நாட்டுப் பிரிவினைக்குப் பின்னர், இந்திய நாட்டு முஸ்லிம்களின் நலன்களையும், உரிமைகளையும் பாதுகாப்பதற்காகத் தொடங்கப்பட்ட இந்திய யூனியன் முஸ்லிம் லீக்கில் இணைந்து தனது பணிகளைத் தொடர்ந்தார். பிரிவினைக்குப் பின்னர் முதன் முதலாக கோயம்புத்தூர் ஜி.டி.நாயுடு பங்களா பணிமனையில் நடைபெற்ற முஸ்லிம் லீக் மாநாட்டில் கலந்து கொண்டார்.
1958 ஆம் ஆண்டு ஜனவரி மாதம் 11 மற்றும் 12 தேதிகளில் திருச்சியில் நடைபெற்ற முஸ்லிம் லீக் ஊழியர்கள் மாநாடு அக்கட்சியின் வரலாற்றில் திருப்பு முனையை ஏற்படுத்தியது. சுதந்திரத்திற்குப் பின்னர் சற்றுத் தொய்வடைந்திருந்த அக்கட்சி இம்மாநாட்டிற்குப் பின்னர் புத்துயிர்பெற்றது. தமிழகமெங்கிலுமிருந்து ஆயிரக்கணக்கான கட்சித் தொண்டர்கள் இம்மாநாட்டில் கலந்து கொண்டு சிறப்பித்தனர். இம்மாநாட்டின் வரவேற்புக் குழுத் துணைத் தலைவராக ஜானி சாகிப் பொறுப்பு வகித்து மாநாட்டின் வெற்றிக்காகப் பெரிதும் உழைத்தார். அதே ஆண்டு தஞ்சை மாவட்டம் அய்யப்பேட்டையில் நடைபெற்ற முஸ்லிம் லீக் மாநாட்டிலும் கலந்து கொண்டார். இதன் பின்னர் 1960ஆம் ஆண்டு செப்டம்பர் திங்கள் 17 மற்றும் 18தேதிகளில் சென்னை நகரில் காயிதேமில்லத் தமைமையில் நடைபெற்ற மாநில மாநாட்டில் கலந்து கொண்டு உரையாற்றினார். திருச்சி மாவட்ட முஸ்லிம் லீக் செயலாளராகத் தேர்ந்தெடுக்கபட்ட அவர் அப்பதவியில் பல ஆண்டுகள் நீடித்தார்.
சட்டமன்ற மேலவை உறுப்பினர் (M.L.C)
தமிழக அரசியலில் ஒரு திருப்பமாக, அரசியலில் எதிரும் புதிருமாக இருந்த தி.மு.கவும், இந்திய யூனியன் முஸ்லிம்லீக்கும் 1962ஆம் ஆண்டு நடைபெற்ற பொதுத்தேர்தலில் தொகுதி உடன்பாடு செய்த கொண்டு போட்டியிட்டன. தமிழக அரசியல் வரலாற்றில் தேர்தலுக்கு முன்னர் இரு கட்சிகள் தொகுதி உடன்பாடு செய்து கொண்டு போட்டியிட்டது இதுவே முதல் முறையாகும். பாராளுமன்றத்திற்கும், தமிழக சட்டமன்றத்திற்கும் சேர்த்து நடைபெற்ற இந்தப் பொதுத் தேர்தலில் முஸ்லிம் லீகிற்கு இரண்டு பாராளுமன்றத் தொகுதிகளும், ஆறு சட்டமன்றத் தொகுதிகளும் ஒதுக்கப்பட்டன. எனினும் இந்தத் தேர்தலில் பாராளுமன்றத்திற்கும் சட்ட மன்றத்திற்கும் போட்டியிட்ட முஸ்லிம்லீக் வேட்பாளர்கள் யாரும் வெற்றிபெறவில்லை இதனால் முஸ்லிம் லீக் தொண்டர்கள் ஏமாற்றமடைந்தனர். இந்நிலையில், சட்டமன்றத்தில் முஸ்லிம் லீக் உறுப்பினர்கள் இடம் பெறாவிட்டாலும், சட்டமன்ற மேலவையிலாவது (M.L.C) இடம் பெற்று சமுதாய மக்களின் குரலை ஒலிக்க வேண்டும் என்று கருதிய மாநிலத் தலைமை தி.மு.க.வின் பொதுச் செயலாளர் பேரறிஞர் அண்ணாவைச் சந்தித்து சட்டமன்ற மேலவையில் முஸ்லிம்லீகிற்கு ஒரு இடம் வேண்டுமெனக் கோரிக்கை வைத்தது. இதனை அண்ணாவும் ஏற்றுக் கொண்டு தி.மு.க சட்டமன்ற உறுப்பினர்களிலிருந்து தேர்ந்தெடுக்கப்படும் மேலவை உறுப்பினர்களுக்கான ஒரு இடத்தை முஸ்லிம்லீகிற்கு ஒதுக்கினார். இந்த இடத்திற்கு யாரும் எதிர்பாராதவிதமாக, ஜானிபாயை கட்சித் தலைமை வேட்பாளராக அறிவித்தது. அவரும் வெற்றிபெற்று மேலவை உறுப்பினரானார். 1962ஆம் ஆண்டு முதல் 1968ஆம் ஆண்டுவரை அவர் மேலவை உறுப்பினராகச் சிறப்பாகச் செயல்பட்டார். அவரது பதவிக் காலம் முடிந்தவுடன் மீண்டும் அவர் தி.மு.க சட்டமன்ற உறுப்பினர்களின் ஆதரவுடன் முஸ்லிம் லீக் சார்பில் போட்டியிட்டு வெற்றி பெற்று 1974ஆம் ஆண்டு வரை பதவி வகித்தார். 1974ஆம் ஆண்டு மேலவைக்கு நடைபெற்ற தேர்தலின் போதும் முஸ்லிம்லீக் மூன்றாவது முறையாகப் போட்டியிட அவருக்கு வாய்ப்பளித்தது. எனவே அவர் தொடர்ந்து மூன்றாவது முறையாகப் போட்டியிட்டு மேலவை உறுப்பினரானார். மொத்தம் 18 ஆண்டுகள் அவர் தொடர்ந்து சட்டமன்ற மேலவை உறுப்பினராகப் பதவி வகித்துச் சாதனை புரிந்தார். மேலவை உறுப்பினராக இருந்த காலகட்டத்தில் பெருந்தலைவர் காமராஜர், பக்தவத்சலம், பேரறிஞர் அண்ணா, கலைஞர் கருணாநிதி, புரட்சித் தலைவர் எம்.ஜி.ஆர் ஆகிய ஐந்து தலைவர்கள் தமிழ் நாட்டின் முதல்வர்களாக இருந்துள்ளனர். இந்த ஐந்து முதலமைச்சர்களுடனும் அவர் நெருங்கிய தோழமையும் நட்பும் கொண்டிருந்தார். 1974ஆம் ஆண்டிற்குப்பிறகு நடைபெற்ற சட்டமன்ற மேலவைத் தேர்தலில் முஸ்லிம் லீகின் சார்பில் தேர்ந்தெடுக்கப்பட்ட வடகரை பக்கர்சாகிப் மற்றும் J.M. மியாக்கான் சாகிப் ஆகியோருடன் இணைந்து ஜானிசாகிப் பணியாற்றினார்.
தனது 18ஆண்டுகள் மேலவை உறுப்பினர் பதவிக் காலத்தில் ஜானிபாய் பல்வேறு பொதுப் பிரச்சனைகளுக்காகவும் முஸ்லிம்களின் நலன்கள், உரிமைகள் சார்ந்த பிரச்சனைகளுக்காகவும் பேசியுள்ளார். பல்வேறு மானியப் கோரிக்கைகள். சட்ட முன்வடிவுகள், மசோதாக்கள், கவன ஈர்ப்புத் தீர்மானங்கள், ஒத்திவைப்புத் தீர்மானங்கள் ஆகியவற்றில் கலந்து கொண்டு பேசுகின்ற வாய்ப்பு அவருக்கு கிடைத்தது. அந்த வாய்ப்புகளையெல்லாம் அவர் நன்முறையில் பயன்படுத்திக் கொண்டார். அவரது அமைதியான, ஆர்ப்பாட்டமில்லாத, கண்ணியமான அணுகுமுறை அனைவரின் பாராட்டுதல்களையும் பெற்றது.
மாநில முஸ்லிம்லீக் தலைவர்:
இந்திய யூனியன் முஸ்லிம் லீகின் தேசியத் தலைவராகவும், தமிழ் மாநிலத் தலைவராகவும் பொறுப்புகள் வகித்த கண்ணியத்திற்குரிய காயிதேமில்லத் அவர்கள் 5.4.1972 அன்று மரணமுற்றார். அவருக்குப் பதிலாக மாநிலத் தலைவரைத் தேர்ந்தெடுக்கும் விஷயத்தில் ஒருமித்த கருத்தை உருவாக்குவதற்குக் கால அவகாசம் தேவைப்பட்டதால் ஒரு இடைக்கால ஏற்பாடாக மாநிலத் துணைத்தலைவராகப் பொறுப்பு வகித்த தென்காசி முதலாளி மு.ந.அப்துர் ரஹ்மான் சாகிப் தலைவராக நியமிக்கப்பட்டார். (அவர் 6.4.72 முதல் 11.5.72 வரை பதவி வகித்தார்.) மாநிலத் தலைவரைத் தேர்ந்தெடுப்பதற்கான முறையான பொதுக்குழுக் கூட்டம் 12.05.1972 அன்று சென்னையில் நடைபெற்றது. இக் கூட்டத்தில் மாநில லீகின் தலைவராக ஜானி சாகிப் ஏகமனதாகத் தேர்ந்தெடுக்கப்பட்டார். மாநிலத் தலைவராக ஏ.கே.ஏ. அப்துல் சமது சாகிப் தான் தேர்ந்தெடுக்கப்படுவார் என கட்சியின் முன்னணிப் பிரமுகர்களும், தொண்டர்களும் எதிர்பார்த்திருந்த நிலையில் ஜானி சாகிப் தேர்ந்தெடுக்கப்பட்டது அனைவரையும் வியப்பில் ஆழ்த்தியது. ஏ.கே.ஏ. அப்துல் ஸமது சாகிபை எதிர்த்து காயிதே மில்லத் குடும்பத்தைச் சார்ந்த ஒருவர் தலைவர் பதவிக்குப் போட்டியிடத் தயாராக இருந்ததாகவும், எனவே போட்டியைத் தவிர்க்கும் பொருட்டு ஒரு சமரச ஏற்பாடாக ஜானி பாய் தேர்ந்தெடுக்கபட்டதாகவும் அப்போது பேசப்பட்டது. தலைவராகத் தேர்ந்தெடுக்கப்பட்ட ஜானிபாய் தமிழகமெங்கும் சுற்றுப்பயணம் மேற்கொண்டு கட்சியை வலுப்படுத்தும் பணிகளில் ஈடுபட்டார். பொறுப்புக்கு வந்து ஓராண்டுக்குப்பின்னர் அதாவது 1973 ஆம் ஆண்டு ஜுன் மாதம் 9 மற்றும் 10ம் தேதிகளில் சென்னை நகரில் மாநில லீகின் மாநாட்டை அவர் வெற்றிகரமாக நடத்தினார். இம் மாநாட்டில் லீகின் தேசியத் தலைவர் இப்ராகிம் சுலைமான் சேட், கேரளச் சிங்கம் சி.ஹெச். முகம்மது கோயா, தளபதி திருப்பூர் முகையதின் சாகிப், சிராஜுல் மில்லத் ஏ.கே.ஏ. அப்துல் ஸமது சாகிப். அப்போதைய முதல்வர் கலைஞர் மு.கருணாநிதி ஆகியோர் கலந்து கொண்டு உரையாற்றினர். இம்மாநாட்டிற்கு வசூலான தொகையில் செலவு போக மிச்சமிருந்த ரூ.45ஆயிரம் சென்னை மரைக்காயர் தெருவில் செயல்பட்டு வரும் மாநில லீக் தலைமையத்தின் மேம்பாட்டிற்காக வழங்கப்பட்டது குறிப்பிடத்தக்கது. காயிதே மில்லத் அவர்களின் மரணத்திற்குப் பிறகு ஏற்பட்ட நெருக்கடியான காலகட்டத்தில் கட்சியை சிறப்பாக வழிநடத்திய பெருமை ஜானி சாகிபுக்கு உண்டு. எனினும் சிறப்பான முறையில் செயல்பட்டுக் கொண்டிருந்த அவர், தனது உடல் நிலையைக் காரணம் காட்டி 1975ம் ஆண்டு தலைவர் பதவியிலிருந்து விலகினார். அவரது பதவி விலகலையடுத்து 12.2.1975 அன்று சென்னையில் நடைபெற்ற கட்சியின் பொதுக்குழுக் கூட்டத்தில் சிராஜுல் மில்லத் ஏ.கே.ஏ. அப்துல் சமது சாகிப் தலைவராகத் தேர்ந்தெடுக்கப்பட்டார். (ஜானி பாய் 12.05.1972 முதல் 13.05.1975 வரை தலைவராகப் பொறுப்பு வகித்தார்.)
தோல்வியும் பிளவும்:
1968ஆம் ஆண்டு லீகின் உள்கட்சித் தேர்தல்கள் நடைபெற்றன. அதன்படி 29.9.1968 அன்று திருச்சி மாவட்ட மு°லிம் லீக் நிர்வாகிகளைத் தேர்ந்தெடுப்பதற்காக நடைபெற்ற பொதுக்குழுக் கூட்டத்தில் ஜானி சாகிப் மற்றும் பி.ஹெச். நஸீருத்தீன் சாகிப் ஆகியோர் ஒரு அணியாகவும். மறுமலர்ச்சி ஆசிரியர் ஏ.எம்.யூசுப் ஆதரவாளர்களான ஏ.கே. ஜமாலி சாகிப் மற்றும் ஹெச்.எம்.சுல்தான் சாகிப் ஆகியோர் ஒரு அணியாகவும் பதவிகளுக்குப் போட்டியிட்டனர். இத்தேர்தலில் மாவட்டச் செயலாளர் பதவிக்குப் போட்டியிட்ட ஜானி சாகிப் வெற்றி வாய்ப்பை இழந்தார். மறுமலர்ச்சி ஆசிரியர் யூசுப் அணியைச் சார்ந்த ஹெச். எம். சுல்தான் மாவட்டச் செயலாளராகத் தேர்ந்தெடுக்கப்பட்டார். எனினும் திருச்சி மாவட்ட தேர்தல் முடிவுகள் மாநில அளவில் கட்சியில் பிளவை ஏற்படுத்தியது. தேர்தல் நடைபெற்று முடிந்த மூன்று தினங்கள் கழித்து மாநில செயற்குழுக் கூட்டம் அக்டோபர் மாதம் 1 மற்றும் 2ம் தேதிகளில் சென்னையில் நடைபெற்றது. இந்தக் கூட்டத்தில் மறுமலர்ச்சி ஆசிரியர் ஏ.எம்.யூசுப். ஏ.கே. ஜமாலி சாகிப், ஏ.கே. பாஷா உள்ளிட்ட ஏழுபேர் கட்சியிலிருந்து தற்காலிக நீக்கம் செய்யப்பட்டனர். (கட்சியிலிருந்து தற்காலிகமாக நீக்கப்பட்ட ஏ.எம். யூசுப் பின்னர் தமிழ்நாடு முஸ்லிம்லீக் என்ற தனிக்கட்சியைத் தொடங்கி சில ஆண்டுகள் நடத்திவிட்டு பின்னர் முஸ்லிம்லீகில் இணைந்தார். அது தனி வரலாறு.) இந்த நடவடிக்கைக்குப் பின்னர் 29.9.68 அன்று நடைபெற்ற திருச்சி மாவட்ட நிர்வாகிகள் தேர்தலை ரத்துச் செய்த மாநிலத் தலைமை 17.11.68 அன்று மீண்டும் தேர்தலை நடத்த உத்தரவிட்டது. இத்தேர்தலில் ஜானி சாகிப் மாவட்டச் செயலாளராகத் தேர்ந்தெடுக்கப்பட்டார்.
பொதுப் பணிகள்
சொந்தத் தொழில், அரசியல் பணிகள் தவிர திருச்சி நகரில் பல்வேறு பொது நல அமைப்புகளிலும் ஜானிபாய் அங்கம் வகித்து மக்கள் பணியாற்றினார். திருச்சியில் சிறந்த சமுதாய நிறுவனமாகத் திகழ்ந்திடும் முஸ்லிம் லிட்டரரி சொசைட்டி (இலக்கிய சங்கம்) யின் தலைவராக 1953ஆம் ஆண்டு முதல் 1988ஆம் ஆண்டு வரை பதவி வகித்தார். திருச்சியிலுள்ள ஆற்காடு நவாப் என்டோமெண்ட் ஆலோசனைக் குழு உறுப்பினராகவும் பொறுப்பு வகித்துள்ளார். சென்னை மேடவாக்கத்தில் தொடங்கப்பட்ட காயிதே மில்லத் ஆண்கள் கல்லூரியின் நிர்வாகக் குழு உறுப்பினராகவும், காயிதே மில்லத் கல்வி அறக்கட்டளையின் ஆட்சி மன்றக் குழுத் தலைவராகவும் இருந்து சிறப்பான கல்விப் பணியாற்றியுள்ளார்.
பண்பு நலன்கள்:
ஜானி சாகிப் மிகச் சிறந்த நற்பண்புகளின் உறைவிடமாகத் திகழ்ந்தார். தனது தொழில் மூலம் கிடைத்த வருமானத்தின் கணிசமாக பகுதியை கட்சிக்கும் கட்சித் தொண்டர்களுக்கும் செலவிட்டார். செல்விருந்து ஓம்பி வருவிருந்து பார்த்திருக்கும் விருந்தோம்பும் பண்பினராக அவர் விளங்கினார். அவரது இல்லத்திற்கு வந்து அவரது இனிமையான விருந்தோம்பலை ஏற்றுக் கொள்ளாத தலைவர்களே இல்லை எனலாம். கள்ளம் கபடமற்ற வெள்ளை மனமும், பரந்த பண்பும் கொண்ட அவர் தன்னுடைய பீடிக் கம்பெனியில் பணியாற்றிய ஏழை எளிய மக்களுக்கும் பெரிதும் உதவிகள் புரிந்து வந்தார்.
குடும்பம்:
ஜானி சாகிபின் தாயார் பெயர் ஷாஜாதி. கே.எஸ். அப்துல் ஜப்பார், கே.எஸ். அப்துல் ரஷீத் ஆகியோர் அவரது சகோதரர்கள். இவரது திருமணம் 1950ஆம் ஆண்டு நடைபெற்றது. துணைவியார் பெயர் கைருன்னிஸா இவரது திருமணத்தில் கண்ணியத்திற்குரிய காயிதே மில்லத் இஸ்மாயில் சாகிப், எம்.எஸ்.அப்துல் மஜீத் சாகிப், எம்.எஸ். ரஜாக்கான் சாகிப், தி.மு.க பொதுச் செயலாளர் பேரறிஞர் அண்ணா, நடிகர் கே.ஆர் . இராமசாமி, ஆர்.எம்.வீரப்பன் ஆகிய தலைவர்களும் முஸ்லிம் லீகின் முன்னணிப் பிரமுகர்களும் கலந்து கொண்டு வாழ்த்து தெரிவித்தனர். ஜானி சாகிப் - கைருன்னிஸா தம்பதியினருக்கு ஜஹாங்கீர், ஷாஹின்ஷா என்ற இரு மகன்களும், குல்ஷாத், சமீம் பானு, மம்லா, சகீலா என்ற நான்கு மகள்களும் உண்டு.
முடிவுரை:
சிறந்த சமுதாய ஊழியராகத் திகழ்ந்த ஜானிபாய் 19.7.1988 அன்று காலமானார். சமுதாய ஊழியர் என்று பொருள்படும் ‘காதிமே மில்லத்’ என அவரை கட்சியினர் அழைத்துப் பெருமைப்படுத்தினர். கண்ணியத்திற்குரிய காயிதேமில்லத் அவர்களுக்குப் பிறகு மிக நீண்ட காலம் தொடர்ந்து மக்கள் மன்றத்தில் பிரதிநிதியாகயிருந்த ஒரே முஸ்லிம் லீக் தலைவர் என்ற பெருமையும் அவருக்கு உண்டு. கொள்கையில் உறுதியும். லட்சியப் பிடிப்பும் கொண்டவராக அவர் திகழ்ந்தார். அவரது சமுதாயப் பணிகள் என்றென்றும் நினைவு கூறப்படும் என்பது உறுதி.
நன்றி:
ஜானி சாகிப் குறித்த தகவல்களை அளித்த முஸ்லிம்லீக் தலைமை நிலையப் பேச்சாளர் வேலூர் V.S. பஸ்லுல்லாஹ் மற்றும் திருச்சி நகர முஸ்லிம் லீக் செயலாளர் ஹுமாயூன் ஆகியோருக்கு.
கட்டுரையாளருடன் தொடர்பு கொள்ள ... 99767 35561

வெள்ளிக்கிழமை, 27 ஏப்ரல் 2018 12:40

அரசியலுக்காக நடக்கும் அரக்கத்தனமான போர்

Written by

                                                                                                                                                                              அ. முஹம்மது கான் பாகவி
அரசியல் பதவி என்று வந்துவிட்டாலே, மனிதன் அரக்கன் ஆகிவிடுகிறான். ஈவு, இரக்கம், அன்பு போன்ற மென்மையான மனிதப் பண்புகளுக்கு அரசியலில் இடமிருப்பதில்லை. பதவிச் சுகம் ஒன்று மட்டுமே இலக்காகிவிட்ட மனிதன், மிருகத்தையும்விடக் கேவலத்திலும் கேவலமான பிறவியாகிப்போகிறான். இது, இன்றல்ல; நேற்றல்ல. நாடு, நகரம் என்ற அமைப்பு தோன்றிய நாள் முதலாய் இந்த வெறித்தனம் மனிதனிடம் குடிகொண்டுவிட்டது.
இஸ்லாமியத் தரவுகளில் இடம்பெறும் ‘ஷாம்’ தேசம் என்பது, இன்றைய சிரியா, பாலஸ்தீனம், ஜோர்டான், லெபனான் முதலான மத்திய கிழக்கு நாடுகளை உள்ளடக்கிய ஐக்கிய அரபு நாட்டின் பெயராக விளங்கியது. அதன் பெரும் பகுதி இன்றைய சிரியாவில் அடங்கியிருப்பதால், ‘ஷாம்’ என்றாலே ‘சிரியா’தான் எனப் பெயராகிப்போயிற்று. ஒரு லட்சத்து 85 ஆயிரத்திற்கும் அதிகமான சதுர கி.மீ. பரப்பளவைக் கொண்ட சிரியா, 1 கோடிக்கும் அதிகமான மக்கட்தொகையைக் கொண்ட செழிப்பான நாடாகும்.
சிரியா தலைநகர் டமாஸ்கஸ் (திமஷ்க்), ‘பூவுலகச் சொர்க்கம்’ எனும் பெயர் பெற்றது. அந்த அளவிற்கு அந்நகரம் கட்டமைப்பு, அழகு, பசுமை, கனிவகைகள், தூய்மை, நீர்வளம், வசதிகள் ஆகியன நிறைந்த பூமியாகும். ஹலப், ஹிம்ஸ் (அல்லது ஹும்ஸ்), லாதிகிய்யா, தைருஸ் ஸூர், அல்ஃகூ(த்)தா ஆகியன சிரியாவின் முக்கிய நகரங்களாகும். தோட்டங்கள் நிறைந்த ‘அல்ஃகூத்தா’ நகரம்தான், தற்போது கடுமையான தாக்குதலுக்கு உள்ளாகியிருக்கிறது.
தற்போதைய சிரியா
சிரியா நாட்டில் அரபியரே பெரும்பான்மையினர் ஆவர். அரேபிய முஸ்லிம்களில் சன்னி பிரிவினர், சலஃபிகள், ஷியாக்கள், ஷியாக்களிலேயே தற்போது மூர்க்கத்தனமாக சன்னிகளைக் கொன்று குவிக்கும் ‘அலவி’கள் ஆகியோர் உள்ளனர். கிறித்தவர்கள், யூதர்கள் ஆகியோரும் சிறுபான்மையினராக அங்கு வசிக்கின்றனர். கிரேக்கர்கள், ஆர்மீனியர்கள், குர்துகள் எனப் பல்வேறு இனத்தாரும் அங்கு வாழ்கிறார்கள்.
சிரியா நாட்டின் வருமானத்தில் நாற்பது விழுக்காடு எண்ணெய் ஏற்றுமதிமூலம் கிடைத்துவந்தது. உள்நாட்டு போருக்குப்பின் கடனாளியாக மாறிவிட்டது சிரியா. எண்ணெய் ஏற்றுமதி மூன்றில் இரு மடங்கு குறைந்துவிட்டது. சுற்றுலாத்துறை மூலம் இருபது விழுக்காடு வருவாய் கிடைத்துவந்த நிலையில், இப்போது அத்துறையே படுத்துவிட்டது.
நாட்டு மக்களில் முப்பது விழுக்காட்டினர் ஏழைகளாகிப் போனார்கள். 11.4 விழுக்காட்டினர், வறுமைக் கோட்டிற்குக் கீழே தள்ளப்பட்டுவிட்டனர். குழந்தைகளும் கையில் துப்பாக்கிகளுடன் சுற்ற வேண்டிய கொடுமைக்குத் தள்ளப்பட்டுள்ளனர்.
உள்நாட்டுப் போரில் 2013இல் மட்டும் ஒரு லட்சத்துக்கும் அதிகமானோர் மாண்டுபோயினர். அவர்களில் 11ஆயிரம் பேர் குழந்தைகள் என்பது கொடுமையின் உச்சம். அண்மையில் 11 நாட்களில் 602பேர் இறந்துபோனதில், 185பேர் குழந்தைகள், 109பேர் பெண்களாம்!
சிரியாவில் என்னதான் நடக்கிறது?
சிரியாவில் நடக்கும் அரக்கத்தனமான போருக்குக் காரணமே அதிகாரப் போட்டிதான். சண்டாளன் ஃபிர்அவ்னைப் போன்ற ஒருவன் அங்கே ஆட்சியில் அட்டைபோல் ஒட்டிக்கொண்டிருக்கின்றான். அவன் பெயர் பஷ்ஷார் அல்அசத். ஷியா பிரிவினனான இவன், மக்களின் செல்வாக்கை இழந்தவன். இந்த அரக்கன் ஆட்சியிலிருந்து வெளியேற வேண்டும் என்பது பெரும்பான்மை சிரியர்களின் வேட்கை. அதற்காகப் பலர் உயிரைக் கொடுத்துப் போராடிவருகின்றனர். இந்தப் போராட்டம் 11 ஆண்டுகளாக நீடிக்கிறது.
2011ஆம் ஆண்டு மத்திய கிழக்கில் தோன்றிய ‘அரபு வசந்தம்’ எழுச்சியின் ஒரு பகுதியே சிரிய மக்களின் இந்தப் போராட்டமும். அரபு நாடுகள் பலவற்றில் மக்களால் தேர்ந்தெடுக்கப்பட்ட ஆட்சியாளர்கள் இல்லை. சர்வாதிகார மன்னர் ஆட்சியே அங்கே கோலோச்சுகிறது. நாட்டு வளங்களை, ஆட்சியாளர்களின் குடும்பங்கள் சுரண்டுகின்றன. வேலையில்லாத் திண்டாட்டம் தலைவிரித்தாடுகிறது. விலைவாசி உயர்வு திணறடிக்கிறது. எதிர்த்தால் அடக்குமுறை கட்டவிழ்த்துவிடப்படுகிறது.
இக்கொடுமைகள் எல்லை தாண்டியதால் தன்னெழுச்சியாக மக்கள் ஒன்றுதிரண்டு போராட்டங்களில் ஈடுபட்டனர். இவ்வாறு சிரியா, எகிப்து, துனீசியா, யமன், லிபியா, பஹ்ரைன் முதலிய நாடுகளில் மக்களின் எழுச்சிப் போராட்டங்கள் வெடித்தன. சிரிய அதிபர், ராணுவத்தைக் கொண்டு போராட்டங்களை நசுக்கிவருகிறார். கிளர்ச்சியாளர்கள் பிரிந்து சிதறிக் கிடப்பதுதான், அசதுக்கு வசதியாகப் போனது.
அதிபரை எதிர்க்கும் எதிர்க்கட்சிகளின் ஆதரவுப் படை ஒருபக்கம்; அமெரிக்க ஆதரவுடன் குர்து இன மக்கள் மற்றொரு பக்கம்; ஐ.எஸ் என்ற நயவஞ்சகர் கூட்டம் இன்னொரு பக்கம். இப்படி இவர்கள் சிதறிக்கிடக்க, சர்வாதிகாரி அசதுக்கு ஆதரவாக ஈரானும் ரஷியாவும் சீனாவும் ஆதரவுக் கரம் நீட்டி, இராணுவப் படைகளை அனுப்பி சிவிலியன்களைக் கொத்துக்கொத்தாகக் கொன்று குவித்துவருகின்றன.
தங்களை சன்னி முஸ்லிம்கள் என்று சொல்லிக்கொள்ளும் ஐ.எஸ். முனாஃபிக் படைகள், ரஷியாவையோ சீனாவையோ ஈரானையோ அசதையோ தைரியமாக எதிர்கொண்டு தாக்குதல் தொடுத்திருக்க வேண்டுமா, இல்லையா? ஷைத்தான்கள் அவ்வாறு செய்யவில்லை. இதிலிருந்து அவர்கள் வேஷம் -முகமூடி கிழிந்துபோயிருப்பதுதான் உண்மை. இவர்களை ‘அறப்போராளிகள்’ என்று நம்பி, இவர்கள் விரிக்கும் வலையில் சிக்கிக்கொள்ளும் நல்ல இளைஞர்களின் நிலைதான் பரிதாபத்திற்குரியது.
அமெரிக்காவும் ரஷியாவும், ஏன் சீனாவும்கூட பிணம் தின்னும் கழுகுகள் என்பது உலகறிந்த உண்மை. எங்காவது உள்நாட்டுச் சண்டை மூளாதா? அடித்துக்கொள்ளும் இரு கோஷ்டிகளில் ஒன்றுக்கு ஆதரவு என்ற பெயரில், அவர்கள் அழைத்தோ, அல்லது அழைக்கவைத்தோ உள்ளே புகுந்து, அந்நாட்டு மக்களை வேட்டையாடி, ஆதரவு கோரிய கைகளில் ஆயுதங்களை விற்றுக் காசாக்கி, போர் நடக்கும்போதும் நடந்தபின்பும் அந்நாட்டின் வளங்களை அனுமதியோடு கொள்ளையடித்துக் கேவலமான பிழைப்பு பிழைப்பதே அவர்களின் வாடிக்கை!
ஈரானுக்கு என்ன வந்தது? இஸ்லாத்தில் ஒரு பெரும் கரும்புள்ளியாகத் தோன்றி, அன்று முதல் இன்றுவரை மார்க்கத்தின் தனித்தன்மையைச் சீரழித்து, எதிரிகளுக்கு வால் பிடித்து, பெரும்பான்மை முஸ்லிம்களை எதிர்ப்பதும், அவர்கள் மத்தியில் மோதல்களை உருவாக்கிக் குளிர் காய்வதும், நேரத்திற்கேற்ப நண்பர்களை மாற்றிக்கொண்டு பொதுஜனத்திற்குக் கொள்ளிவைப்பதும்தான் ஈரானியரின் குருதிக் குணமாகவே இருந்துவருகிறது.
அகண்ட பாரசீகத்தை உருவாக்கும் கனவில் மிதக்கும் ஈரான், தன் ஆட்களை விட்டு, முஸ்லிம் நாடுகளில் குழப்பம் விளைப்பதையே தொழிலாகக் கொண்டிருக்கிறது. சரியான ஈமானை என்றைக்கு அவர்கள் அடைமானம் வைத்துவிட்டு, யூதனான இப்னு சபாவைப் பின்பற்றத் தொடங்கினார்களோ அன்றைக்கே இச்சமுதாயத்தினர் விஷச் செடியாக மாறிவிட்டார்கள்.
அவர்களின் பிள்ளைதான் இந்த அசது எனும் கொடுங்கோலன். ஹிஸ்புல்லாஹ் என்ற ஷியா அமைப்பு லெபனானிலிருந்து தம் ஆட்களைத் திரட்டி சிரியாவுக்கு அனுப்பி, அசதைக் காப்பாற்றத் துடிக்கிறது. ஈரான் தன் நாட்டிலிருந்து மட்டுமன்றி, இராக், யமன் போன்ற நாடுகளிலிருந்தும் ஷியா துருப்புகளை சிரியாவுக்கு அனுப்பி அசதைத் தூக்கி நிறுத்த அலைகிறது.
நம் முன்னுள்ள கேள்வி
அக்கம்பக்கத்தில் உள்ள முஸ்லிம் நாடுகள் என்ன செய்கின்றன என்பதுதான் நம் முன்னுள்ள விடை தெரியாத வினாவாக உள்ளது. துருக்கியைத் தவிர, யாரும் வாய் திறந்ததாகத் தெரியவில்லையே! கொடுங்கோலன் அசதை எதிர்த்துப் போராடிவரும் படைகளுக்கும் போராளிகளுக்கும் அவர்கள் என்ன துணை செய்தார்கள்?
ஒன்று, சிரிய அரசுக்கும் போராளிகளுக்கும் இடையே சமாதானம் செய்து, பெரும்பான்மை மக்களின் எதிர்பார்ப்புக்கிணங்க நியாயமான தேர்தல் நடத்தி, வெல்வோர் ஆள்வதற்கு வகை செய்ய வேண்டும். அரசைப் பணியவைக்க ஐ.நா.வையோ, அமெரிக்காவையோ, வேறு உகந்த நாடுகளையோ ஏன் அணுகக் கூடாது?
இல்லையா? அரசுக்கெதிரான கட்சிகளையும் படைகளையும் ஒன்றிணைத்து, வேண்டிய எல்லா வகையான உதவியையும் ஒத்துழைப்பையும் அளித்து, சனியனை விரட்டியடிக்க கைகோக்க வேண்டுமா, இல்லையா?
எங்களுக்கென்ன? நாங்கள் பாதுகாப்பாக இருக்கிறோம் என்று எண்ணி, கண்ணை மூடிக்கொண்டால், உங்கள் நாட்டிலும் ஒரு ஃபிர்அவ்ன் தோன்றமாட்டான் என்பதற்கு என்ன உத்தரவாதம்? அப்படி தோன்றிவிட்டால், உங்களைக் காக்க மற்ற முஸ்லிம் நாடுகள் முன்வருமா? இப்படி எதையாவது யோசித்தார்களா என்று நமக்குத் தெரியவில்லை.
உண்மையைச் சொல்வதானால், வளைகுடா நாடுகள் அமெரிக்காவின் அடிமைகள் என்றும் எடுபிடிகள் என்றும் மக்கள் மனதில் பதிந்துவிட்ட கருத்து உண்மையோ என எண்ணத் தோன்றுகிறது. சகோதரச் சண்டையில் ருசி கண்டு, எதிரியின் ஆயுதக் கிடங்கிற்குச் சந்தையாகச் செயல்படும் சொத்தைகளா அவர்கள்? அந்த ஆயுதங்களை உற்பத்தி செய்யவோ, அறிவியல் கண்டுபிடிப்புகளில் ஈடுபடவோ திராணியற்றவர்கள்தானே!
பிற மத்தியக் கிழக்கு நாடுகளை எடுத்துக்கொண்டால், அங்கேயும் உட்பூசல்களையும் அரசியல் எதிரிகளையும் சமாளிக்கவே நேரம் இல்லாமல் திகைப்பவர்கள்; நாட்டை முன்னேற்றப்படுத்த வக்கில்லாமல், இறைவன் கொடுத்த இயற்கை வளங்களைத் தின்று தீர்த்து, அனுபவித்து, ஆடம்பரத்தில் இன்பம் காணும் உல்லாசப் பிரியர்கள்.
மொத்தத்தில், கனடா நாட்டுக்காரனுக்கு ஏற்பட்ட இரக்கம்கூட இல்லாத கல்நெஞ்சர்கள் இவர்கள் என்றுதான் சொல்ல வேண்டியுள்ளது.
இறுதியாக, இறைவா!
இறுதியாக, இறைவா! உன்னிடம் கையேந்துவதைத் தவிர, வேறு வழி எங்களுக்குத் தெரியவில்லை. குண்டு துளைத்த இளங்குருத்துகளைப் பார்க்கும்போது, எங்கள் நெஞ்சம் வெடித்துவிடும்போல் தெரிகிறது. எங்கள் முஸ்லிம் அன்னையரின், அடுக்கிவைக்கப்படும் ஜனாஸாக்களைக் காணும்போது உண்மையிலேயே துடித்துப்போகிறோம்.
தந்தையின் பிணத்திற்கருகே அமர்ந்துகொண்டு, அவர் தலையைத் தொட்டுக் கதறும் பச்சிளம் குழந்தையைக் கண்டு கண்ணீர் வடிப்பதைத் தவிர எங்களால் ஒன்றும் செய்ய முடியவில்லையே! தான் பெற்ற செல்வத்தின் இரத்தம் தோய்ந்த உடம்பைத் தூக்கிக்கொண்டு ஓடும் பெற்றோரைப் பார்த்தும் ஆறுதல்கூட சொல்ல முடியாத அபலைகளாகிவிட்டோமே நாங்கள்!
இறைவா! எங்களை மன்னித்துவிடு! எங்கள் இயலாமையை மறந்துவிடு! அந்த அப்பாவி மக்களுக்குக் கருணை செய்! அந்நாட்டில் அமைதியைக் கொண்டுவா! கொடுங்கோலனைக் கொளுத்திவிடு! நல்லாட்சியைக் கொண்டுவா!
வேறு என்ன சொல்ல முடியும் எம்மால்?

செவ்வாய்க்கிழமை, 24 ஏப்ரல் 2018 07:22

வீதிக்கு வந்த நீதிபதிகள்-3

Written by

உச்சநீதிமன்ற தலைமை நீதிபதி தீபக் மிஸ்ரா நீதிபதிகளில் ஆள் பார்த்து வழக்குகளை ஒதுக்குகிறார் என்பது தான் மூத்த நான்கு நீதிபதிகள் தலைமை நீதிபதி மீது வைத்த குற்றச்சாட்டு.குறிப்பான வழக்குகளை நீதிபதி அருண் குமார் மிஸ்ரா அமர்வுக்கு ஒதுக்கியதாக கூறப்படுகிறது.சி.பி.ஐ நீதிமன்ற நீதிபதி பி.எச்.லோயாவின் மர்ம மரணம் தொடர்பான வழக்கு அருண் குமார் மிஸ்ரா அமர்வுக்கு தீபக் மிஸ்ரா ஒதுக்கி தந்தார்.இந்த பி.எச்.லோயா போலி எண்கவுண்டரில் கொலை செய்யப்பட்ட சொராபுதீன் ஷேக் வழக்கை நடத்தி வந்தார்.சொராபுதீன் ஷேக் கொலை வழக்கில் ஆளும் கட்சியான பாஜகவின் தேசிய தலைவர் அமித் ஷா குற்றம் சாட்டப்பட்டு இருந்தார்.

அருண் குமார் மிஸ்ரா விசாரித்த மற்றொரு முக்கியமான வழக்கு சகாரா-பிர்லா நிறுவனத்தில் கைப்பற்றப்பட்ட ஆவணங்கள் தொடர்பான வழக்கு. அரசியல்வாதிகள்,நீதிபதிகள் உள்ளிட்ட சக்திமிக்க நபர்களுக்கு லஞ்சம் கொடுத்தது தொடர்பான அந்த ஆவணங்கள் சகாரா குரூப் மற்றும் ஆதித்யா பிர்லா குரூப் அலுவலகங்களில் இருந்து கைப்பற்றப்பட்டன.அந்த ஆவணங்களில் பிரதமர் நரேந்திர மோடி மற்றும் மத்தியப் பிரதேச மாநில முதலமைச்சர் சிவராஜ் சிங் சௌகான் ஆகியோர் பெயரும் அந்த பட்டியலில் இருப்பதாகவும் கூறப்பட்டது.பின்னர்இந்த வழக்கு தள்ளுபடி செய்யப்பட்டது.

அருண் குமார் மிஸ்ரா விசாரித்த மற்றொரு வழக்கு ஏர்செல் மேக்ஸிஸ் ஒப்பந்தம் சம்பந்தமான வழக்கு.தலைமை நீதிபதி தீபக் மிஸ்ரா தன்னை அந்த வழக்கில் இருந்து விடுவித்து கொண்டு அருண் குமார் மிஸ்ராவிடம் ஒப்படைத்தார்.மருத்துவ கல்லூரிகள் நீதிபதிகளுக்கு லஞ்சம் கொடுத்ததாக குற்றம் சாட்டி அதன் மீது விசாரணை வேண்டும் என்று போடப்பட்ட வழக்கை தள்ளுபடி செய்து உத்தரவு போட்ட அமர்விலும் அருண் குமார் மிஸ்ரா இடம் பெற்றார்.தலைமை நீதிபதி தீபக் மிஸ்ராவும் நீதிபதி அருண் குமார் மிஸ்ராவும் ஜபல்பூர்(மத்திய பிரதேசம்) நீதிமன்றத்தில் ஏறக்குறைய பத்து வருடங்கள் ஒன்றாக பணி செய்தவர்கள்.ஒருவரை ஒருவர் நன்கு அறிந்துள்ளவர்கள்.

மிஸ்ரா, மத்திய பிரதேச உயர்நீதிமன்றத்தில் (ஜபல்பூர்) 1999 ஆம் ஆண்டு நீதிபதியாக நியமனம் செய்யப்படுவதற்கு முன்பாக சொந்த ஊரான குவாலியரில் 21 ஆண்டுகள் வழக்கறிஞராக பணியாற்றினார்.ஜிவாஜி பல்கலைகழகத்தில் ( Jivaji University) மிஸ்ரா ஆசிரியராக பணிபுரிந்து இருக்கிறார்.இந்திய பார் கவுன்சிலுக்கு இளம் வயதில் தலைவராக இருந்தவர்.மிஸ்ரா ராஜஸ்தான் மாநில உயர்நீதிமன்றத்துக்கு தலைமை நீதிபதியாக நவம்பர் 2010 லும்,கொல்கத்தா உயர்நீதிமன்றத்துக்கு தலைமை நீதிபதியாக டிசம்பர் 2012 லும் நியமனம் செய்யப்பட்டார்.

நீதிபதி பொறுப்பேற்றது முதல் மிஸ்ரா மொத்தம் 97,000 வழக்குகளை முடித்து வைத்திருக்கிறார்.தீபக் மிஸ்ரா கடும் நேர்மை கொண்டவர் என்று தான் நீதித்துறை வட்டாரத்தில் பெயரெடுத்தவர்.துர்க்கா தேவியை வழிபடும் நீதிபதி மிஸ்ரா கடும் பக்தி உணர்வு கொண்டவர்.வருடம் தோறும் 9 நாட்கள் நவராத்திரி விரதத்தைக் கடைபிடித்து குவாலியரில் இருந்து 70 கிலோ மீட்டர் தொலைவில் உள்ள தாட்டியாவில் இருக்கும் பீத்தாம்பர பீத் கோவிலில் சில மணி நேரங்கள் செலவிடுவார் என்றெல்லாம் அவரைப் பற்றி கூறப்படுகிறது.

தீபக் மிஸ்ரா குடும்பம் முழுவதும் இந்திய நீதித்துறையோடு தொடர்பு உடையது.கவிஞருமான மிஸ்ரா ஒடியா குடும்பத்தை சேர்ந்தவர்.இவரது தாய் வழி பாட்டனார் ஒடியா மொழியில் புகழ்பெற்ற கவிஞர்.இந்து மத இதிகாசங்களில் இருந்தும் மேற்கத்திய இலக்கியங்களில் இருந்தும் மேற்கோள் காட்டக் கூடியவர்.இவரது தந்தை ஹர்கோவிந்த் மிஸ்ரா மத்தியப் பிரதேச மாநில ஜபல்பூர் உயர்நீதிமன்ற நீதிபதியாக பணி புரிந்தவர்.இவரது சகோதரி மகன் விஷால் மிஸ்ரா மத்தியப்பிரதேச உயர்நீதிமன்ற குவாலியர் கிளையில் கூடுதல் தலைமை வழக்கறிஞராக பணி புரிகிறார்.

மற்றொரு மருமகன் ஜே.பி.மிஸ்ரா மத்தியப்பிரதேச மாநில பார் கவுன்சிலில் உறுப்பினராக உள்ளார்.மிஸ்ராவின் மகள் தீக்‌ஷா மிஸ்ரா தில்லி உயர்நீதிமன்றத்தில் வழக்கறிஞராக இருந்து வருகிறார்.இந்திய உச்சநீதிமன்றத்தின் 21 வது தலைமை நீதிபதியான ரங்கனாத் மிஸ்ரா இவரது தாய்வழி மாமன் ஆவார்.இந்த ரங்கனாத் மிஸ்ரா தலைமையில் அமைந்த ஆணையம் தான், ‘இந்திய சிறுபான்மையோருக்கு 15 விழுக்காடு இட ஒதுக்கீடும் அதில் 10 விழுக்காடு முஸ்லிம்களுக்கும் வழங்க வகையாக இந்திய அரசியலமைப்பு சட்டத்தில் திருத்தம் கொண்டுவர வேண்டும்’ என்று இந்திய நாடாளுமன்றத்துக்கு அறிக்கை சமர்ப்பித்தது.

மத்திய பிரதேசத்தில் பாஜக ஆட்சிக்கு வந்த போது தீபக் மிஸ்ராவின் மாமா ஷியாம் பிகாரி அரசு கூடுதல் வழக்கறிஞராக செயல்பட்டு வந்தார். பாஜகவில் உறுப்பினராக இருந்த ஷியாம் பிகாரி கட்சி பணிகளில் தீவிரமாக ஈடுபட்டு வந்தார்.மத்தியப் பிரதேச சட்டமன்ற தேர்தலில் பாஜக சார்பில் போட்டியிட்டு காங்கிரஸ் வேட்பாளரிடம் தோற்றுப் போனார்.இரண்டாண்டுகள் முன்னர் ஷியாம் பிகாரி இறந்து போனார்.முதல்வர் சௌகான் அவரது வீட்டிற்கு சென்று ஆறுதல் கூறினார்.மிஸ்ரா மருமகன்கள் திருமண வரவேற்பு நிகழ்ச்சிகளிலும் சௌகான் கலந்து கொண்டு சிறப்பித்து இருக்கிறார்.

மிஸ்ராவின் தாயார் சரஸ்வதி தேவி ஏப்ரல் 2012 ல் இறந்த போது ஆறுதல் கூற முதல்வர் சௌகான் மிஸ்ரா வீட்டிற்கு சென்றார்.அப்போது மிஸ்ரா ராஜஸ்தான் உயர்நீதிமன்றத்தின் தலைமை நீதிபதியாக இருந்தார்.அந்நேரம்,ராஜஸ்தான் மாநில முதலமைச்சராக இருந்த அசோக் கெல்லெட்டும் இறுதி ஊர்வலத்தில் மிஸ்ராவுடன் பங்கேற்றார்.இவ்வாறாக,தலைமை நீதிபதி மிஸ்ரா தற்போதுள்ள மத்திய பாஜக அரசுக்கு சாதகமாக தலைமை நீதிபதி மிஸ்ரா செயல்பட இவ்வாறான உறவுகள் காரணம் என்று அவரை விமர்சனம் செய்பவர்கள் கூறுகிறார்கள்.மூத்த நீதிபதிகளுக்கும் ஆட்சியாளர்கள் மற்றும் அரசியல்வாதிகளுக்கும் இடையில் நட்புறவு இயல்பாகவே உண்டாகும்.இதை வைத்துக்கொண்டு மிஸ்ராவை குற்றம்சாட்டக் கூடாது என்ற கருத்தும் இருக்கிறது.

மிஸ்ரா கொல்கத்தா உயர்நீதிமன்ற தலைமை நீதிபதியாக இருந்த சமயம் உச்சநீதிமன்றத்துக்கு உயர்த்த மூன்று முறை முயற்சி நடந்தது.ஆனால்,2014 ஜூலையில் தான் மிஸ்ரா உச்சநீதிமன்ற நீதிபதியாகவும் வாய்ப்பு வந்தது.2017 ஆகஸ்ட் 28 ல் மிஸ்ரா இந்திய உச்சநீதிமன்றத்துக்கு தலைமை நீதிபதியாக உயர்வு பெற்றார்.பாரம்பரியத்தின் மீது உறுதியான நம்பிக்கை கொண்டவர் என்ற புகழுரையுடன் தலைமை நீதிபதியானார்.நீதிமன்றம் தடையில்லாமல் இயங்க புதிய முடிவாக தன் உள்ளுறையில் சில சமரசங்கள் செய்து கொண்டார் என்றும் கூறப்பட்டது.மிஸ்ரா மரபுகளை மீறி செயல்படுவதாக பதவியேற்ற சில மாதங்களிலேயே குற்றம்சாட்டப்பட்டார்.

இவருக்கு முன் தலைமை நீதிபதியாக இருந்த ஜே.எஸ்.கெஹர் எளிதில் கோபப்படக் கூடியவர்.குரலை உயர்த்தி பேசக்கூடியவர்.மிஸ்ரா நேர் மாற்றமாக அமைதியாக பேசும் இயல்பு கொண்டவர்.வழக்கறிஞர்களுக்கும்,மனுதாரர்களுக்கும் சற்று கால ஓய்வு வழங்குவார்.குடி மக்களின் நீதிபதி என்று பெயரெடுத்தவர் என்றும் மிஸ்ரா பற்றி நல்ல அபிப்ராயங்கள் உள்ளன.அவதூறு சட்டத்தை உயர்த்தி பிடித்தது,மும்பையில் நடைபெற்று வந்த நாட்டிய அரங்குகளுக்கு(dance bars) போட்டிருந்த தடையை ரத்து செய்து உத்தரவு இட்டது ஆகிய தீர்ப்புகள் பலரையும் திரும்பி பார்க்க வைத்தது.சினிமா அஅரங்குகளிலும் தேசிய கீதம் கட்டாயம் பாட வேண்டும் என்று இவர் போட்ட உத்தரவு உடனடியாக விமர்ச்சனம் செய்யப்பட்டது.ஆளும் வர்க்கத்தின் தேசியவாத கொள்கைக்கு நீதிபதி மிஸ்ராவும் பலியாகி விட்டார் என்றும் கூறப்பட்டது.

உச்சநீதிமன்றத்தின் தலைமை நீதிபதியாக மிஸ்ரா நியமனம் செய்யப்பட்டதில் கூட லஞ்ச புகார் கூறப்பட்டது.தற்கொலை செய்து கொண்ட அருணாச்சல பிரதேச முன்னாள் முதலமைச்சர் கலிக்கோ புல் எழுதி வைத்த தற்கொலை குறிப்பில் கூட மிஸ்ரா பெயர் இருந்ததாக கூறப்பட்டது.இந்த குற்றச்சாட்டு மேலும் தொடர்ந்து பயணிக்க இயலவில்லை.ஆனால்,இப்போது,மூத்த நான்கு நீதிபதிகள் விமர்ச்சனம் வைத்த பிறகு மிஸ்ரா தனது நம்பகத்தன்மையை மீட்டெடுக்க வேண்டிய கட்டாயத்துக்கு தள்ளப்பட்டு விட்டார்.மிக முக்கியமாக,நீதித்துறையின் நம்பகத்தன்மையை மிஸ்ரா கட்டாயம் மீட்டு எடுக்க வேண்டிய இடத்தில் இருக்கும் தலைமை நீதிபதி மிஸ்ரா 2020 செப்டம்பரில் தான் ஓய்வு பெறுகிறார்.

நீதிபதி செல்லமேஸ்வர்:
தலைமை நீதிபதி மிஸ்ராவுடன் நேரெதிரில் மல்லுக்கு நிற்கும் மூத்த நீதிபதி ஜஸ்தி செல்லமேஸ்வர்ர்.இந்திய உச்சநீதிமன்றத்துக்கும் உயர் நீதிமன்றங்களுக்கும் நீதிபதிகளை பணி நியமனம் செய்யும் கொலிஜியம் செயல்பாட்டை கடுமையாக விமர்சனம் செய்தவர்.தேசிய நீதிபதிகள் நியமன ஆணையம் 2015 ல் கொண்டுவரப்பட்ட போது,அதனை உச்சநீதிமன்றம் தன்னேற்பு(Suo Motto) வழக்காக எடுத்து விசாரணை செய்து தள்ளுபடி செய்தது.5 நீதிபதிகள் இடம்பெற்ற அமர்வில் 4 நீதிபதிகள் தேசிய நீதிபதிகள் நியமன ஆணையத்தை எதிர்த்து தீர்ப்பளித்த போது ஜஸ்தி செல்லமேஸ்வர்ர் மட்டும் ஆதரித்து தீர்ப்பு வழங்கினார்.

ஆந்திரா மாநிலத்தை சேர்ந்த நீதிபதி செல்லமேஸ்வர் அஸ்ஸாம் மற்றும் கேரள மாநில உயர்நீதிமன்றங்களில் தலைமை நீதிபதியாக பணிபுரிந்தார்.தெலுங்கு இலக்கியத்தில் ஆர்வம் கொண்டவர்.மருத்துவ கல்லூரிகள் உச்சநீதிமன்ற நீதிபதிகளுக்கு லஞ்சம் கொடுத்ததாக நவம்பர் 2017 ல் வந்த ஒரு வழக்கை நீதிபதி அருண் குமார் மிஸ்ராவுக்கு தலைமை நீதிபதி தீபக் மிஸ்ரா ஒதுக்கீடு செய்த வகையில் தான் செல்லமேஸ்வர் தீபக் மிஸ்ரா உடன் முரண்பட்டார.மரண தண்டனை பெற்ற குற்றவாளிகள் போட்ட மனுவை விசாரிக்க ஓபன் கோர்ட்டை நிறுவ வேண்டும் என்று விசாரணை அமர்வின் பெரும்பான்மையான நீதிபதிகள் கூற அவர்களுடன் செல்லமேஸ்வர் முரண்பட்டார்.

தனி மனிதனின் அந்தரங்கம் அடிப்படை உரிமையா என்பதை ஆராய்ந்து முடிவு செய்ய ஆதார் வழக்கை அரசியல் சட்ட முழு அமர்வுக்கு அனுப்பி வைத்தார் செல்லமேஸ்வர்.செல்லமேஸ்வர் இந்தியாவில் பல்வேறு தனிச்சிறப்பான தீர்ப்புகள் வழங்கியதை மெச்சி அக்டோபர் 14 ஐ நீதிபதி ஜஸ்தி செல்லமேஸ்வர் தினமாக 2016 ல் அமெரிக்கா அறிவிப்பு செய்தது.அதே 2016 ல் அமெரிக்காவின் நப்பர்வில்லி(Naperville) மற்றும் இல்லினாய்ஸ்(Illinois) மாகாணங்களின மேயராக கௌரவிக்கப்பட்டார்.

கே.எஸ்கெஹர் மற்றும் தீபக் மிஸ்ராவுக்கு முன்பே செல்லமேஸ்வர் உயர்நீதிமன்ற தலைமை நீதிபதியாக உயர்வு பெற்றிருந்தார்.எனினும்,2011 அக்டோபர் 10 ல் செல்லமேஸ்வரும் தீபக் மிஸ்ராவும் நீதிபதிகளாக பொறுப்பேற்றனர்.அதற்கு ஏறக்குறைய ஒரு மாதம் முன்னர் கெஹர் உச்சநீதிமன்றத்தில் நீதிபதியாக நியமிக்கப்பட்டு விட்டார்.மேலும்,தீபக் மிஸ்ராவும் செல்லமேஸ்வருக்கு முன்பு நீதிபதியாக உறுதிமொழி எடுத்து விட்டார்.அதனால், நீதிபதிகள் படி நிலையில் மிஸ்ரா செல்லமேஸ்வரை விட மூத்தவராகி விட்டார்.நீதிபதிகள் நியமனத்தை பணி மூப்பு அடிப்படையில் செய்வதை கண்டிப்புடன் பின்பற்றி இருந்தால்,2018 ஜூலையில் ஓய்வுப் பெறப்போகும் நீதிபதி ஜஸ்தி செல்லமேஸ்வர், இந்திய உச்சநீதிமன்ற தலைமை நீதிபதியாக தாக்கூருக்கு அடுத்ததாக வந்திருப்பார்.

நீதிபதிகளை நியமனம் செய்ய ஏதேச்சதிகாரம் கொண்ட கொலிஜியம் பணி மூப்பை கண்டிப்புடன் பின்பற்றாமல் போனதால் இந்தியாவின் தலைமை நீதியாகும் வாய்ப்பை செல்லமேஸ்வர் இழந்துள்ளார்.அதன் காரணமாகவே கொலிஜியம் அதிகாரத்தை முடிவுக்கு கொண்டு வரும் நீதிபதிகள் நியமன தேசிய ஆணையத்துக்கு செல்லமேஸ்வர் தார்மீக ஆதரவு அளித்திருந்தார்.கொலீஜியம் கூட்டங்களில் கலவாமல் விலகி வந்தார்.நீதிபதிகள் நியமனத்தில் கூட நேர்மை தப்பிவிடுகிறது என்பதற்கு செல்லமேஸ்வர் அனுபவம் ஒரு உதாரணம்.தலைமை நீதிபதியாகும் தகுதியுடைய ஒருவர் அந்த அங்கீகாரத்தை நிர்வாக முறைகேடுகள் வழியாக இழக்கிறார் என்பது மன்னிக்க கூடியதாக இல்லை........தொடரும்....

சோழ மன்னர்களின் கடற்கரைப் பட்டினங்கள் பலவாக இருந்தாலும் அவற்றில் மூன்று பட்டினங்கள் முக்கியமானவை. அவை காவிரிபூம்பட்டினம், அதிராம்பட்டினம், நாகப்பட்டினம் ஆகும்.
திருநாகை என்றும் நாகை காரோணம் என்றும் பழந்தமிழ் இலக்கியங்கள் நாகப்பட்டினத்தைச் சிறப்பித்துக் கூறுகின்றன. நாகர் என்ற காட்டு மக்கள் ஒரு காலத்தில் வாழ்ந்ததாகவும் நாகஅரசன் ஒருவன் அவர்களை ஆண்டதாகவும் சிலர் கூறுகின்றனர்.
ஆதி காலத்தில் இப்பகுதி ‘புன்னாக வனம்’ என அழைக்கப்பட்டது. புன்னை மரத்தின் மறேறொரு பெயர் நாகமரம். எனவே நாகமரங்கள் சூழ்ந்திருந்த ஊர்கள் நாகப்பட்டினம், நாகூர் என ஆனதாம். அதன் காரணமாக நாகை, நாகூர் என ஊர்ப் பெயர்கள் அமைந்ததாகவும் செவி வழிச் செய்திகள் புழங்குகின்றன.
மிகப் பழமையான நகரங்களில் ஒன்று நாகப்பட்டினம். காஞ்சிபுரத்தைப் போல சமயங்களின் இருப்பிடமாகவும் விளங்கியுள்ளது நாகப்பட்டினம்.
கி.மு.மூன்றாம் நூற்றாண்டில் தொண்டி துறைமுக நகரை சமனத்தைச் சேர்ந்த இலவோன் ஆண்டதாக தரவுகள் உள்ளன. அக்கால கட்டத்தில் நாகையும் சமனர்களின் நகராக இருந்திருக்கிறது. நாகை பவுத்தர்களின் நகராக விளங்கியதற்கான தரவுகளும் உள்ளன.
பல்லவர் ஆட்சி இங்கு பரவியிருந்த காலத்தில் பழைய நாகையில் சமனத்தை பின்பற்றியோர் பலர் இருந்தனர். பார்கவநாதர் கோவில் எனும் சமன சமயக் கோவிலே இன்று பாசுபதேஸ்வரர் கோவிலாக மாறியிருப்பதாக கூறுவர். தஞ்சையைச் சேர்ந்த சில ஊர்களில் சமணக் கோவில்கள் உள்ளன.
கி.மு.மூன்றாம் நூற்றாண்டைச் சேர்ந்த பர்மா நாட்டு நூலொன்றில் நாகப்பட்டினம் பற்றிய குறிப்புகள் உள்ளனவாம். சோழர்களின் துறைமுகமாய் விளங்கிய நாகை சோழ குல வல்லிப்பட்டினம் என பெயர் பெற்றிருந்ததாம். பர்மிய வரலாற்று நூலில் நாகையில் அசோகப் பேரரசன் கட்டிய புத்தவிகாரம் பற்றிய குறிப்புகள் உள்ளனவாம். சீனப் பயணி யுவான் சுவாங் கூட இங்கிருந்த புத்த விகாரம் பற்றி குறிப்பிட்டுள்ளாராம்.
இராசராச சோழனும் அவனுக்குட்பட்ட வெளிநாட்டு அரசன் ஒருவனும் ‘சூடாமணி விக்கிரகம்’ என்ற புத்தர் கோவிலை நாகையில் கட்டியதற்கான ஆதாரங்கள் உள்ளன. பதினைந்தாம் நூற்றாண்டு வரை சூடாமணிக் கோவில் சிறந்து விளங்கியுள்ளது. ராஜராஜப்பெரும்புள்ளி, ராஜேந்திர சோழப்பெரும்புள்ளி, சோழப்பெரும்புள்ளி என புத்த விகாரங்கள் ஆங்காங்கு இருந்தன.
1856 க்கும் 1870 க்கும் இடையில் நாகை வெளிப்பாளையம் நாணயக்காரத் தெரு ஆகிய இடங்களில் 350 புத்தவிகாரங்கள் கண்டெடுக்கப்படுள்ளன. இவை 870 முதல் 1250 வரையுள்ள காலத்தவை என ஆய்வாளர்கள் கூறுகின்றனர். இங்கு கண்டெடுக்கப்பட்ட சிலைகள் கல்கத்தாவிலுள்ள இந்தியன் பொருட்காட்சிக் கூடத்தில் வைக்கப்பட்டுள்ளன.
சோழப் பேரரசின் தலைநகராகவும் பவுத்த சமயம் வேரூன்றியிருந்த பகுதியாகவும் வணிகப் பேரூராகவும் வெளிநாட்டினருக்கு தமிழ்நாட்டின் வாயிலாகவும் நாகப்பட்டினம் இருந்திருக்கிறது.
சமணம், பவுத்தம் ஆசீர்வகம், சைவம், வைனவம் ஆகிய மதங்களில் எதை வேண்டுமானாலும் பின்பற்றலாம். எதையும் பின்பற்றாமலும் இருக்கலாம். இத்தகைய நிலைமைதான் தமிழகம் முழுவதும் இருந்து வந்தது.
இந்த அழகிய நிலையை ஏழாம் நூற்றாண்டு நொறுக்கிப் போட்டது. திருஞான சம்பந்தன் எனும் சீர்காழிக்காரர் பாண்டிய அரசியையும் அரசனையும் தன் வசப்படுத்தி சமணர்களைக் கழுவிவேற்றிய காலகட்டம் கறுப்பு நிலாக்காலம் சம்பந்தனின் ஆரிய சூழ்ச்சி இன்னும் கூட சரியாக அம்பலப்படுத்தப்படாமலிருக்கிறது.
எட்டாம் நூற்றாண்டில் நாகையில் பல்லவ மன்னனால் கட்டப்பட்ட பவுத்தக் கோவில் ஒன்று இருந்தது. இதைப் பற்றிய குறிப்புகள் வெளிநாட்டுப் பயணி மார்க்கோ போலோவின் நூல்களில் உள்ளன. இக்கோவிகளில் இருந்த புத்தரின் தங்கச் சிலையை திருமங்கையாழ்வார் கொள்ளையிட்டுச் சென்றுதான் திருவரங்கம் கோவிலின் நான்காவது மாடத்தைக் கட்டியதாக வரலாறு கூறுகிறது.
சமணத்தை சைவம் அழித்ததும் பவுத்தத்தை வைணவம் அழித்ததும் வரலாறாக உள்ளது. அந்த அழிவாயுதத்தை ஏந்திக்கொண்டே இப்போதும் சில வெறியர்கள் அலைகிறார்கள். கடந்தகால வரலாறு நமக்கு எச்சரிக்கையாக உள்ளது.
முற்காலத்தில் சென்னையைப் போலவே நாகையும் வளர்ந்தது. சென்னை நகரையொட்டிய பகுதிகளுக்கு அடுத்தபடியாக தென்னிந்தியாவில் ஏற்பட்ட ரயில்பாதை நாகை – தஞ்சை ரயில்பாதை. இது 1861 – இல் தொடங்கப்பட்டது. இதற்குப் பிறகே 1876 – இல் தூத்துக்குடிக்கு ரயில்பாதை அமைக்கப்பட்டது. அதுவரை நாகைத் துறைமுகம் மரக்கலங்களால் நிரம்பி வழிந்தது. தூத்துக்குடியால் நாகை சரிவைச் சந்தித்தது.
1941 வரை நாகையிலிருந்து வங்கக் கடலில் பயணித்து கல்கத்தா, ரங்கூன் வரை கப்பல்கள் போய் வந்தன. அதே சமயம் இந்துமகா கடலைத் தொட்டு அரபிக் கடலில் பயணித்து பம்பாய், கராச்சி வரையும் கப்பல்கள் சென்று வந்தன.
மதராஸிலிருந்து புறப்பட்ட எஸ்.எஸ்.ரஜுலா போன்ற பயணியர் கப்பல்கள் நாகையைத் தொட்டு சிங்கப்பூர், மலேயா வரை சென்று திரும்பின.
தமிழ்நாடு, கேரளம் கன்னடம் ஆகிய மூன்று மாநிலங்களிலிருந்து எஃகு பித்தளைப் பொருட்கள் வெண்கலப் பாத்திரங்கள் நாட்டு மருந்துகள் துணிமணிகள், பீடிப் பொதிகள், மிளகாய்ச் சிப்பங்கள் ஆகியவை நாகையிலிருந்து மலேயாவுக்குச் சென்றன.
17, 18 ஆம் நூற்றாண்டுகளில் நாகை டச்சுக்காரர்களிடம் இருந்தது. நாகை இயறகைத் துறைமுகமாக இல்லாவிட்டாலும் வையாற்றின் முகத்துவாரத்திலிருக்கிறது. கப்பல் பயணிகள் படகுகளில் சென்றே கப்பலில் ஏறினர். என்றாலும் நாகை இன்று வரை மிகப் பெரிய மீன் பிடித் துறைமுகம். கடல் வளம் காலாதி காலமாக வளர்ந்து வருகிறது.
19 ஆம் நூற்றாண்டில் நாகை வழியாகவே தஞ்சை அரிசி இலங்கைக்கு சென்றது. நாகைக்கு தெற்கேயுள்ள கோடிக்கரைக்கும் இலங்கை காங்கேசன் துறைக்கும் உள்ள தொலைவு 45 கி.மீ. பாய்மரக் கப்பலில் பயணித்தால் ஆறு மணி நேரத்தில் ஈழத்தமிழைக் கேட்கலாம்.
மூவேந்தர் காலத்திலிருந்து 1902 வரை இலங்கைக்கும் இந்தியாவுக்கும் இடையே ஆட்களும் பொருட்களும் கோடிக்கரை வழியாக சென்று வந்தன. அக்கரையிலிருப்போர் படகில் படகில் இக்கரைக்கு வந்து திரைப்படம் பார்த்துச் செல்வது வழக்கமாய் இருந்துள்ளது. எவ்விதத் தடையும் அப்போது கிடையாது. கடலுக்கு வேலி போடும் முட்டாள்கள் அப்போதில்லை.
இலங்கையிலிருந்து நாகைத் துறைமுகத்துக்கு ஏலம், கிராம்பு, பாக்கு, புகையிலையோடு யானைகளும் வந்திறங்கின. பர்மாவிலிருந்து தேக்கு மரங்கள் தோணியில் கட்டியிழுத்து வரப்பட்டன. தாய்லாந்த் போன்ற கிழக்காசிய நாடுகளிலிருந்து யானைகளும் குதிரைகளும் இறக்குமதியாகின.
நாகப்பட்டினத்திற்கும் அதைச் சுற்றியுள்ள கிராமங்களுக்குமிடையே படகுகள் செல்லத்தக்க பாலம் (LIFT SPAN BRIDGE) ஒன்று 1957 இல் கட்டப்பட்டிருக்கிறது. பெரிய படகுகளும் கடல் மணலை அள்ளும் கருவிகளும் இதன் கீழ் செல்லலாம். இதன் நீளம் 320 அடி.
நாகப்பட்டினத்தை புயல் தொட்டுத் தழுவி கட்டியணைக்காத காலங்கள் குறைவு. 1681 இல் அடித்த புயல் டச்சுக்காரர்களின் கோட்டையையே சிதைத்தது. 1952 – 1955 என வந்த புயல்கள் கடலோரத்தையே காணாமல் செய்தன. தூரத்து இடிமுழுக்கம் கூட நாகையில் பெரும் மழையுடன் கரையேறும் 2004 டிசம்பர் சுனாமியில் மரணித்தவர்கள் ஆயிரக்கணக்கானோர், நவம்பர் வந்தாலே போது நாகை நடுங்க ஆரம்பித்து விடும். நடுக்கடல் பயணத்தைத் தடுத்து விடும்.
அரேபியர்கள் கிழக்குக் கரைத் துறைமுகப்பட்டினங்களில் குடியேறியதை சங்க இலக்கியங்களோடு சிலப்பதிகாரம், மணிமேகலை போன்ற நூல்கள் பதிவு செய்துள்ளன. பூம்புகாரில் அமைந்திருந்த யவனச்சேரி போல நாகப்பட்டினத்திலும் அரபுக் குடியேற்றம் இருந்தது. நூற்றுக்கணக்கான குதிரைகள் கப்பல்களில் கொண்டு வரப்பட்டு சோழ, பல்லவ மன்னர்களால் வாங்கப்பட்டுள்ளன.
நாகை அரேபியர்களால் ‘மலே பட்டான்’ என அழைக்கப்படிருக்கிறது. அண்ணலார் காலத்துக்குப் பின் அரேபியர்கள் முஸ்லிம்களாய் மாறி காலாதிகாலமாக செய்த இறக்குமதி ஏற்றுமதிகளை தொடர்ந்து செய்து வந்துள்ளனர். நாகையில் வந்திறங்கிய அரபு வணிகர்களோடு சோழ மண்டல வணிகர்கள் நீண்டகாலமாக வணிக உறவைப் பேணி வந்ததோடு வாழ்க்கை உறவுகளையும் கொண்டாடி வந்துள்ளனர்.
பதிமூன்றாம் நூற்றாண்டில் அரபு மக்கள் கப்பல் கப்பலாய் குடும்பத்தோடு புலம் பெயர்ந்து வந்த பிறகு குளச்சலிலிருந்து பழவேற்காடு வரை குடியேறியதால் ஓர் புதிய உறப்பாலம் அமைந்திருக்கிறது. பழவேற்காடு பாய் மரக்கப்பல்கள் ஆங்காங்கிருந்து பட்டினங்களில் உறவு பேணியும் தொழில் செய்தும் குளச்சலைத் தாண்டியும் சென்றுள்ளன. நடுத் தமிழகத்தின் நடுப்பகுதி துறைமுகங்களாய் நாகூரும் நாகையும் அமைந்திருந்ததால் காயல்பட்டின – கீழக்கரை வணிகர்கள் தொழில் நிமித்தம் இரு நகர்களிலும் ஏராளமாய் வந்து தங்கி வணிகம் செய்துள்ளன. இரு நகரங்களிலும் அதிகமான மரைக்காயர்கள் வந்தவாசியாயிருந்தும் சொந்தவாசியாய் மாறிப் போயினர்.
இரு நகரங்களிலும் ஏராளமான பாய்மரக்கப்பல்கள் நங்கூரமிட்டிருந்தன. பன்னாட்டு வணிகர்களும் வந்து போய்க் கொண்டிருந்தனர். கி.பி.பத்தாம் நூற்றாண்டின் தொடக்கத்தில் சீனா மற்றும் தென்கிழக்கு ஆசியப் பயணங்கள் அதிகமாக இருந்தன. அங்கு புத்தமதம் வேகமாக பரவியிருந்ததால் இரு நாட்டு உறவுகளும் சுமூகமாக இருந்தன. சுங்க வருவாயால் சோழ அரசு செழித்தது.
செட்டியார்களும் ஏற்றுமதி இறக்குமதியில் ஈடுபட்டிருந்தாலும் முஸ்லிம் வணிகர்களே முன்னிலை வகித்தனர். இதைப் பற்றிய சங்கதியை போர்த்துகீசியர் பயணி பார்போசா பதிவு செய்துள்ளார்.
16 ஆம் நூற்றாண்டில் போர்த்துக் கீசியர்களும் டச்சுக்காரர்களும் நாகப்பட்டின வணிகத்தை தம் வசப்படுத்தினர். அவர்கள் மலாக்கா முதல் இலங்கை வரை வணிகத்தில் கொடி கட்டிப் பறந்தனர். முஸ்லிம் வணிகர்களின் கப்பல் வணிகம் பரங்கியரால் பாதிக்கப்பட்டாலும் சூழ்நிலைக்கேற்ப தங்களை மாற்றிக் கொண்டு இணக்கமாக இருந்து தென்கிழக்கு ஆசிய நாடுகள், இலங்கை, தென்னாட்டின் பிற துறைமுகங்களுடன் தொடர்ந்து வாணிபம் செய்து வந்தனர்.
18, 19 ஆம் நூற்றாண்டுகளில் நாகூர் – நாகை துறை முகங்கள்தான் தென்னிந்திய கடல் வாணிபத்தில் பெரும் பங்கு வகித்தன. கடலிலிருந்து கடுவையாற்றின் முகத்துவாரத்துக்குள் 500 டன் எடையுள்ள கப்பல்கள் கூட நேரடியாக சென்று வரக் கூடியதாக இருந்தது.
1799 இல் நாகப்பட்டினம் பகுதி ஆங்கிலேயரின் ஆளுகைக்கு வந்தது. வேதாரண்யத்திலிருந்து உப்பு, வெங்காயம் போன்ற பொருட்களும் கொண்டு வரப்பட்டு ஏற்றுமதியாகின.
ஆற்காடு நவாபுகளும் தஞ்சை மன்னர்களும் முஸ்லிம்களின் வணிகத்துக்கு பல சலுகைகள் அளித்தனர். ஆங்கிலேயரும் முந்தைய ஆட்சியாளர்கள் அளித்த சலுகைகளைத் தொடர்ந்தனர். நாகூரும் நாகப்பட்டினமும் பாய்மரக் கப்பல்களாலும் கப்பல்காரர்களாலும் நிரம்பி வழிந்தன. இரு துறைமுகங்களும் முஸ்லிம்களின் துறைமுகம் – ‘MOOR PORTS’ என அழைக்கப்பட்டன. இங்குள்ள முஸ்லிம் வணிகர்கள் ‘சோழியர்’ எனக் குறிப்பிடப்பட்டனர். 1815 இல் ஆங்கிலேயரின் கடலூர் வணிக மையம் நாகையுடன் இணைக்கப்பட்டது.
மலாக்கா, சுமத்திரா, கெதா ஆகிய நாடுகளுக்கும் கப்பல் வணிகம் தொடர்ந்தது. துணி வகைகளே முக்கிய ஏற்றுமதிப் பொருளாக இருந்தது. மலாக்கா, சீனா, ஜாவா ஆகிய கிழக்காசிய நாடுகளிலிருந்து சர்க்கரை, சந்தண மரம், யானைத் தந்தம் மெழுகு, தகரம் ஆகியவை இறக்குமதியாகின. சுமத்திராவிலிருந்து குதிரைகளும் தாய்லாந்திலிருந்து யானைகளும் கூட தமிழகம் வந்து சேர்ந்தன.
நாகை – நாகூரைச் சுற்றியுள்ள ஊர்களெங்கும் தறிகளின் ஓசை தடங்களில்லாமல் கேட்டன. பலவகையாக துணிமணிகள் கட்டுக்கட்டுகளாக அலைவாய்க் கரைக்கு வந்து சேர்ந்தன. அவை தூர கிழக்கு நாடுகளுக்கு மட்டும் செல்லவில்லை, அய்ரோப்பிய நாடுகளுக்கும் அனுப்பப்பட்டன.
நாகூரில் தயாரிக்கப்பட்ட திரைச் சேவைகள், விரிப்புகள், வண்ண வளைவுகள் கொண்ட அலங்காரத் துணிகள் ஆகியவற்றுக்கு அய்ரோப்பியச் சந்தையில் நல்லவிலை கிடைத்தன. இவற்றைக் கடல் கொண்டு செல்ல நாகூரில் மட்டும் 400 க்கு மேற்பட்ட கப்பல்கள் இருந்தன.
இப்பகுதிகளில் நெசவுத் தொழிலில் ஈடுபட்டோர் தொகை தொகையாய் வாழ்ந்தனர். 4000 நெசவாளார்கள், 1023 தறிகள், 1000 சலவையாளர்கள், 230 வண்ண ஓவியம் வரைவோர், 300 சாயக்காரர்கள் இருந்ததாக ஆங்கிலேயர் பதிவு செய்துள்ளனர்.
நம் நாட்டில் தயாரிக்கப்பட்ட ஊதா துணிக்கு ஐரோப்பாவில் நல்ல சந்தை இருந்தது. நாகப்பட்டினத்திலிருந்து அமெரிக்காவுக்குக் கூட துணிமணிகள் அனுப்பப்பட்டுள்ளன.
இலங்கைக்கு நெல், அரிசி, துணி வைகள் ஏற்றுமதி செய்யப்பட்டன. அங்கிருந்து பாக்கு, மிளகு, வாசனைப் பொருட்கள், உலர்ந்த மீன், புகையிலை, முத்துக்கள் ஆகியவை இறக்குமதி செய்யப்பட்டன. இங்கிருந்து இலங்கை, பர்மா, சிங்கப்பூர், பினாங்கு துறைமுகங்களுக்கு பயணிகள் கப்பல்களும் முஸ்லிம்களால் இயக்கப்பட்டன.
கலகத்தாவிலிருந்து காலிகட் வரை (வங்கக் கடல் – அரபுக் கடல்) கரை வழிப்போக்குவரத்து நாகை – நாகூர் நகரங்களை மிகப்பெரும் சந்தைக் கூடமாக்கியது. இங்கு நாணயங்கள் கூட தயாரிக்கப்பட்டன. அவை ‘நாகப்பட்டின பகோடா’ என அழைக்கப்பட்டன.
நடுத்துறைமுகப்பட்டினங்களான நாகையும் நாகூரும் கப்பல் கட்டும் தளமாகவும் விளங்கியுள்ளது. தம் தேவைகளை நிறைவு செய்த கப்பல் தயாரிப்புக் கூடங்கள் ஆங்கிலேயருக்கும் மேலைக் கடற்ககரை வணிகர்களுக்கும் கூட கப்பல்களை கட்டிக் கொடுத்துள்ளன.
கிழக்காசிய நாடுகளில் வணிகத்துக்காக தங்கியவர்கள் அங்கு தம் முத்திரைகளைப் பத்திதுள்ளனர். 1770 கெதா நாட்டில் வாழ்ந்த நாகை வணிகர் ஜமாலுத்தீன் அமைச்சராக இருந்ததோடு ‘டத்தோ ஸ்ரீ ராஜா’ எனும் பட்டத்தையும் பெற்றிருந்தார். இவர்தான் அரசர் சார்பில் ஆங்கிலேயரோடு பேசி வணிக ஒப்பந்தங்கள் செய்தார்.
1786 இல் பிரான்ஸிஸ் லை தலைமையில் பினாங்கு உருவான போதும் 1824 இல் சிஙகப்பூர் உருவான போதும் அங்கு தமிழ் பேசும் முஸ்லிம்கள் அதிகமாக இருந்தனர். அக்காலகட்டத்தில் நாகூரும் நாகையும் அந்நாடுகளோடு பெருமளவில் வணிகத்தொடர்புகள் கொண்டிருந்தன. முஸ்லிம்கள் வணிகர்களாக மட்டும் வாழவில்லை. கப்பலோட்டிகளாகவும், மாலுமிகளாகவும் தொழில் வல்லுநர்களாகவும் வாழ்ந்தனர்.
விடுதலை பெற்ற பின்னர் நாகப்பட்டினம் ஒளியிழந்தது. சென்னையைப் போல் வளர வேண்டிய துறைமுகப்பட்டினம் களையிழந்தது. தமிழகத்தின் நடு நாயகமாய்த் திகழும் நகரம் உயர வேண்டிய அளவுக்கு உயரவில்லை.
ரோலிங் மில், ரயில்வே தொழிற்சாலைகள் இடம் மாறிப் போயின. வளர்ந்து வந்த கல்லூரிகள் குறைந்து போயின.
ரெட்டை நகர்களான நாகையும் நாகூரும் முஸ்லிம்கள் கை கோர்த்துக் கொண்டிருக்கும் ஒரே நகராகி விட்டது. நாகூர் நாகராட்சியில் ஒன்று சேர்ந்து விட்டது.
நாகையில் முஸ்லிம்கள் 25% விழுக்காடு இருக்கிறார்கள். மரைக்கார் 60% ராவுத்தர் 30% உருது மொழி பேசுவோர் 10% என முஸ்லிம்கள் வாழ்ந்தாலும் ஒற்றுமையாக வாழ்கிறார்கள். மாற்று மதச் சகோதரர்களோடு நல்ல உறவோடு இருக்கிறார்கள்.
ஒரு காலத்தில் ஏற்றுமதி இறக்குமதி தொழில்களில் மும்முரமாய் வாழ்ந்தவர்கள் இன்று பல்வேறு தொழில் செய்கிறார்கள். கல்வியை கண்ணெனப் பேணி பல்வேறு தளங்களில் முன்னணியில் உள்ளார்கள். 75% விழுக்காடு பெண்கள் கல்வியில் சிறந்துள்ளார்கள்.
கடற்கரைப் பகுதிகள், வெளிப்பாளையம், காடம்பாடி போன்ற இடங்களில் முஸ்லிம்கள் திரளாக உள்ளனர். மரைக்கார் பள்ளி, மீரா பள்ளி, கமாலியா பள்ளி, யாஉசேன் பள்ளி, புதுப் பள்ளி, முகைதீன் பள்ளி எனப் பல பள்ளிவாசல்கள் உள்ளன.
தொடக்க காலத்தில் வாழ்ந்த முஸ்லிம்களோடு நாகைக்கு வணிகத்துக்காக வந்து குடியேறியவர்களில் முக்கியமானவர்கள் ராமநாதபுரம் மாவட்ட முஸ்லிம்கள். அவ்வாறு வந்து குடியேறிய முக்கிய குடும்பம்தான் ‘நாவலாசிரியர் ஹஸன்’ அவர்களுடையது.
தமிழக முஸ்லிம்கள் மட்டுமல்ல கேரள முஸ்லிம்களும் மேமன் முஸ்லிம்களும் குடியேறி வாழ்ந்துள்ளனர். வணிகங்கள் சுருங்க மேமன்கள் தம் குடும்பங்களோடு புலம் பெயர்ந்து விட்டனர். கேரள முஸ்லிம்கள் நாகையைத் தம் தாயகமாகக் கொண்டு விட்டனர்.
மேமன் முஸ்லிம்கள் கட்டிய பள்ளிவாசலே கமாலியா பள்ளிவாசல், கமாலியா பளிவாசலைக் கட்டிய மேமன்கள் அவர்கள் தொழில் செய்த கடற்கரை அருகிலேயே ஒரு சிறிய பள்ளியைக் கட்டினர். அது இன்றும் பெயர் சொல்லிக் கொண்டிருக்கிறது. மேமன்களின் பூர்வீகம் குஜராத் இவர்கள் சென்னையில் கணிசமாக வாழ்கின்றனர்.
ஒரு காலத்தில் கப்பல்கள் நிறைந்திருந்த துறைமுகத்தில் இன்று உரமும் கரியும் மட்டுமே இறக்குமதியாகின்றன. என்றாலும் தமிழகத்தின் மிகப்பெரும் மீன் பிடித் துறைமுகமாய் விளங்கிக் கொண்டிருக்கிறது.
ஆங்கிலேயரின் முக்கிய கேந்திரமாய் விளங்கிய நாகையில் இருந்த ஆட்சியர் ஸ்டெப் போர்தான் சிங்கப்பூரைக் கைப்பற்றி ஆண்டார். இவருக்கு நாகையில் சிலை எழுப்பப்பட்டுள்ளது. தனித்த தமிழ் தலைவர் மறைமலை அடிகளுக்கும் நாகையில் சிலை எழுப்பப்பட்டுள்ளது. நாகையின் மைந்தன் அவர்.
முஸ்லிம்களின் அரசியல் நுழைவை முன்னெடுத்துச் சென்றதில் நாகைக்குத் தனியிடம் உண்டு. அதை நினைவுகூரும் தெரு சர் அகமது தெரு.
மிகப்பெரும் கப்பல் வணிகராய்த் திகழ்ந்த சர் அகமது மரைக்காயரை நினைவுகூராகவே சர் அகமது தம்பி அமைந்திருக்கிறது. அன்றைய முஸ்லிம்களிடையே சிறப்பான ஆளுமையாகத் திகழ்ந்த மரைக்காயர் நீதிக்கட்சியின் முக்கியப் பிரமுகராய்த் திகழ்ந்தவர், மதராஸ் ராஜதானியை நீதிக்கட்சி (Justice party) ஆண்ட போது டெல்லி நாடாளுமன்ற உறுப்பினராய்த் தேர்ந்தெடுக்கப்பட்டவர்.
மரைக்காயரின் இல்லம் ‘டயமண்ட் மகால்’ எனப் பெயர் பெற்றிருந்தது. இன்றும் அது பழம் வரலாற்றைச் சொல்லாமல் சொல்லிக் கொண்டிருக்கிறது. மரைக்காயரின் உறவினர் மதிப்பிற்குரிய அமீர் சுல்தான் பிற்காலத்தில் மதராஸ் ராஜதானியின் மேலவையை அலங்கரித்தார்.
இடைக்காலத்தில் 1957 இல் இசைமுரசு நாகூர் அனிபாவும் அடுத்து கவிஞர் திலகம் சாரணபாஸ்கரனும் நாகைத் தொகுதியில் வெற்றி வாய்ப்பை இழந்துள்ளனர். அண்மைக் காலத்தில் சகோதரர்கள் நிஜாமுதீனும், தமீமுல் அன்ஸாரியும் சட்டசபை உறுப்பினர்களாகியுள்ளனர்.
முந்தைய காலகட்டத்தில் நாகையின் குறிப்பிடத்தக்கவர் நாகை பாட்சா எனும் திராவிடர்க் கழக பிரமுகர். பின்னாட்களில் இவர் இறைவனைத் தொழும் நிலைக்கு உயர்ந்தவர்.

வியாழக்கிழமை, 12 ஏப்ரல் 2018 07:22

வீதிக்கு வந்த நீதிபதிகள் பகுதி 2

Written by

உச்சநீதிமன்றத்தின் மூத்த வழக்கறிஞர்களில் ஒருவர் துஷ்யந்த் தவே.தலைமை நீதிபதி ஆள் பார்த்து வழக்குகள் ஒதுக்குவதில் அதிருப்தி வெளிப்படுத்தியவர்.2018,ஜனவரி 10 அன்று, ஒரு சட்ட இணையத்தில்,”இன்றைய உச்சநீதிமன்ற செயல்பாடுகளை உற்று நோக்கும் போது,தலைமை நீதிபதி அதிகாரத்தை பயன்படுத்தும் விதம் முற்றிலும் தெளிவில்லாமலும்,புரிய முடியாமலும் இருப்பதை காட்டுகிறது.சமீப மாதங்களில் நடந்த பல உதாரணங்களை சொல்லலாம்.அரசியல் சாசன அவைகள் குறிப்பிட்ட சில நீதிபதிகளை ஒதுக்கி விட்டு குறிப்பிட்ட சில நீதிபதிகளை உள்ளடக்கி அமைக்கப்பட்டன” என்று எழுதினார்.

நான்கு நீதிபதிகள் விவகாரத்தை வீதிக்கு கொண்டு வந்ததை சரி என கூறும் சிலர், அவர்களுக்கு வேறு வழி இல்லை என்று கூறுகிறார்கள்.இந்த பிரச்சனைகளை உள்ளரங்கில் தீர்க்க முதலில் முயற்சிகள் செய்திருக்கிறார்கள்.அவர்கள் வாய் மூடி கொண்டு இருந்தால் எது நடந்து கொண்டிருந்ததோ அது தான் தொடர்ந்து நடக்கும்.மக்கள் நீதிக்காக நீதிமன்றம் போகிறார்கள்.நீதிபதிகள் மக்கள் மன்றத்துக்கு போனது ஒரு நேர் முரணான காட்சி தான்” என்கிறார்கள்.

11 veethi 1

நான்கு நீதிபதிகளை விமர்சிப்பவர்கள் என்ன கூறுகிறார்கள்? பிரச்சனை எவ்வளவு தீவிரம் கொண்டிருந்தாலும்,மிக அவசரமானதாக இருந்தாலும் அவர்கள் செய்தியாளர்களை சந்தித்ததன் மூலம் நன்மையை விட அதிக தீமையை ஏற்படுத்தி விட்டார்கள்.நீதிதுறை மீது மக்கள் கொண்டுள்ள நம்பிக்கையை இது உண்மையில் அசைத்துள்ளது என்கிறார்கள். தில்லி உயர்நீதிமன்ற முன்னாள் நீதிபதி ஆர்.எஸ்.சோதி,” பிரச்சனை இப்போது மக்கள் மன்றத்துக்கு போய் விட்டது.அவர்கள் இப்போது நீதித்துறையை எப்படி பார்ப்பார்கள்?ஊழல் மலிந்துள்ளவர்கள் தங்களுக்கு இடையில் சண்டை போட்டு கொள்கிறார்கள் என்று தான் நினைப்பார்கள்.இந்த வகையில்,நீதிபதிகள் தங்களை ஒரு வியாபார சங்க உறுப்பினர்கள் போல நடந்து கொண்டார்கள். நீதிபதிகள் உச்சநீதிமன்றத்தை வைத்து பெரும் தொகையை பார்க்க முடியும் என்று கருத இடமளித்து விட்டார்கள்” என்று கூறுகிறார்.

உச்சநீதிமன்ற முன்னாள் நீதிபதி ஏ.ஆர்.லெட்சுமணன் நீதிபதிகள் நால்வர் பொது வெளிக்கு வந்ததை ஏற்க வில்லை எனினும்,இந்த பிரச்சனை நேர்மையாக எழுப்பப்பட்டது என்கிறார்.”தலைமை நீதிபதி பிரச்சனை தொடர்பில் எதையும் கூறவில்லை.இந்த பிரச்சனை மேலும் தீவிரமாவதை தடுக்க இது ஒரு தொடக்கம்.இப்போது,நீதிபதிகள் ஒருவருக்கு ஒருவர் முகம் பார்த்து பேசி ஒரு முடிவுக்கு வரவேண்டும்” என்றார்.ஜனவரி 16 ஆம் நாள்,தலைமை நீதிபதி மிஸ்ரா மூன்று இளம் நீதிபதிகள் முன்னிலையில் மூத்த நான்கு நீதிபதிகளை சந்தித்தார் என்றும் சொல்லப்படுகிறது.ஆனால்,எந்த முன்னேற்றமும் ஏற்படவில்லையாம்.

தலைமை நீதிபதி உறுதியான முடிவுகள் எதையும் வழங்கவில்லை. வழக்கமான கடைபிடிக்கும் முறையில் தான் வழக்குகளை ஒதுக்குவேன் என்று பிடிவாதம் காட்டினாராம்.இப்ப அவர் ஏதாவது மாற்றத்தை செய்தாலும், அவரது முந்தைய செயல்பாடுகளில் தவறு இருந்ததை ஒத்துக் கொண்டதை போல ஆகிவிடும் என்ற கருத்தும் கூறப்பட்டது. மிகவும் சிக்கலான வழக்குகளை ஜனவரி 17 முதல், அரசியல் சடட அவை விசாரிக்கும் என்று உச்சநீதிமன்றம் ஒரு அறிவிப்பு செய்தது.ஆனால்,அந்த அமர்வின் நீதிபதிகளில் மாற்றம் ஏதும் அறிவிக்கப்படவில்லை.அதாவது,சர்ச்சையை கிளம்பிய நான்கு நீதிபதிகளுக்கும் அந்த அமர்வில் இடமளிக்கப்பட வில்லை.

வழக்குகளில் சில கட்ட விசாரணைகள் ஏற்கெனவே நடந்து விட்டதால் அந்த அமர்வுகளில் நீதிபதிகளை மாற்றுவது நடைமுறை சாத்தியம் இல்லை என்றும் கூறப்படுகிறது.இந்த பிரச்சனைக்கு தீர்வு காணப்படும் என்று நான் கருதவில்லை என்கிறார் மூத்த வழக்கறிஞர் விகாஷ் சிங்.இவர் ஏற்கெனவே உச்சநீதிமன்ற பார் கவுன்சில் தலவராக இருந்தவர். வெளியில் இருந்து பார்க்கும் போது,இயல்பாக போய்க்கொண்டு இருப்பது போல் தெரியும்.நீதிபதிகள் மொத்தம் பேரும் உட்கார்ந்து பேசினால் தான் ஒரு முடிவுக்கு வர முடியும்.வழக்குகள் ஒதுக்குவது பற்றி விவாதிக்க வேண்டும்.அதில் ஒரு சமாதானம் வர வேண்டும் என்கிறார்.

உச்சநீதிமன்ற மூத்த வழக்கறிஞர்,விஜய் ஹன்சாரியா தலைமை நீதிபதி சில சரியான முடிவுகளை எடுக்க வேண்டும்.அதற்கு ஒரு நீண்ட கால தேவை இருக்கலாம்.நீதிபதிகளின் முக்கிய கவலை வழக்குகள் ஒதுக்குவது பற்றி தான்.எந்த வழக்கு எந்த அமர்வுக்கு போக வேண்டும் என்று சில வழி முறைகளை ஏற்படுத்த வேண்டும் என்கிறார்.இதனிடையே, செய்தியாளர்கள் சந்திப்பின் மூலம் இந்த நீதிபதிகள் என்ன நன்மையை பெற்றார்கள் என்று மற்றொரு கேள்வியும் எழுந்தது.நாட்டுக்காக கடமை ஆற்றினோம் என்று நால்வரும் கூறும்போது,அஅவர்களை மூத்த நீதிபதிகள் என்ற அங்கீகாரத்துக்கு அவர்கள் மட்டும் தான் போராடுகிறார்கள்?அது தான் பிரச்சனை என்றால்,மிகப்பெரிய நன்மைகள் ஏற்படும் என்று நம்ப வைத்து முட்டாள் ஆக்கப்பட்டுள்ளோம்” என்கிறார் ஆர்வலர் ஷைலேஷ் காந்தி.

“பிரச்சினையை வெளிச்சத்துக்கு கொண்டு வருவது தான் நான்கு நீதிபதிகளின் நோக்கம்.இதன் பின்னர்,அரசியல் பதட்டம் உடைய வழக்குகள் ஒதுக்கும் போது எச்சரிக்கை உணர்வோடு செயல்பட இது காப்புறுதி அளிக்கும்.பதிவுத்துறை மிக விழிப்பாக இருக்கும்.தலைமை நீதிபதி வழக்குகளை ஒதுக்கும் போது கூடுதல் விழிப்புடன் இருப்பார். எதிர் வரும் தலைமை நீதிபதிகள் வழக்கறிஞர்கள் சங்கம்(பார்) மற்றும் அரசியல் கட்சிகளுக்கு நீதிதுறையில் தங்கள் விருப்பத்துக்கு தலையிட கூடாது என்கிற செய்தி போய் சேர்ந்திருக்கிறது ” என்கிறார் உச்சநீதிமன்ற வழக்கறிஞர் சினேகா கலிதா(Sheba Kaliya).

இதனிடையே,நீதிமன்றத்தில் மிக முக்கியமான வழக்குகளில் தலையிடுவதாக குற்றம் சுட்டப்படும் பாஜக திட்டமிட்டு மௌனமாக இருக்கிறது.எல்லாமே நல்லபடியாக தான் இருக்கிறது என்றும் சொல்லவே ஆசைப்படுகிறது.பாஜக பதில் சொல்வதில் இருந்து தப்பிக்கிறது.நழுவுகிறது.இதில் அரசும் சம்பந்தப்பட்டு இருப்பதால்,இதனை நீதிதுறையின் உள் விவகாரமாக மட்டும் எடுத்துக்கொள்ள முடியாது என்று காங்கிரஸ் கட்சி தலைவர் அபிஷேக் மனு ஷிங்வி கூறினார்.

நீதித்துறையில் அதிக வெளிப்படையும் பொறுப்பையும் சாட்ட நீதித்துறையில் சீர்திருத்தங்களை அதிரடியாக கொண்டுவர வேண்டும்.உச்சநீதிமன்றத்தை மாற்றி அமைக்கும் தேவை இருக்கிறது என்கிறார் தில்லியிலிருந்து இயங்கும் சட்ட கொள்கைக்கான (Legal Policy) விதி சென்டரின் நிறுவனர் மற்றும் ஆய்வுகழக தலைவர் அர்கையா சென்குப்தா(Arghya Sengupta). உச,சநீதிமன்ற பணிகளை நிர்வகம்,மேல் முறையீடு ,அரசியல் சாசனம் என்று மூன்றாக பிரிக்க வேண்டும்.அரசியல் சாசன அமர்வு மூத்த வழக்கறிஞர்களை பெரும்பான்மையாக கொண்டு அமைய வேண்டும்.அத்தகைய அமர்வு தான் அரசியல் சாசன விவகாரங்களை விசாரிக்க வேண்டும் என்கிறார்.

11 veethi 5

இதனை தலைமை நீதிபதி தீபக் மிஸ்ராவில் இருந்தே தொடங்கலாம்.அவரது தோழமை நீதிபதிகள் அவநம்பிக்கையை ஒழிக்க வேண்டும்.மேலும்,இதுவரையில் இல்லாத ஆழமான பிரச்சனைகளில் இருந்து நீதிதுறையை மீட்க வேண்டும்.ஜனநாயகத்துக்கு ஆபத்து வந்துவிட்டது என நீதிபதிகள் வைக்கும் குற்றச்சாட்டு மிக முக்கியமானது.இதனை கூற இன்னும் காலம் கடத்தினால் அது,மன சாட்சியை விற்றுவிட்டது போலாகிவிடும் என்று அவர்கள் கூறி இருந்தார்கள்.நீதித்துறைக்கு இருக்கும் ஆபத்தை குறித்து எச்சரிக்கை செய்து இருக்கிறார்கள். அவர்கள் நீதிமன்றத்தில் இருந்து வெளியே வந்து ஊழலை வெளிப்படுத்தும் ஆர்வலர்கள் போல நடந்து கொண்டார்கள்.

நீதிதுறையில் ஏற்கெனவே ஏராளமான அரசியல்வாதிகள் இருக்கிறார்கள்.அரசியல்வாதிகள் தொடர்புடைய வழக்குகள் மூத்த நீதிபதிகளை தவிர்த்து விட்டு வேண்டிய நீதிபதிகளை கொண்ட அமர்வுகள் மூலம் அரசியல்வாதிகளுக்கு சாதகமான தீர்ப்புகள் பெறப்படுகின்றன என்கிறார் மூத்த வழக்கறிஞர் பிரசாந்த் பூஷன்.இன்று சர்ச்சையான வழக்காக இருக்கும் சொராபுதீன் போலி எண்கவுண்டர் வழக்கில் குற்றம்சாட்டப்பட்டு இருந்த பாஜக தேசிய தலைவர் அமித் ஷாவை குற்றமற்றவர் என்று வழக்கில் இருந்து விடுத்து சென்றவர் முன்னாள் தலைமை நீதிபதி சதாசிவம் தானே.

தனது நீதிபதி பதவியின் இறுதி காலத்தில் அந்த தீர்ப்பை வழங்கினார்.பதவி ஓய்வுக்குப் பிறகு கேரள மாநில ஆளுனர் பதவி பாஜக அரசால் வழங்கப்பட்டது.பாஜக தனது கட்சியில் நீண்ட காலம் வேலை செய்து வந்தவர்களை கௌரவிக்கும் வகையில் ஆளுநர் பதவிகளை வழங்கி வருகிறது.அந்த சமயத்தில் தலைமை நீதிபதி சதாசிவம் அந்த பதவியை பாஜக மூலம் பெற்றது முன்னர் நடந்திராத ஒன்று ஆகும்.அமித் ஷாவை விடுவித்து வழங்கிய தீர்ப்பு அரசியல் அதாயத்துக்காக வழங்கப்பட்டது என்று தான் இன்றும் கூறப்படுகிறது.இதனால்,மூத்த நீதிபதிகள் இடம்பெறும் ஒரு அமர்வில் இருந்து மட்டும் தீர்ப்பு நேர்மையாக வந்து விடும் என்று சொல்வதை ஏற்க இயலவில்லை.

நீதிமன்றத்தின் செயல்பாடுகளில் வெளிப்படை வேண்டும்.நீதிபதிகள் நியமனத்திலும் வெளிப்படை வேண்டும்.வழக்குகள் ஒதுக்குவதிலும வெளிப்படை தன்மையும் நேர்மையான செயல்பாடும் அறிவார்ந்த நடைமுறையும் வேண்டும்.தலைமை நீதிபதிக்கு அதிகாரத்தை தவறாக பயன்படுத்த இருக்கும் உரிமை தடுக்கப்பட வேண்டும்.தலைமை நீதிபதிக்கு இருந்த நாணயமும் புகழும் இந்த குற்றச்சாட்டுகள் மூலம் நிலை குழைந்து விட்டது.அரசுக்கு தோதாக நீதித்துறை செயல்பாடுகளை தலைமை நீதிபதி அரசுக்கு தோதாகவும் தவறான வழியிலும் நடத்தி வந்திருக்கிறார் என்பது மூத்த நீதிபதிகள் வைத்த குற்றச்சாட்டில் இருந்து தெள்ள தெளிவாக வெளிப்பட்டு விட்டது.தலைமை நீதிபதியை கையில் வைத்து கொண்டு மத்திய அரசு வழக்குகளில் விளையாடி இருக்கிறது.அரசுக்கும் அரசியல்வாதிகளுக்கும் வேண்டிய வகையில் தீர்ப்புகளை பெற்று வந்திருக்கிறது.

உதாரணமாக,தீதிபதி பி.எச்.லோயா மர்ம மரணம்,ஆதார் சம்பந்தமான வழக்கு அல்லது சி.பி.ஐ.சிறப்பு இயக்குனராக ராகேஷ் அஸ்தனா நியமிக்கப்பட்டது தொடர்பான வழக்கை எடுத்து கொள்வோம்.மருத்துவ கல்லூரிகளுக்கு அனுமதி வழங்கிய வழக்கில் மருத்துவ கல்லூரிகள் நீதிபதிகளுக்கு லஞ்சம் கொடுத்ததாக எழுந்த புகாரில் சி.பி.ஐ விசாரணையை ஏவி விடப் போவதாக மத்திய அரசு தலைமை நீதிபதியை மிரட்டி பல காரியங்களை சாதித்து கொண்டுள்ளது.மத்திய அரசு கொடுத்த அழுத்தத்தின் கீழ் தலைமை நீதிபதி செயல்பட்டு வந்திருக்கிறார் என்பது மிக தெளிவாக தெரிகிறது என்கிறார் உச்சநீதிமன்ற மூத்த வழக்கறிஞர் பிரசாந்த் பூஷன்.(பார்க்க:தி வீக் ஜனவரி 28,2018).உயர்நீதிமன்ற நீதிபதிகள் மாநில அரசு மற்றும் அரசியல் அதிகாரங்களின் ஏவலாளிகள் போல செயல்பட்டு வந்திருப்பதற்கும் ஏராளமான ஆதாரங்களை மூத்த வழக்கறிஞர்கள் அடுக்குகிறார்கள்.

11 veethi

மாநில கட்சிகள்,தலைவர்கள் மீதும் முதலமைச்சர்கள் உள்ளிட்ட மாநில அதிகாரங்கள் மீது மத்திய அரசு சி.பி.ஐயை ஏவி விட்டு அவர்களை தன் வழிக்கு கொண்டு வரும் அதே பாணியை தான், நீதித்துறை மீதும் மத்திய அரசு திணித்து உள்ளது.அரசியல் செயல்பாட்டிலும்,நிர்வாக அமைப்பிலும் முதலில் நேர்மையை ஒழித்து கட்டுவது.அடுத்ததாக நேர்மை இல்லாதவர்களை,பொருத்தம் இல்லாதவர்களுக்கு பதவிகள் கொடுத்து அதிகாரத்தில் அமர வைப்பது.பின்னர் அவர்களிடத்தில் இல்லாத நேர்மையை வைத்து அதிகார மையங்களை அச்சுறுத்தி வசப்படுத்தி காரியம் சாதித்து கொள்வது. இதை ஜனநாயக அமைப்பு ஊடாகவே சாதித்து கொள்வது. மேலும் இங்கு எல்லாம் நல்லபடியாக நடந்து வருவது போல நாடகம் காட்டுவது.இது தான் ஆரியத்தின் காரிய சூழ்ச்சியாக இருக்கிறது.சாணக்கியன் கற்று கொடுக்கும் சமூக அறிவியலும் இது தான்.இவை பற்றியும் இவற்றின் போக்கு பற்றியும் பெரியார் முன்னரே எச்சரிக்கை செய்து இருக்கிறார் என்பது எத்தனை பேருக்கு தெரியும்.தொடரும்...

சேயன் இப்ராகிம்

கத்தோலிக்க சமய பீடத்தின் தலைமையகமான வத்திகன் நகரில் 1985 ஆம் ஆண்டு மே மாதம் 6, 7 தேதிகளில் நடைபெற்ற ஒரு சமயக் கருத்தரங்கில் இந்தியா, பங்களாதேஷ், பாகிஸ்தான், அமெரிக்கா உள்ளிட்ட 10 நாடுகளைச் சார்ந்த கிருஸ்துவ மற்றும் இஸ்லாமிய அறிஞர்கள் கலந்து கொண்டனர். தமிழ் நாட்டிலிருந்து இந்தியப் பிரதிநிதிகளுடன் அம் மாநாட்டிற்குச் சென்ற மார்க்க அறிஞர்களில் அவரும் ஒருவர். மாநாட்டில் கலந்து கொண்ட கிறிஸ்துவ பாதிரியார்கள் “I am the father of London city church,” “I am the father of Paris Town city church,” “I am the father of Newyork city church,” என்று தங்களை அறிமுகப்படுத்திக் கொண்டபோது, தமிழகத்திலிருந்து சென்ற இந்த மார்க்க அறிஞரோ தன்னை அறிமுகப்படுத்தும் போது “I am the father of Seven Children ,”என்று கூறவே ஒட்டு மொத்த மாநாட்டு அரங்கமும் சிரிப்பலைகளால் ஆர்ப்பரித்தது.

இம்மாநாட்டில் கலந்து கொண்டு உரையாற்றிய சில கிறிஸ்தவப் பாதிரியார்கள் முஸ்லிம் அறிஞர்களை நோக்கி ‘உங்களது நபியை அழகிய முன்மாதிரி என்று கூறுகிறீர்களே, நீங்களும் ஏன் அவர்களைப் போல் ஒன்பது, பத்து மனைவிகளை மணந்து கொள்ளக்கூடாது? என்று குதர்க்கமாகக் கேள்வி எழுப்பினர். இதற்குப் பதிலளிக்கும் விதமாக அந்த இஸ்லாமிய மார்க்க அறிஞர் தனது உரையினூடே கீழ்க்கண்டவாறு குறிப்பிட்டார்.
‘எங்களது நபி அவர்கள் கொண்டு வந்து எங்களுக்கு வழிகாட்டித் தந்த அருள்மறை குர்ஆன் தான் நாங்கள் முதலாவதாகப் பின்பற்ற வேண்டிய சட்டநூலாகும். உண்மையில் அது ஒன்றுக்கு மேற்பட்ட வாழ்க்கைத் துணைவியரை திருமணம் செய்ய விழையும் போது எங்களுக்கு சில கட்டுப்பாடுகளை விதிப்பதோடு அதனைத் தவிர்க்க வேண்டுமென்ற நோக்கில் ஒன்றுக்கு மேற்பட்ட மனைவியருடன் நீங்கள் நீதியாக நடப்பது இயலாத காரியம் என்றும் கூறுகின்றது. ஆனால் கிறிஸ்துவ மதத்தின் புனித ஏற்பாட்டில் (பைபிளில்) புனைந்துரைக்கப்பட்டிருக்கும் கதைகள் இல் வாழ்க்கைக்குப் புறம்பான சல்லாப நிகழ்வுகளை விவரிக்கின்றன. இன்று கிருஸ்துவ மதத்தைப் பின்பற்றும் மேலை நாடுகளிலுள்ள குடும்பங்களில் நடக்கும் கூத்துக்களை நான் கூறத் தொடங்கினால் இந்த அவை சினத்தைக் கக்கும். அல்லது சிரிப்பில் திளைக்கும். மேலை நாடுகளின் கேந்திரமான அமெரிக்காவில் நாளொன்றுக்கு ஆயிரக்கணக்கில் திருமணங்களும், திருமண முறிவுகளும், கற்பழிப்புகளும், காதல் களியாட்டங்களும் நடக்கின்றன. மேலை நாடுகளில் குடும்ப வாழ்க்கை முற்றிலும் சீர்குலைந்து போயிருப்பதாக அன்றாடம் செய்தித் தாள்கள் மற்றும் பிற ஊடகங்கள் மூலம் அறிய வருகிறோம். அவ்வாறெல்லாம் ஆகக்கூடாது என்பதற்காகத் தான் எங்கள் அருள்மறை குர்ஆனும், அண்ணல் நபி(ஸல்) அவர்களும் ஒன்று அல்லது இரண்டு அல்லது மூன்று அல்லது உச்சகட்டமாக நான்கு மனைவியரை மணமுடிக்கும்படி வரையறை செய்து வாழ்க்கையை இனிதாக வகுத்தளித்துத் தந்துள்ளது”
இப்படி அம்மாநாட்டில் கலந்து கொண்டு சிறப்புரையாற்றிய அந்த தமிழக மார்க்க அறிஞர் வேறுயாருமல்ல. 1970, 1980, 1990 களில் தமிழக இஸ்லாமிய மேடைகளை தனது கருதாழமிக்க சொற்பொழிவுகளால் பொலிவுறச் செய்த மௌலவி எம்.அப்துல் வஹாப் M.A., B.Th அவர்கள்தான்.
இளமைப் பருவம்:
மௌலவி எம்.அப்துல் வஹாப் சாகிப் 29.5.1920 அன்று அன்றைய திருவாங்கூர் சமஸ்தானத்திற்கு உட்பட்டிருந்த செங்கோட்டையில் (இன்றைய திருநெல்வேலி மாவட்டம்) இஸ்மாயில் – மரியம் தம்பதியினரின் மகனாகப் பிறந்தார். தந்தையார் இஸ்மாயில் பர்மா சென்று அங்கு வணிகம் செய்து வந்தார். எனினும் இரண்டாம் உலகப்போரின் போது பர்மாவின் தலைநகரான ரங்கூனை ஜப்பானியப் படைகள் குண்டு வீசித் தாக்கி அதனைக் கைப்பற்றியபோது ஏராளமான தமிழர்கள் அந்நகரை விட்டு வெளியேறி கால்நடையாகவே கல்கத்தா வழியாக தாயகம் திரும்பினார். அப்படித் திரும்பியவர்களில் ஒருவர்தான் இஸ்மாயிலும் ஒருவர். நல்ல வருமானம் தந்த வணிகத்தை அப்படியே விட்டு விட்டு வந்ததால் அன்றாட வாழ்க்கையை ஓட்டுவதற்கே இஸ்மாயில் சாகிப் சிரமப்பட்டார். இந்நிலையில் அப்துல் வஹாப் சாகிபின் இளமைப் பருவம் வறுமையிலேயே கழிந்தது என்பதைச் சொல்லவும் வேண்டுமோ!
தனது தொடக்க மற்றும் இடைநிலைக் கல்வியை செங்கோட்டையிலிருந்த பள்ளிகளிலேயே கற்றுத் தேறிய அவர், திருவனந்தபுரத்திலுள்ள மகாராஜா கல்லூரியில் சேர்ந்து இன்டர் மீடியட் படித்தார். பின்னர் ஊரிலிருந்த சில நல்லெண்ணம் கொண்டோரின் உதவி பெற்று சென்னை சென்று அங்கிருந்த கவர்ன்மெண்ட் முகம்மதன் கல்லூரியில் சேர்ந்து இஸ்லாமிய இயலில் பட்டப் படிப்புப் படித்தார். பின்னர் உ.பி. மாநிலம் அலிகரிலுள்ள புகழ்பெற்ற முஸ்லிம் பல்கலைக் கழகத்தில் சேர்ந்து முதுகலை பட்டப்படிப்பையும் இஸ்லாமிய இறைமையியல் பட்டப்படிப்பையும் படித்து முடிந்தார்.
எழுத்துப்பணி:
மௌலவி அப்துல் வஹாப் சாகிப் இளமையிலேயே எழுதுவதில் ஆர்வம் கொண்டவராகத் திகழ்ந்தார். எழுத்தாளர் ஹஸன் ஆர்வமூட்டியதன் பேரில் முதன் முதலாக ஆனந்தவிகடன் வார இதழுக்கு சிறுகதை ஒன்று எழுதி அனுப்பினார். ‘மூன்றாம் கேள்வி’ என்ற தலைப்புக் கொண்ட அச்சிறுகதை அவ்விதழில் வெளியானது. பின்னர் தொடர்ந்து குமுதம் போன்ற இதழ்களிலும் கதை, கட்டுரைகள் எழுதினார். இவர் எழுதிய முதல் சரித்திரக் கதையினை நாராண. துரைக்கண்ணன் என்பவர் நடத்தி வந்த பிரசன்ட விகடன் என்ற இதழ் வெளியிட்டது.

சுதேசமித்திரன் பத்திரிகையில் இஸ்லாமிய நூல்கள் குறித்த மதிப்புரைகளைத் தொடர்ந்து எழுதி வந்தார். திருப்பத்தூர் நூர்முகம்மது நடத்திய ‘கதிர்’ என்ற மாத ஏட்டின் ஆசிரியர் குழுவிலும் சில காலம் இருந்தார். ‘டெக்கான் ஹெரால்டு’ என்ற ஆங்கில நாளிதழில் “Talking Point” என்ற தலைப்பில் அப்போதைய நாட்டு நடப்புகளை எழுதினார். காயிதேமில்லத் அவர்களால் தொடங்கப்பட்ட ‘முஸ்லிம்’ நாளேட்டின் தலையங்க ஆசிரியராகச் சிலகாலம் பணியாற்றினார். சிராஜுல் மில்லத் அப்துஸ்ஸமது சாகிப் 1951 ஆம் ஆண்டு மணிவிளக்கு மாத இதழைத் தொடங்கிய போது அதன் ஆசிரியர் குழுவில் இவரும் இருந்தார். அந்த இதழில் திருக்குர்ஆனின் சிறப்புக்கள் குறித்து ‘தித்திக்கும் திருமறை’ என்ற தலைப்பில் தொடர் ஒன்று எழுதினார். அவரது சகோதரியின் புதல்வரான மீரான் 1956 ஆம் ஆண்டு ‘பிறை’ என்ற மாத இதழைத் தொடங்கிய போது அதன் பொறுப்பாசிரியராகப் பணியாற்றினார். அந்த இதழிலும் ‘தித்திக்கும் திருமறை’ த் தொடரை எழுதி வந்தார். இந்தத் தொடர் வாசகர்களிடையே பெருத்த வரவேற்பைப் பெற்றது. இது பின்னர் நூலாக வெளிவந்தது. இந்த நூலுக்குத் தமிழக அரசு சிறப்பு விருது வழங்கியது குறிப்பிடத்தக்கதாகும். நல்மணிகள் நால்வர், நவீன இப்னு பதூதா, சுவர்க்கத்துக் கவிஞன், மாநபியின் மகளார், Wisdom of Quran, இஸ்லாமிய மேதைகள் ஆகியன இவர் எழுதிய பிற நூல்களாகும்.

3. muthal thalaimurai 33. muthal thalaimurai 43. muthal thalaimurai 6
அல்லாமா இக்பாலின் ஷிக்வா ஜவாபே ஷிக்வா என்ற உருது நெடுங்கதையைத் தமிழில் மொழி பெயர்த்து வெளியிட்டார். இவரது எழுத்துப் பணிகளுக்குச் சிகரம் வைத்தாற் போல் அமைந்திருப்பது இஸ்லாமியத் தத்துவ மேதை இமாம் கஸ்ஸாலியின் ‘இஹ்யாவு உலூமித்தீன்’ என்ற மாபெரும் நூலை இவர் தமிழில் மொழி பெயர்த்து வெளியிட்டதாகும். பல்வேறு தலைப்புகளில் இது 26 நூல்களாக வெளி வந்து வாசகர்களிடையே பெரும் வரவேற்பைப் பெற்றது. இன்றைக்கும் இந்த நூல்கள் பல பதிப்புகளைக் கண்டு சாதனைகள் நிகழ்த்தி வருகின்றன.
1980 ஆம் ஆண்டு குமுதம் வார இதழில் பேராசிரியர ஓக் என்ற இந்துத்துவ வரலாற்றாசிரியர் தாஜ்மகால் ஒரு இந்துக் கோயிலாக இருந்ததாகவும், மொகலாய மன்னர் ஷாஜஹான் அந்த கோயிலில் பெருமளவு மாற்றங்கள் செய்து அதனை தனது மனைவியின் கல்லறையாக்கி விட்டதாகவும் எழுதியிருந்தார். பேராசிரியர் ஓக்கின் இந்த வரலாற்றுத் திரிபு வாதங்களை மறுத்து மௌலவி அப்துல் வஹாப் சாகிப் அதே குமுதம் இதழில் அடுத்து எழுதிய கட்டுரையில் தாஜ்மகால் மாமன்னர் ஷாஜஹானால் கட்டப்பட்டதே என்பதை வரலாற்று ஆதாரங்களுடன் நிறுவியிருந்தார்.
திருக்குர்ஆனின் பதினான்காம் நூற்றாண்டு மலரையும் இவர் தொகுத்து வெளியிட்டார். இது ஒரு அரிய களஞ்சியமாக இன்றைக்கும் கருதப்படுகின்றது. பிற எழுத்தாளர்கள் எழுதிய பல நூல்களுக்கு மதிப்புரைகள் எழுதியுள்ளார்.
தோப்பில் முகம்மது மீரான், அதிரை அகமது, எம்.ஏ. அக்பர், ஆளூர் ஜலால், ஷேக்கோ போன்ற முஸ்லிம் எழுத்தாளர்களைப் பெரிதும் ஊக்குவித்தார். அவர்களது படைப்புகளை ‘மணிவிளக்கிலும்’, ‘பிறை’யிலும் இடம் பெறச் செய்து அவர்களது எழுத்துத் திறமையினை உலகறியச் செய்தார்.
சொற்பொழிவாளர்:
மேடையில் இவர் தான் ஏறின்
மிக்குயர் பேச்சாளர்கள்
தாடையில் கை வைக்கத்தான்
தடையில்லாதவராய் ஆவர்.
கூடையில் விரித்த பூக்கள்
கொடியிலே ஏறிக் கொள்ள
ஓடையில் இறங்கும் நீரும்
உயரேறும் இவரின் பேச்சால்

இப்படி மௌலவி அப்துல் வஹாப் சாகிபின் பேச்சாற்றலைப் புகழ்ந்தேத்துகின்றார் தத்துவக் கவிஞர் இ.பத்ருதீன்.

ஆம் மௌலவி அப்துல் வஹாப் ஒரு சிறந்த எழுத்தாளர் மட்டுமல்ல ஒரு மிகச் சிறந்த பேச்சாளராகவும் திகழ்ந்தார். முப்பது, நாற்பது ஆண்டுகளாக இவரது கருத்தாழமிக்க உரைகளால் இஸ்லாமிய மாநாடுகளும், கருத்தரங்குகளும், மீலாது நிகழ்ச்சிகளும் வலிவும் பொலிவும் அடைந்தன. தமிழகத்தின் எந்த ஒரு மூலை முடுக்கில் இஸ்லாமிய மாநாடுகள் நடந்தாலும் அங்கு இவர் இருப்பார். இவரது உரையினைக் கேட்பதற்கென்றே ஒரு ரசிகர் கூட்டம் இருந்தது என்றால் மிகையல்ல.
தமிழ் மட்டுமின்றி ஆங்கிலம், மலையாளம், உருது, அரபி ஆகிய மொழிகளிலும் எழுதவும் பேசவும் வல்லமை பெற்றிருந்தார். தமிழகம் மட்டுமின்றி மலேசியா, சிங்கப்பூர், பர்மா, அரபு நாடுகள், அமெரிக்கா என உலகின் பல பகுதிகளுக்கும் சென்று அங்கு நடைபெற்ற சமய மாநாடுகளிலும், மீலாதுக் கூட்டங்களிலும் கலந்து உரையாற்றியிருக்கிறார். இவர் கலந்து கொண்ட கூட்டங்களின் எண்ணிக்கை 3500யைத் தாண்டும்.
இவரது உரைகள் பெரும்பாலும் இஸ்லாமிய சமயம், இஸ்லாமிய அரசியல், பொருளியல் ஆகிய விஷயங்களைச் சுற்றியே இருக்கும். 2002 ஆம் ஆண்டு துபாயில் நடைபெற்ற கூட்டம் ஒன்றில் ’Time and Distance’ என்ற தலைப்பில் இவர் ஆற்றிய உரை குறிப்பிடத்தக்க ஒன்றாகும். எல்லையற்ற காலம், பிரபஞ்ச அமைப்பில் அமைந்துள்ள தூரத்தின் பரிமாணம் ஆகிய இந்த இரண்டையும் இறைவனின் ஆற்றலுடன் இணைத்து இவர் ஆற்றிய உரை அனைவரையும் கவர்ந்திழுத்தது. (இதுவே இவரது இறுதி உரையாகவும் அமைந்தது)
சமயப் பணிகள்:
மௌலவி சாகிப் இஸ்லாமிய சமயப் பணிகளில் பெரும் ஆர்வம் கொண்டிருந்தார். சென்னை மண்ணடியிலுள்ள K.T.M. மன்ஸிலிலும், மஸ்ஜிதே மாமூர் பள்ளிவாசலிலும் ஒவ்வொரு ஞாயிற்றுக்கிழமையும் குர்ஆன் விரிவுரை வகுப்புகள் நடத்தி வந்தார். மௌலான மௌலவி K.M. நிஜாமுதீன் பாகவி ஹழ்ரத் அவர்களுடன் இணைந்து குர்ஆன் தர்ஜுமா வெளியிட்டார். திருக்குர்ஆன் அருளப் பெற்று 1400 ஆண்டுகள் நிறைவு பெற்றதையொட்டி தமிழகமெங்கும் குர்ஆன் மாநாடுகள் நடைபெற்றன. இம்மாநாடுகள் பலவற்றில் இவர் கலந்து கொண்டு திருக்குர்ஆனின் சிறப்புகளை விரிவாக எடுத்துரைத்தார். பேராசிரியர் திருவை. அப்துல் ரகுமானின் திருக்குர்ஆன் ஒலி நாடா வருவதற்குப் பெரிதும் துணைபுரிந்தார். தன்னுடன் பணியாற்றிய, தான் சந்திக்கின்ற பிற சமய நண்பர்களிடம் இஸ்லாமிய சிறப்பியல்புகளை எடுத்துக் கூறுவார். திருக்குர்ஆன் தற்காலத்திற்குப் பொருந்தாது என தி.மு.க தலைவர்களில் ஒருவரான நாவலர் நெடுஞ்செழியன் சென்னையில் நடைபெற்ற ஒரு கூட்டத்தில் பேசியபோது அவரை நேரில் சந்தித்து விளக்கமளித்தார்.
இலக்கிய ஈடுபாடு:
இஸ்லாமிய இலக்கியத்தில் அவர் மிகுந்த ஈடுபாடு கொண்டிருந்தார். இஸ்லாமிய இலக்கியம் குறித்து சென்னை வானொலியில் இவர் ஆற்றிய உரை குறிப்பிடத்தக்க ஒன்றாகும். ஒருமணி நேரம் ஆற்றிய அவ்வுரையில் உலக, இந்திய, தமிழக முக்கிய இஸ்லாமிய இலக்கியங்கள் அனைத்தையும் கோடிட்டுக் காட்டியுள்ளார். இவ் உரையில் இமாம் கஸ்ஸாலி அவர்கள் குறித்து அவர் குறிப்பிட்டிருந்தாவது :-
''இஹ்யாவுல் உலூம் (கல்வி ஞானங்களின் உயிர்ப்பு) கீமியாயே ஸஆத்த (பேரின்ப ரசவாதம்) போன்ற அரும் பெரும் நூல்களை யாத்த இமாம் கஸ்ஸாலி அவர்களை "அல் கேஸில்" என்று பெயரிட்டுப் போற்றி அவர்களது தத்துவ விளக்கங்களால் மேலை நாடுகள் பெரிதும் பயனடைந்தன. மனுக்குலம் முழுவதும் தோற்றுவித்த இலக்கியத்தின் பட்டியலைத் தொகுத்துப் பார்த்தால், அதிலும் இமாம் கஸ்ஸாலியின் பங்கு கணிசமாயிருக்கும். அனைத்துலக அறிஞர் குழாம் போற்றிப் புகழுமாறு சீரருமைத் திறம் படைத்த சிந்தனைச் சிற்பியாக, பேரொளி அகத்தே பெற்ற பேச்சாளராக, அறிஞர்மொழி அரபியிலும், விந்தை மொழி பார்சியிலும் ஆயும் திறன் படைத்த ஆசிரியராக, ஒப்பாரும் மிக்காரும் இல்லாத எழுத்தாளராக, மக்களை மட்டுமல்லாமல் பிராணிகளையும், பறவைகளையும் கூட நேசித்த நெஞ்சுடையவராக, தூய வாழ்வு வாழ்வதற்காக துறவறம் பூணும் அளவுக்கு நெறி பிறழாத நிறை நீதராக, கற்றோரையும், மற்றோரையும் களிப்படையச் செய்யும் கருத்துக் கருவூலமாக, அறிவுலகத்தின் அணைந்திடாப் பேரொளியாக இன்றும் விளங்கும் இமாம் கஸ்ஸாலியின் அரபி மொழியிலான நூல்களை மொழி பெயர்த்து வெளியிடும் பணியில் ஐக்கிய நாடுகள் சபையின் கலாச்சாரப் பிரிவு முதல் நூலாக ‘யா அய்யுஹல் வலது’ (குழந்தையே) என்னும் புத்தகத்தின் மொழி பெயர்ப்பை வெளிக் கொணர்ந்துள்ளது.’
தமிழகத்தில் இயங்கி வரும் இஸ்லாமிய இலக்கியக் கழகத்திலும் அவர் ஈடுபாடு கொண்டிருந்தார். 1978ஆம் ஆண்டு ஜனவரி மாதம் காயல்பட்டினத்தில் நடைபெற்ற அனைத்துலக இஸ்லாமிய இலக்கிய மாநாட்டில் கலந்து கொண்டு உரையாற்றினார்.
சமூக உறவு:
மௌலவி சாகிப் பட்டப் படிப்பு முடிந்ததும் இந்தியத் தபால் - தந்தித் துறையின் தணிக்கைப் பிரிவில் தணிக்கையாளராக 1943ஆம் ஆண்டு பணியில் சேர்ந்தார். அரசுப் பணியில் இருந்து கொண்டேதான் அவர் எழுத்துப் பணியையும், பேச்சுப் பணியையும், சமயப் பணியையும் தொடர்ந்தார். அரசுப் பணி, பொதுப்பணி என இந்த இரண்டு பணிகளுக்கும் பாதிப்பு இல்லாமல் தனது செயல்பாடுகளை கவனமாக வகுத்துக் கொண்டார். எனவே அவருக்கு அரசுப் பணியில் எந்தவிதமான பிரச்சனையும் ஏற்படவில்லை. முஸ்லிம் அரசியலில் அவருக்கு மிகுந்த நாட்டம் இருந்த போதிலும், வெளிப்படையான கட்சி அரசியலில் அவர் ஈடுபடவில்லை. எனினும் முஸ்லிம் லீக் தலைவர்களான கண்ணியத்திற்குரிய காயிதேமில்லத் இஸ்மாயில் சாகிபு, சிராஜுல் மில்லத் அப்துல் சமது சாகிப் ஆகியோருடன் மிகுந்த நல்லுறவும் தோழமையும் கொண்டிருந்தார். மனத்தளவில் அவர் ஒரு முஸ்லிம் லீகராகவே இருந்தார். 1978ஆம் ஆண்டு இலாகா பணியிலிருந்து ஓய்வு பெற்ற உடன் அப்போதையத் தமிழ் மாநில முஸ்லிம் லீகின் தலைவர் சிராஜுல் மில்லத் அப்துல் சமது சாகிப் முன்னிலையில் அக்கட்சியில் உறுப்பினராகச் சேர்ந்தார். தனது ஆயுட் காலம் முடியும்வரை முஸ்லிம் லீக்கிலேயே தொடர்ந்து இருந்து வந்தார். கட்சியில் அவருக்குப் பதவிகள் வழங்கப்பட்ட போதும் அதனை ஏற்க மறுத்து ஒரு தொண்டராகவே இருந்தார்.
பள்ளப்பட்டி நகரில் பொதுக் கல்வியும், மார்க்கக் கல்வியும் இணைந்து கற்பிக்கும் வண்ணம் தொடங்கப்பட்ட உஸ்வத்துல் ஹஸனா மகளிர் ஓரியண்டல் பள்ளிக் கூடத்தின் ஆரம்ப கட்டச் செயல்பாடுகளில் மௌலவி சாகிப் வழிகாட்டியாக இருந்து உறுதுணை புரிந்ததாக அந்தப் பள்ளியில் 19 ஆண்டுகள் தலைமையாசிரியராகப் பணியாற்றிய பேராசிரியை கமருன்னிஸா பேகம் தெரிவிக்கின்றார்.
மாநில வக்ப் வாரியத்தின் உறுப்பினராகவும் சென்னையிலுள்ள சில பள்ளிவாசல்களின் பொறுப்பாளராகவும் பதவிகள் வகித்துள்ளார்.
ஆளுமைப் பண்புகள்:
அழகிய தொப்பி, வெளுத்த மீசை, தாடி, ஊதா நிறக்கோட்டு, வெள்ளைப் பேண்டு, கட்சூ – இவை தான் மௌலவி சாகிபின் தோற்றப் பொலிவாகும். எப்போதும் புன்னகையுடன் இருப்பார். அவர் மிகச் சிறந்த அறிஞராகத் திகழ்ந்தபோதிலும், மிகுந்த தன்னடக்கத்துடன் இருப்பார். தன்னுடைய பேச்சிலோ, எழுத்திலோ ஏதேனும் தவறு இருப்பதாக யாரேனும் சுட்டிக் காட்டினால் அதனை மகிழ்ச்சியுடன் ஏற்றுத் திருத்திக் கொள்வார். அதே நேரத்தில் யாரேனும் தவறான கருத்தை எழுதினால் அல்லது பேசினால் அதனைச் சுட்டிக் காட்டவும் தயக்க மாட்டார். பொது நிகழ்ச்சிகளிலும், மாநாடுகளிலும் மௌலவி சாகிப் கடைசிப் பேச்சாளராகத்தான் அழைக்கப்படுவார். இருப்பினும் ஆரம்பத்திலேயே மேடைக்கு வந்து அமர்ந்து மற்றவர்கள் பேசுவதையும் கவனமாகக் கேட்பார். உரையை நிறைவு செய்ததும் அவர்கள் தெரிவித்த நல்ல கருத்துக்களுக்குப் பாராட்டுத் தெரிவிப்பார். தவறான செய்திகளையும், விழாவுக்குப் பொருத்தமில்லாத தகவல்களையும் தெரிவிக்கின்ற பேச்சாளர்களிடம் அவற்றை நயமாகச் சுட்டிக் காட்டுவார். கொடுக்கப்பட்ட தலைப்பில் நின்று அது சம்பந்தமான ஆழ்ந்த கருத்துக்களைப் பேச வேண்டும் என விரும்புவார். இஸ்லாமியத் தத்துவ அறிஞர் இமாம் கஸ்ஸாலி அவர்கள் மீது மிகுந்த பற்றுக் கொண்டவராகத் திகழ்ந்தார்.
இஸ்லாமிய சமயக் கடமைகளைப் பேணுவதில் அவர் மிகுந்த கண்ணும் கதுத்துமாக இருப்பார். ஒரு முறை சென்னை கலைவாணர் அரங்கில் நடைபெற்ற பொது நிகழ்ச்சியில் கலந்து கொண்ட அப்போதைய ஜனாதிபதி ஜெயில்சிங் ஆற்றிய உரையை மொழிபெயர்க்கும் பணி மௌலவி சாகிப்பிற்கு வழங்கப்பட்டிருந்தது. மாலையில் நடைபெற்ற அந் நிகழ்ச்சியில் ஜனாதிபதி 10 நிமிடங்கள் மட்டுமே பேசுவர் என அவருக்குத் தெரிவிக்கப்பட்டிருந்தது.
எனினும் பேசத் தொடங்கிய ஜனாதிபதி பத்து நிமிடங்களையும் தாண்டி உற்சாகமாகப் பேசிக் கொண்டிருந்தார். அப்போது மகரிப் தொழுகைக்கான நேரம் நெருங்கிக் கொண்டிருந்தது. ஜனாதிபதியின் உரையை மொழி பெயர்த்துக் கொண்டிருந்த மௌலவி சாகிப் இடையிடையே தனது கைக்கடிகாரத்தையும் பார்த்துக் கொண்டிருந்தார். ஆனால் ஜனாதிபதி பேச்சை நிறுத்துவதாகத் தெரியவில்லை. அப்போது மௌலவி சாகிப் ஜனாதிபதியிடம் ‘மாண்புமிகு ஜனாதிபதி அவர்களே, முஸ்லிம்களாகிய நாங்கள் கட்டாயமாகத் தொழ வேண்டிய குறைவான நேர இடைவெளியேயுள்ள மக்ரிப் தொழுகை தொழ வேண்டும். எனவே நான் இத்துடன் என் பொறுப்பிலிருந்து விடைபெற்றுக் கொள்கிறேன். மன்னிக்கவும் என்று கூறி விட்டு மேடையிலிருந்து இறங்கித் தொழுகைக்குச் சென்று விட்டார். எந்தச் சூழ்நிலையிலும் தொழுகையைத் தவற விட்டு விடக்கூடாது என்பதில் அவர் கண்ணும் கருத்துமாக இருந்தார் என்பதையே இந்நிகழ்ச்சி எடுத்துக் காட்டுகிறது.
ஒருமுறை ஒரு ஊரில் நடைபெற்ற மீலாது விழாவில் கலந்து கொண்ட அவருக்கு விழா முடிந்ததும் அவ்வூர் செல்வந்தர் ஒருவரின் வீட்டில் விருந்தளிக்கப்பட்டது. அப்போது அவருக்கு வெள்ளிக்கிண்ணம் ஒன்றில் மாதுளைச்சாறு வழங்கப்பட்டது. இதனைக் கண்ட அவர் வெள்ளிப் பாத்திரத்தில் பருகுவது நபிகளின் வழி முறைக்கு முரண்பட்டது என்று கூறி அதனை அருந்த மறுத்துவிட்டார். பின்னர் சாதாரணக் குவளையில் பழச்சாறு கொடுக்கப்பட்டபோது தான் அதனை அருந்தினார்.

3. muthal thalaimurai 9
பொறுப்புகள் – பதவிகள்:
மௌலவி சாகிப் சக எழுத்தாளர்களிடம் நல்லுறவு கொண்டிருந்தார். அவரது அலுவலகத்திலேயே பி.எஸ். கல்யாணராமன், பாலசுப்பிரமணியன், கோமதி சுவாமிநாதன், லூர்துநாதன் ஆகிய மிகச் சிறந்த எழுத்தாளர்கள் இருந்தனர். எழுத்தாளர் அமைப்புகளுடனும் அவர் தொடர்பு கொண்டிருந்தார். தமிழ் எழுத்தாளர் சங்கத்தின் துணைத் தலைவராகவும், இந்திய நூலாசிரியர் சங்கத்தின் துணைத் தலைவராகவும் பதவிகள் வகித்துள்ளார். 28.9.1992 அன்று இலங்கையின் தலைநகர் கொழும்புவில் நடைபெற்ற விழா ஒன்றில் இவருக்கு ‘செய்குத் தர்ஜுமா’ என்ற பட்டம் வழங்கப்பட்டது.
குடும்பம்: அப்துல் வஹாப் சாகிபிற்கு முகம்மது இஸ்மாயில் ஜின்னா, அப்துல் ஹக், தாஹா இப்ராகிம் புகாரி, கஸ்ஸாலி, முகம்மது சித்தீக் என ஐந்து மகன்களும் இரண்டு மகள்களும் உண்டு. மக்கள் அனைவரும் பல்வேறு பொறுப்புகளும் பதவிகளும் வகித்து வாழ்வாங்கு வாழ்ந்து வருகின்றனர்.
முடிவுரை:
சில நாட்கள் உடல் நலிவுற்றிருந்த அப்துல் வஹாப் சாகிப் தனது 82 வது வயதில் 26.12.2002 அன்று மரணமுற்றார். ‘நம்முடைய நேசத்திற்குரிய ஒவ்வொருவரின் பிரிவிலும் நம்மில் ஒரு பகுதியை இழந்து விடுவதாகவே தெரிகிறது. எனினும், மழை நின்ற பிறகும் இலைகளிலிருந்து சொட்டும் நீர்த்துளிகளைப் போல சிலரின் மறைவுக்குப் பின்னரும் நம் நெஞ்சங்களை நனைக்கும் நினைவுத் துளிகள் நம் வாழ்வை வளப்படுத்தவே செய்கின்றன. அத்தகைய மாமழை போன்று உலகைச் செழிக்கச் செய்த மவ்லானா அவர்களை நமக்குத் தந்த இறைவனுக்கே எல்லாம் புகழும்’ என்று அவரது நினைவைப் போற்றும் வண்ணம் குறிப்பிடுகின்றார் அவரது புதல்வர் அப்துல்ஹக். அவரது கருத்துக்களை நாமும் வழிமொழிகிறோம். மௌலவி அப்துல் வஹாப் சாகிப் தமிழகம் கண்ட மிகச் சிறந்த மார்க்க அறிஞர்களில் ஒருவர். பலருக்கும் அவர் வழி காட்டியாகத் திகழ்ந்தார். அவரது வாழ்க்கையில் அனைவருக்கும் ஒரு சிறந்த முன் மாதிரி இருக்கின்றது.
ஆதார நூல்: திரியெம் பப்ளிஷர்ஸ் வெளியிட்டுள்ள ‘அல்லாமா அப்துல் வஹாப் சாகிப் நினைவுத் தொகுப்பு’ என்ற நூல்.
கட்டுரையாளருடன் தொடர்பு கொள்ள ... 99767 35561

என்.ஜாஹிர் உசேன், மருந்தாளுநர், மனித வள மேம்பாடு மற்றும் தொழில் முனைவோர் பயிற்சியாளர், தொடர்பு எண் : +91 98427 03690, +91 75982 03690 இம்மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.
ஆசிரியர் அறிமுகம்
(என்.ஜாஹிர் உசேன் அவர்கள், ஈரோட்டில் வசித்து வருகிறார். 32 வருடங்களாக மருந்து வணிக நிறுவனம் நடத்தி வருகிறார். 15 வருடங்களாக மனிதவள மேம்பாடு தொழில் முனைவோர் பயிற்சி வகுப்புகளையும் நடத்தி வருகிறார். “கற்றதையும் பெற்றதையும் யார் திருப்பி தருகின்றாரோ அவர்தான் இறைவனிடத்தில் பெறுவதற்கும் கேட்பதற்கும் தகுதியானவர்” என்ற எண்ணத்தின் காரணமாக தான் கற்ற, பெற்ற, படித்து அறிந்து புரிந்து கொண்ட அனுபவங்களை, பல்வேறு துறைகளில் வெற்றி பெற்றவர்களின் வாழ்வியல் செய்திகளையும் நல்கருத்துக்களையும் இளைய தலைமுறையினர், சுய தொழில் செய்ய வேண்டும் என்ற எண்ணம் கொண்டவர்கள், தொழில் முனைவோர்கள், சுய தொழில் குழு பெண்கள், பெண்கள் அமைப்பில் உள்ளவர்கள் ஆகியோருக்கு தன்னம்பிக்கை (self confidence) ஆளுமைத் திறன் மேம்பாடு (Personality Development) பெண்ணாலும் முடியும் (women can) தொழில் முனைவோர் மேம்பாடு (Entrepreneurship Development) என்ற தலைப்புகளில் பயிற்சி வகுப்புகள் நடத்தி வருகிறார். மேலும் பெற்றோர்களுக்கு “பெற்றோர்கள் சாதனையாளர்களின் முகவரி” (Parents are Address of Achievers) ஆசிரியர்களுக்கு “ஆசிரியர்களே மாணவர்களின் முன்மாதிரி (Teachers Are Role Models of students)’ பணியாளர்களுக்கு “பணித்திறன் மேம்பாடு (Employability)’ போன்ற தலைப்புகளில் 1000 க்கும் மேற்பட்ட பயிற்சி வகுப்புகளை கல்வி நிறுவனங்கள், மத்திய, மாநில அரசுத் துறைகள், தனியார் நிறுவனங்கள் மூலம் நடத்தியுள்ளார். பல்வேறு புத்தகங்கள் மேலும் பல கட்டுரைகளை எழுதியுள்ளார். ஆளுமை திறன் கொண்ட தொழில் முனைவோர்கள் பல்லாயிரக்கணக்கானவர்களை உருவாக்குவதே அவரது வாழ்நாள் லட்சிமாக கொண்டுள்ளார். அவருக்கு எல்லாம் வல்ல இறைவன் அருள் செய்வானாக.)
எல்லாப் புகழும் இறைவனுக்கே. இறைவனின் சாந்தியும் சமாதானமும் அனைவரின் மீதும் உண்டாவதாக…
தொழிலும் நாமும் வேறல்ல! தொழில்தான் நமது வேர்
கல்வி மற்றும் பொருளாதார மேம்பாடு இரண்டின் மூலம்தான் குடும்பங்கள் மற்றும் ஒரு தேசத்தின் வளர்ச்சி அளவிடப்படுகிறது.
எல்லாம் வல்ல இறைவன் அருளால், சிறு மற்று குறு தொழில் செய்பவர்கள் மற்றும் புதிதாக தொழில் துவங்க எண்ணம் கொண்டவர்களுக்கு தொழில் செய்யும் தன்னம்பிக்கை, ஊக்கம் மற்றும் உற்சாகத்தையும் தொழில் செய்வதற்கான வழிமுறைகள், செயல் திட்டங்களை “தொழில் செய்வோம் வளம் பெறுவோம்” என்ற பெயரில் தொடராக நமது சமூகநீதி முரசு மாத இதழ் மூலம் தருவதில் மிகுந்த மகிழ்ச்சி அடைகிறேன்.
உலக அளவிலும் சரி, நமது தேச அளவிலும் சரி 80% பொருளாதாரத்தை கையாளுபவர்கள் 20% தொழில்துறையில் உள்ளவர்கள் தான் என்பது 100% நிதர்சன உண்மை.
இப்படிப்பட்ட மதிப்புமிக்க, பொருளாதார வளர்ச்சியைத் தரும் தொழில் துறையில் ஈடுபட்டு வெற்றி பெற எல்லோராலும் முடியும்.
அதற்காக அளப்பரிய ஆற்றல், அறிவு, திறமை, வாய்ப்புகள் அனைத்தையும் எல்லாம் வல்ல இறைவன் அனைத்து மனிதர்களுக்கும் தந்துள்ளான். இதை முழு நம்பிக்கையுடன் முழு அர்ப்பணிப்புடன் செயல்படுத்தியவர்கள்தான் எத்துறையாயினும் தனி முத்திரை பதித்த சாதனையாளர்கள்.
தொழில் துறையில் நிறைய பேர் தயக்கம் கொள்ள சொல்லும் காரணங்கள்,தொழில் துவங்க நிறைய பணம் தேவை, நிரம்ப படிப்பறிவு வேண்டும். நஷ்டம் ஆகிவிட்டால் பணத்தை இழந்து விடுவோமா என்ற பயம் ஏன் தேவையில்லாத ரிஸ்க் எடுக்க வேண்டும் போன்ற பல்வேறு எதிர்மறை எண்ணங்களை (Negative Thoughts) மற்றும் தாழ்வு மனப்பான்மையை (Inferiority Complex) கொண்டுள்ளது.
இன்றைய தினங்களில் தேசிய அளவில் மட்டுமல்ல நமது மாநிலத்தில் உள்ள தொழில்துறை சாதனையாளர்கள் பெரும்பான்மையினர் பள்ளிப் படிப்பைக் கூட நிறைவு செய்யாதவர்கள், மிக மிக சொற்ப தொகையைக் கொண்டு தொழில் துறைக்கு வந்தவர்கள், வளரும் போது அந்த சொற்ப தொகை கூட இல்லாதவர்கள் பலரும் கூட இன்று நேரடியாகவும், மறைமுகமாகவும் தன் தொழில் நிறுவனத்தின் மூலம் பல்லாயிரக்கணக்கானவர்களுக்கு தன் நிறுவனத்தின் மூலம் சிறு குறு தொழில் வாய்ப்புகள் மற்றும் வேலை வாய்ப்புகளை வழங்கிக் கொண்டுள்ளார்கள். வருடா வருடம் பல லட்சம் ரூபாய்களை கல்வி உதவித் தொகைகளை கொடையாக வழங்கிக் கொண்டு இருக்கிறார்கள்.
தொழில் துறையில் நுழைவதற்கு படிப்பு, பணம் தேவையில்லை என்பது இதன் அர்த்தமில்லை. அவை வாழ்வதற்கான ஓர் கருவி மட்டுமே, அவை இருந்தால் மட்டுமே தொழில்துறையில் வெற்றி பெற முடியும் என்று காரணம் கூறாமல், சூழ்நிலையை காரணம் காட்டாமல் சாதித்தவர்கள்தான் முன்மாதிரி சாதனையாளர் என்ற வகையில் குறிப்பிட்டுள்ளேன். அவர்கள் எதிர்மறை சூழ்நிலைகளைக் காரணம் காட்டாமல் வெற்றிக்கான சூழ்நிலைகளை உருவாக்கிக் கொண்டவர்கள்.
தான் விரும்பும் தொழில் துறையில் இன்றைய சாதனையாளர்கள் 10 தாரக மந்திரத்தை வெற்றிக்கான சூத்திரங்களை தன் மனதில் ஆழமாக விதைத்து உள்ளத்தால் உணர்வால் முழு அர்ப்பணிப்புடன் செயல்படுத்தியுள்ளார்கள்.
சாதனையாளர்கள் சாதனைக்கோர் பாதை அமைத்து வெற்றி கொண்டுள்ள 10 தாரக மந்திரங்கள்.
1. தன்னம்பிக்கை (Self - Confidence)
2. இலக்குகளை தீர்மானித்தல் (Goal Setting)
3. முடிவெடுக்கும் திறன் (Decision Making)
4. விடா முயற்சி (Perseverance)
5. பிரச்சனைகளைத் தீர்த்தல் (Problem Solving)
6. வாய்ப்புகளை பயன்படுத்துதல் (Opportunities Utilization)
7. நேர மேலாண்மை (Time Management)
8. மனித உறவுகள் (Human Relations)
9. மாற்றம் / புதுப்பித்தல் (Changes – Update)
10. சந்தைப்படுத்துதல் (Marketing)
இந்த 10 தாரக மந்திரங்களை முழுமனதுடன் அர்ப்பணிப்பு உணர்வுடன் செயல்படுத்தினால் நம்மாலும் சாதிக்க முடியும்.
முயற்சியும் பயிற்சியும் செய்தால் சாதாரணமானவர்களும் சாதனையாளராகலாம்.

தொடரும்…