saleem

saleem

Write on புதன்கிழமை, 10 அக்டோபர் 2018
Write on புதன்கிழமை, 10 அக்டோபர் 2018

வட்டியை ஒழிக்க நபிகளார் இஸ்லாத்தை நிபந்தனையாக விதிக்கவில்லை.
*****************************
நாட்டில் உள்ள அனைவரும் முதலில் இஸ்லாத்தை தழுவ வேண்டும் என்ற எந்த நிபந்தனையையும் நபிகளார் விதிக்கவில்லை.
*****************************
இந்தியச் சமூகத்தின் வறுமை ஏழ்மை அறியாமை போன்ற திட்டமிட்டு உண்டாக்கப்பட்ட பின்னடைவுகளுக்கும் கொலை கொள்ளை தற்கொலை லஞ்சம் ஊழல் விபச்சாரம் போன்ற சமூக வர்க்க சீரழிவுகளுக்கு அடிப்படை காரணமாகவும் ஆதராமாகவும் இருப்பது வட்டி அடிப்படையிலான ஈனத்தனமான ஆட்சி முறை தான்.
130 கோடி இந்திய சமூகத்தில் 20 கோடி முஸ்லிம்கள் தவிர்த்த சமூகத்தில் வட்டித் தொழில் தவறில்லை அது எதார்த்தமானது அதிகம் சிரமப்படாமல் சம்பாதிக்கும் கலைகளில் முதன்மையானது என்ற சிந்தனையை ஆழமாக விதைத்து அதில் வெற்றியும் கண்டுள்ளனர்.
வட்டி பெரும்பாவம் என்ற சித்தாந்தத்தைக் கொண்டுள்ள முஸ்லிம்களும் வேறு வழியில்லாமல் எதாவது ஒரு வகையில் வட்டியுடன் தொடர்புடைய மக்களாக மாறிவிட்டனர். யாராலும் மறுக்க இயலாத அளவிற்கு எதாவது ஒரு வகையில் வட்டியுடன் புழங்க வேண்டிய கீழ்த்தரமான நிலைக்கு முஸ்லிம் சமூகம் விதிவிலக்கு இல்லாமல் பழகிவிட்டது. இது கடந்த 50 ஆண்டுகளில் திட்டமிட்டு விரிக்கப்பட்ட சர்வதேச சதிவலைகளின் விளைவுகள்.
உலகின் போக்கையும் நமது நாட்டின் திட்டங்களையும் ஆழமாக பார்த்தால் நாளைய நமது சந்ததி வேறு வழியில்லாமல் வட்டியிலேயே உழலப் போகிற ஆபத்தை நாம் உணர்ந்தாக வேண்டும்.
வட்டியை ஹராம் பெரும்பாவம் அபிவிருத்தியை எடுத்துவிடும் முகத்தின் அழகை அகற்றிவிடும் அடுத்தவரின் சாபத்தை அதிகமாக சம்பாதிக்கும் என்றெல்லாம் ஆன்மீக ரீதியாக பேசும் முஸ்லிம்கள்..... இதை அடிக்கடி ஜூம்ஆ மேடைகளில் ஆக்ரோஷமாக பேசி சொந்த சமூகத்திடம் அடிவாங்கிக்கொள்ளும் ஆலிம்கள் இதற்கான மாற்றுத்திட்டங்களை பொது சமூகத்திற்கும் அரசிற்கும் ஆதாரப்பூர்வமாக முன்வைக்க வேண்டும்.

வட்டி தான் அத்துனை சிக்கலுக்கும் மூல காரணம் என்றும் அது ஒரு பெரும்பாவம் என்றும் முஸ்லிம் அல்லாத மக்களுக்கு நுட்பமாகவும் ஆதரப்பூர்வமாகவும் கற்றுக் கொடுக்கும் திட்டங்கள் முஸ்லிம்களிடம் வேண்டும். அதேபோல வட்டியிலேயே ஊறிப்போயுள்ள அரசின் கொள்கை முடிவுகளில் கொஞ்சம் கொஞ்சமாக மாற்றத்தை கொண்டு வரும் நீண்டகாலத் திட்டங்களை அரசிற்கு நாம் வகுத்து கொடுத்து அரசாங்கத்தை நிர்பந்திக்க வேண்டும். அதற்கான தகுதி நமக்கு வேண்டும்.
அரசின் அனைத்து துறைகளுக்கும் இலகுவான வட்டித் தொடர்பு இல்லாத திட்டங்களை அவர்கள் ஏற்றுக்கொள்ளும் விதத்தில் முஸ்லிம்களால் முன்வைக்க முடியாமல் போனது ஏன் என்ற கேள்வியை நம் சமூகத்திற்குள் ஆழமாக எழுப்ப கடமைப்பட்டுள்ளோம்.
அல்குர்ஆன் முன்னிறுத்தும் வாழ்க்கை கலையை நபிகளாரின் சமூக சீர்திருத்தத் திட்டங்களை மனித சமூகத்தில் விதைத்து வழிகாட்டி அதனடிப்படையில் அமையப்பெற்ற வாழ்சூழலில் தன் வாழ்க்கையை அமைத்துக்கொள்வது தான் உயர்கல்வி கற்பவர்களின் தலையாய கடமை என்ற சத்தியப்பாதையில் கல்வி கற்காமல் வேலைவாய்பிற்கும் காசு சம்பாதிக்கவும் தான் கல்வி என்ற தவறான பாதையில் உயர்கல்வியை கற்றதால் கற்பதால் முஸ்லிம்கள் தங்களுக்குத் தாங்களே இழைத்துக்கொண்ட அநீதி இது.
பொருளியலில் ஆய்வு மேற்கொள்ளும் இன்றைய மாணவர்களிடம் வட்டி என்ற பெரும்பாவத்தை ஒழிக்க வேண்டும் என்ற முயற்சி இல்லாமல் இருப்பதை வைத்தே இந்த வட்டி சித்தாந்தம் முஸ்லிம் பிள்ளைகளின் மூளையில் ஆழமாக ஊடுருவிட்டதை உணர்ந்து கொள்ளலாம்.
உயர்கல்வி என்ற பெயரில் வட்டி அடிப்படையிலான முதலாளித்துவ கோட்பாட்டை தாங்கிப் பிடித்து அதிலேயே தங்களுக்கான வாழ்வாதாரத்தை தேடும் பட்டதாரிகளை உங்கள் வீடுகளில் இனிமேலும் உருவாக்காதீர்கள்.
பட்டினி கிடக்க நேரிட்டாலும் இந்த படுபாதக சித்தாந்தத்தை ஒழிப்பதற்கு நமது அறிவும் நேரமும் காலமும் பயன்படட்டும்.

Write on புதன்கிழமை, 10 அக்டோபர் 2018

‘‘பணமதிப்பு நீக்கம் செய்யப்பட்ட தொகையில் சொற்ப அளவை தவிர பெரும் மொத்த தொகையும் வங்கிக்கு வந்து விட்டது. அப்படியானால் வெறும் 13 ஆயிரம் கோடியை கைபற்றத்தான் இந்த பணமதிப்பு நீக்க நடவடிக்கை எடுக்கப்பட்டதா. இதற்காக நாடு மிகப்பெரிய விலை கொடுத்துள்ளது. 100க்கும் மேற்பட்டோர உயிரிழந்துள்ளனர். தினசரி கூலி பெறும் 15 கோடி மக்கள் தங்கள் வாழ்வாதாரத்தை இழந்து தவிக்கின்றனர்.
பல நூற்றுக்கணக்கான சிறு குறு தொழில் நிறுவனங்கள் முடங்கின. லட்சக்கணக்கானோர் வேலையிழந்து தவித்து வருகின்றனர். இதற்காக தான் இந்த பண மதிப்பு நீக்க நடவடிக்கை எடுக்கப்பட்டதா. 13 ஆயிரம் கோடி ரூபாய் சிக்கியதாக கூறும் நிலையில் அதுவும் கூட நேபாளம், பூட்டான் போன்ற நாடுகளில் தற்போது இருக்கலாம் அல்லது அழிக்கப்ப்டடு அழிக்கப்பட்டு இருக்கலாம்’’

Write on புதன்கிழமை, 10 அக்டோபர் 2018

“ரங்கநாத் மிஸ்ரா மற்றும் சச்சார் கமிட்டியை அமைத்த அரசு அதன் பரிந்துரைகளை நடைமுறைப்படுத்த தவறிவிட்டது. ஆட்சி மாற்றம் ஏற்பட்டு புதிய அரசு அமைந்தாலும் பிந்தைய அரசாங்கத்தால் நியமிக்கப்பட்ட ஓர் ஆணையத்தின் பரிந்துரைகளை அமல்படுத்த வேண்டும் என்பது ஜனநாயகக் கடமையாகும். இந்தக் கடமையிலிருந்து தவறினால், அது ஜனநாயக ரீதியிலான அரசாக இருக்க முடியாது”

Write on புதன்கிழமை, 10 அக்டோபர் 2018

"தோழர்களே, உங்களுக்கு நான் ஆலோசனை கூற வேண்டிய தேவையில்லை. நாம் அஞ்ச வேண்டிய, பதட்டப்பட வேண்டிய தேவையில்லை. அவர்களிடம் பெரும்பான்மை இருக்கலாம், நாடாளுமன்றத்தில் நிறைய சீட்டுகள் இருக்கலாம், அரசு இயந்திரம் காவல்துறை, இராணுவம் இருக்கலாம், இருந்தும், அவர்கள் கோழைகள். அவர்கள் நம்மை கண்டு அஞ்சுகிறார்கள். அவர்கள் நமது போராட்டங்களை கண்டு அஞ்சுகிறார்கள். நாம் சிந்திக்கிறோம் என்பதே அவர்களுக்கு அச்சுறுத்தலாக இருக்கிறது."

Write on புதன்கிழமை, 10 அக்டோபர் 2018

கீழ்திசை அறிதல் மரபிற்கும் (புரிந்து கொள்ளும் முறைமை) மேற்கத்திய அறிதல் மரபிற்கும் ஏராளமான வேறுபாடுகள் உள்ளன.
***************************
ஒரு நிகழ்வை கோட்பாட்டை அல்லது சட்டத்தை மேற்குலக மக்களின் புரிதலுக்கும் பின்பற்றுதலுக்கும் கீழ்திசை மக்களாகிய நாம் புரிந்து பின்பற்றுவதிலும் வேறுபட்ட இயல்புகள் உள்ளன. வாழ்க்கை முறையின் பின்புலத்தில் அமைந்துள்ள இந்த அறிதல் மரபிற்கு ஏற்றவாறுதான் மனித சமூகங்கள் வினையாற்றும்.
உதாரணத்திற்கு :
வரலாற்று நிகழ்வுகளை பதிவு செய்வதிலும் அதை தலைமுறைகளுக்கு கடத்துவதிலும் ஐரோப்பியர்களின் அறிதல் மரபு அவர்களின் வாழ்க்கை முறையின் பின்புலத்தில் அமைந்திருப்பதை பார்க்கலாம்.
தங்களுடைய கிருத்துவ நாட்காட்டி கணக்கின்படி நடைபெற்ற சம்பவங்கள் நேரம் நாள் தேதி ஆண்டு சம்பவத்திற்கான காரணங்கள் சம்பவத்தில் ஈடுபட்டவர்கள் சம்பவம் ஏற்படுத்திய விளைவுகள் இறுதியாக அந்த சம்பவத்தை பதிவுசெய்த நபரின் கருத்தோட்டம் ஆகியவற்றை படிநிலைகளாக தொகுப்பது தான் மேற்குலகத்தின் வரலாற்றுத் துறை சார்ந்த அறிதல் மரபு.

போர்ச்சமூகமான ஐரோப்பியர்கள் உலகம் முழுவதும் படையெடுத்து சென்று அடுத்தவர் நிலங்களை ஆக்கிரமித்து சொத்துக்களை சூறையாடி சொகுசு வாழ்க்கை நடத்தும் இயல்பைக் கொண்டவர்கள். இந்த வாழ்வியல் முறைக்கு உதவிடுவது போல அவர்கள் தங்களுக்கான வரலாற்று அறிதல் மரபை வகைப்படுத்தி வைத்துள்ளனர்.
போரில் வெற்றி பெற்றால் அந்த தினத்தை ஆண்டுதோறும் மறக்காமல் மகிழ்ச்சியாக கொண்டாடுவதற்கு இந்த வகையான வரலாற்றுப் பதிவு மற்றும் அறிதல் மரபு அவர்களுக்கு பெரிதும் உதவி செய்கிறது.தோல்வி ஏற்பட்ட சம்பவங்களை மறக்காமல் நினைவில் வைத்திருந்து விடாமல் முயற்சி செய்வதற்கும் மக்களை ஆண்டுதோறும் தூண்டி அதே சிந்தனையில் வைத்திருப்பதற்கும் தக்க காலம் நேரம் பார்த்து பழி தீர்ப்பதற்கும் இத்தகைய வரலாற்று அறிதல் மரபு அவர்களுக்கு மிகவும் உதவியாக இருக்கிறது.
பெரும்பாலான ஐரோப்பிய இனங்களின் வாழ்க்கை முறையும் ஐரோப்பாவிலிருந்து கடல் தாண்டிச் சென்று அமெரிக்க தீபகற்பத்தை சூறையாடி அங்கே குடிகொண்டிருக்கும் இன்றைய அமெரிக்கர்களின் (ஐரோப்பியர்களின்) வாழ்வியல் இயல்பும் இப்படியே வந்திருக்கிறது.
அறிவியல் தொழில்நுட்ப ஆயுதங்களுடன் இன்றும் கூட அதே வகையான வாழ்க்கை முறையில் உழலுவதை உலக வரலாற்றுப் பதிவுகளும் நிகழ்வுகளும் நமக்கு பாடம் நடத்துகின்றன.

ஐரோப்பியர்களின் இந்த வரலாற்று அறிதல் மரபு கீழ்த்திசை நாடுகளின் மக்களாகிய நமது மூளையில் திட்டமிட்டு திணிக்கப்பட்டுள்ளது. அவைமட்டுமே ஆதாரப்பூர்வமானது மிகச்சரியானது என்று முழுமையாக நம்புகிறோம். கடந்த 70 ஆண்டுகால நமது கல்வி முறையிலும் இந்த ஐரோப்பிய அறிதல் மரபு மட்டுமே சரியானது என்று திரும்பத் திரும்ப சிந்தனையில் பதிய வைக்கப்படுகிறது.
அனைத்துத் துறைகளிலும் கீழ்திசை மக்களாகிய நம் அறிதல் மரபு ஐரோப்பிய அறிதல் மரபிலிருந்து மாறுபட்டது. அதிலும் குறிப்பாக தமிழினத்தின் வரலாற்றுப் பதிவும் அறிதல் மரபும் முற்றிலும் மாறுபட்டது.
தமிழினத்தின் ஆகப்பெரும்பான்மையான வரலாற்று நிகழ்வுகள் அனைத்தும் பாடல்கள் கவிதைகள் இலக்கியங்கள் தெருக்கூத்து நாடகங்கள் வாய்வழிச் செய்திகள் என்ற வகைப்பாடுகளில் பதிவாகியுள்ளதை நாம் பார்க்கிறோம். இவற்றில் காலத்தையும் நேரத்தையும் சரியாக கணக்கிட இயலாது. ஆனால் நடந்த சம்பவங்களின் மூலக்கரு உண்மையானது.
ஐரோப்பியர்கள் போல அல்லாது உலகின் மூத்தகுடிகளான நாம் ஆற்றங்கரையோரங்களில் நிலையாக குடியமர்ந்து இயற்கையோடு கால்நடைகளோடு இரண்டறக் கலந்து நீண்ட கால பயிர்களை விளைவித்து அடுத்தவர் சொத்துக்கு ஆசைப்படாமல் உழைத்துப் பகிர்ந்து உண்ணும் வாழ்க்கை முறையை கொண்டவர்கள்.அதை உயர்வாக கருதுபவர்கள்.
முத்தமிழ் என்ற இயல் இசை நாடகங்கள் மூலமாக நமது முன்னோர்களின் வாழ்வியலை வரலாற்று நிகழ்வுகளை அறிவதும் அதை நினைவில் வைத்துக் கொள்வதும் யாரையும் உசுப்பி விடுவதற்கோ பழிதீர்ப்பதற்கோ அல்ல. வரலாற்றின் சிறப்பான வீரமான நிகழ்வுகளை மகிழ்ச்சியாக ஆனந்த ராகத்தில் கொண்டாடி மகிழ்ந்தும் தோல்விகளை இழப்புகளை வேதனையோடு ஒப்பாரி வைத்து அழுது புலம்பி ஆசுவாசப்படுத்திக் கொள்ளும் இயல்பை கொண்டவர்கள்.
வேளாண் குடிகளான நாம் போர்களையும் அழிவுகளையும் பழிவாங்குதலையும் வெறுப்பவர்கள்.
மேற்கத்திய பாணி வரலாற்று அறிதல் மரபு விளைவுகளை உண்டாக்கும் இயல்புடையது. தமிழரின் வரலாற்று அறிதல் மரபு அமைதியையும் மன்னிப்பையும் விட்டுக்கொடுத்தலையும் தன்னைத்தானே ஆற்றுப்படுத்திக் கொள்வதையும் இயல்பாக கொண்டது.
ஆனால் இன்று மேற்கத்திய பாணி வரலாற்று அறிதல் மரபு மட்டுமே அறிவியல் பூர்வமானது ஆதாரங்களைக் கொண்டது என்று நம்பவைக்கப்படுகிறோம். இருக்கலாம். இருந்துவிட்டுப் போகட்டும்.அதற்காக கீழைத்தேய அறிதல் மரபை ஆதாரமற்றது உண்மை இல்லாதது என்று மறுக்கத் தேவையில்லை.
மேலும் இந்த மேற்கத்திய அறிதல் மரபினால் உந்தப்பட்டவர்கள் தான் வரலாற்றில் என்றோ நடந்த சம்பவத்திற்கு சிறிதும் தொடர்பு இல்லாத இப்போது வாழும் மக்களை பழிவாங்க துடிக்கின்றனர். இந்தியாவில் பல வரலாற்றுச் சின்னங்களை அழிக்கத் துடிக்கின்றனர். அமெரிக்க இரட்டைக் கோபுரம் இடிக்கப்பட்டவுடன் Modern Crusade என்ற வார்த்தையை புஷ் பயன்படுத்தினார். ரோமில் இன்றுள்ள NATO இராணுவ கல்லூரியில் 12 ஆம் நூற்றாண்டில் நடைபெற்ற சிலுவை யுத்தங்கள் பாடமாக வைக்கப்பட்டுள்ளன.
மேற்கத்தியர்களின் இந்த அறிதல் மரபு வரலாற்றுத் துறையில் மட்டுமல்ல அறிவுத்துறையின் அனைத்துப் பிரிவுகளிலும் புகுந்து விட்டது.அதன் காரணமாக பிறந்த மண்ணின் அறிவுசார் சொத்துக்கள் அனைத்தும் காலாவதியானவை அறிவியல் பூர்வமாக நிரூபிக்கப்படாதவை என்று அந்த மக்களில் சிலரே ஒதுக்கித்தள்ளும் அவலம் ஏற்பட்டுள்ளது.
அதில் மிக முக்கியமான ஒரு துறைதான் மருத்துவம். உளவியல் உடலியல் மருத்துவம் மருந்துகள் குறித்த மேற்கத்திய அறிதல் மரபின் மூலத்தை நாம் ஆய்வு செய்து அவற்றுக்கும் மருத்துவத் துறை சார்ந்த இந்திய இஸ்லாமிய அறிதல் மரபிற்குமான வேறுபாடுகளை கண்டறிய கடமைப்பட்டுள்ளோம்.
- CMN SALEEM

Write on புதன்கிழமை, 10 அக்டோபர் 2018

உலகின் தாதாவாக தன்னைக் கருதிக் கொள்ளும் அமெரிக்கா மத்திய கிழக்கு முழுவதையும் தனது கட்டுப்பாட்டில் வைக்க பெரும் முயற்சி செய்கிறது. அதற்கு பெரும் தடையாக இருப்பது முன்னாள் இஸ்லாமிப் பேரரசான இன்றைய துருக்கி.
நேட்டோவின் உறுப்பு நாடுகளாக அங்கம் வகிக்கும் அமெரிக்கா மற்றும் துருக்கி ஆகிய இரு நாடுகளுக்கிடையில் நடக்கும் பனிப்போர் உலகப் பொருளாதாரத்தில் மந்த நிலையை ஏற்படுத்தியுள்ளது.
அமெரிக்காவின் விருப்பத்துக்கு இணங்காமல் செயல்படும் துருக்கியை வழிக்குக் கொண்டு வர, துருக்கியிலிருந்து இறக்குமதி செய்யப்படும் அலுமினியம் மற்றும் இரும்பு பொருட்கள் மீது கடும் கட்டுப்பாடுகளை அமெரிக்கா விதித்தது. இதனால் துருக்கியின் பொருளாதாரம் கடுமையாக பாதிப்படைய ஆரம்பித்தது. கடந்த ஒரு ஆண்டுகாலத்தில் மட்டும் துருக்கி நாணயமான லிராவின் மதிப்பு சுமார் 45 சதவீதம் வீழ்ச்சியினைச் சந்தித்துள்ளது.
இதற்கிடையில், அமெரிக்காவிலிருந்து துருக்கியில் இறக்குமதி செய்யப்படும் அனைத்து எலக்ட்ரானிக்ஸ் பொருட்கள் மீதும் துருக்கி தடைவிதித்து பதிலடி கொடுத்துள்ளது. அமெரிக்காவின் ஐஃபோனை கொரியாவின் சாம்சங்கும் துருக்கியின் ப்ராடக்டும் ஈடுகட்டும் எனவும் கூறியுள்ளது.
இந்திய ரூபாயின் மதிப்பு சரிவு
அமெரிக்காவுடனான துருக்கியின் உறவு மோசமடைந்திருப்பதும், துருக்கியின் எஃகு மற்றும் அலுமினியத்தின் மீது அமெரிக்கா வரிகளை உயர்த்தியிருப்பதும் துருக்கி நாணயமான லிராவின் மதிப்பு மிகக்கடுமையாக வீழ்ந்ததற்கு காரணங்களாகும்.
இதன் விளைவாக முதலீட்டாளர்கள் வளர்ந்துவரும் நாணயமான ரூபாயை விட அமெரிக்க டாலர்கள் முதலான பாதுகாப்பான நாணயங்களை நாடத் துவங்கியுள்ளார்கள். இந்தியாவிலும் அது எதிரொலித்தது.
தற்போது துருக்கியின் லிரா மதிப்பு சரிவானது இந்தியாவின் நிலையை மேலும் மோசமாக்கியுள்ளது. இதனால் இந்திய ரூபாய் மதிப்பானது கடும் சரிவை சந்தித்துள்ளது. இது வர்த்தக இடைவெளிக்கு வித்திட்டுள்ளது. இந்தியாவின் வணிக பற்றாக்குறையானது கடந்த ஐந்து வருடத்தில் இவ்வருடம் ஜூன் மாதம் 16.6 பில்லியன் டாலராக அதிகரித்துள்ளது.
ரூபாய் மதிப்பு வீழ்ச்சிக்கான இன்னொரு முக்கிய காரணம் இந்தியாவில் எண்ணெய் இறக்குமதி அளவு. இந்தியா தனது தேவைக்கான எண்ணெய் அளவில் சுமார் 80 சதவீதம் இறக்குமதி செய்கிறது. உலகில் அதிகளவு எண்ணெய் இறக்குமதி செய்யும் நாடுகளில் இந்தியா மூன்றாவது இடத்தில் இருக்கிறது. ஒரு காலகட்டத்தில் இந்திய நாணயம், அமெரிக்க நாணயத்துடன் வலுவாக போட்டி போட்டது. 1947இல் இந்தியா சுதந்திரமடைந்தபோது டாலரும், ரூபாயும் சமமாக இருந்தன. அப்போது இந்தியாவிற்கு கடன் ஏதும் இல்லை. பிறகு 1951இல் நாட்டில் முதல் ஐந்தாண்டு திட்டம் தொடங்கப்பட்டபோது, இந்திய அரசு வெளிநாடுகளிடம் இருந்து கடன் வாங்கத் தொடங்கியது. அதன்பிறகு ரூபாயின் பயணம் சரிவை நோக்கித் தொடங்கியது.
இன்று டாலருக்கு எதிரான இந்திய ரூபாயின் மதிப்பு 70 ரூபாய் 32 பைசாவாக சரிந்தது.

Write on புதன்கிழமை, 10 அக்டோபர் 2018

 சேயன் இப்ராகிம்
சமுதாயப் போராளி தென்காசி சாகுல் கமீது சாகிப்

‘இன்றைக்கு மைனாரிட்டி சமூகத்திற்குப் பல இடங்களில் பாதுகாப்பற்ற நிலைமை ஏற்பட்டுக் கொண்டிருக்கின்றது. உதாரணமாக, சென்னையில் இந்து மத விழா ஒன்று நடைபெற்றது. நல்லது தான். வரவேற்கிறேன். பாராட்டுகிறேன் பலரும் கலந்து கொண்டு அதிலே பேசினார்கள். எல்லாம் சரி. இந்து மதம் ஒரு உயர்வான மதம்தான். மனுதர்ம ஆட்சி பற்றி அவர்கள் புகழ்ந்து பேசுவது பற்றி எங்களுக்கு ஆட்சேபனை இல்லை.
ஆனால் அதற்கு முன்னர் நடைபெற்ற ஊர்வலத்தில் ‘பத்து பைசா முறுக்கு, பள்ளிவாசலை நொறுக்கு’ என்று கோஷங்களை எழுப்பிக் கொண்டு சென்றார்கள். இது தேவையா? இது இந்து மத விழாவா அல்லது இஸ்லாமிய மதத்தைத் துவேசிக்கும் விழாவா என்று சந்தேகம் ஏற்பட்டு விடுகிறது. பெரியவர் சங்கராச்சாரியார் இந்து மதத்தைப் பரப்பட்டும், அதிலே எங்களுக்கு ஒன்றும் ஆட்சேபனை இல்லை.
ஆனால் அந்த ஊர்வலத்தில் இஸ்லாமிய மதத்தைப் பற்றி துவேஷமான முழக்கஙக்ள் எழுப்பப்படுவதை அவர் அனுமதித்திருக்கிறாரா? ஊர்வலத்தில் பாதுகாவலாகச் சென்ற போலீசாரும் அதனை அனுமதித்திருக்கிறார்களா? அரசும் அனுமதிக்கிறதா? என்று தான் கேட்க விரும்பகிறேன்.’
இந்த பேச்சு : 8.3.1983 அன்று தமிழக சட்டமன்றத்தில் காவல்துறை மானியக் கோரிக்கை மீது நடைபெற்ற விவாதத்தில் கலந்து கொண்டு உரையாற்றுகின்ற போது தான் இந்து முன்னணி போன்ற இந்துத்துவ அமைப்புகள் முஸ்லிம்களுக்கு எதிராகத் தமிழகத்தில் செய்து வருகின்ற வெறுப்புப் பிரச்சாரம் குறித்து கடையநல்லூர் சட்ட மன்ற உறுப்பினரான முஸ்லிம் லீகைச் சார்ந்த தென்காசி ஏ.சாகுல் கமீது சாகிப் மேற்கண்டவாறு குறிப்பிட்டார்.
முஸ்லிம் லீகின் முன்னணித் தலைவர்களில் ஒருவராகத் திகழ்ந்த அவரைப் பற்றித்தான் இந்த இதழில் பார்க்க விருக்கிறோம்.
இளமைப் பருவம்:mla
‘தென்காசி மேடை முதலாளி’ என தென் தமிழக முஸ்லிம்களால் அன்புடன் அழைக்கப்பட்ட மு.ந. அப்துல் ரகுமான் சாகிபின் இரண்டாவது புதல்வர் தான் சாகுல் கமீது. இவர் முஸ்லிம் லீகின் முன்னணித் தலைவராகவும் மாநிலங்களவை உறுப்பினராகவுமிருந்த பன்னூலாசிரியர் ஏ.கே. ரிபாயி சாகிபின் தம்பியாவார். தென்காசி மேடை முதலாளி மு.ந.அப்துல் ரகுமானும், காயிதே மில்லத்தும் சகலர்கள் என்பது குறிப்பிடத்தக்கது. மு.ந.அ - பாத்திமா பீவி தம்பதியினரின் மகனாக சாகுல் கமீது 8.4.1927 அன்று ஆடுதுறையில் பிறந்தார்.
தனது குழந்தைப் பருவத்தை ஆடுதுறையிலேயே கழித்த அவர் பின்னர் தென்காசியிலும், திருநெல்வேலியிலும் தொடக்கக் கல்வியையும், இடைநிலைக் கல்வியையும் கற்றுத் தேறினார். பாரம்பர்யமிக்க முஸ்லிம் லீக் குடும்பத்தில் பிறந்த அவர் இளமையிலேயே அக்கட்சியின் செயல்பாடுகளில் தன்னையும் இணைத்துக் கொண்டார். தென்காசி நகரில் மட்டுமின்றி மாவட்டத்தின் பிற பகுதிகளிலும் நடைபெற்ற முஸ்லிம் லீக் கூட்டங்களிலும், மாநாடுகளிலும், ஊர்வலங்களிலும் ஆர்வமாகக் கலந்து கொண்டார். படிப்படியாக கட்சியில் பல பொறுப்புகள் இவரைத் தேடி வந்தன.
1969ஆம் ஆண்டு இவரது தந்தையார் மு.ந.அ மாவட்ட முஸ்லிம் லீக் தலைவர் பொறுப்பிலிருந்து விலகியதும், இவரே மாவட்டத் தலைவராகத் தேர்ந்தெடுக்கபட்டார். மாவட்டமெங்கும் சுற்றுப் பயணங்கள் மேற்கொண்டு கட்சியை வலுப்படுத்தும் பணிகளில் ஈடுபட்டார். 1983ஆம் ஆண்டு ஜுலை மாதம் 4, 5 தேதிகளில் மாவட்ட முஸ்லிம் லீகின் மாநாட்டை மேலப்பாளையம் நகரில் வெற்றிகரமாக நடத்தினார்.
இம் மாநாட்டின் போது காயிதேமில்லத் அவர்களின் பாராளுமன்ற உரைகளைத் தொகுத்து ‘காயிதே மில்லத் பேசுகிறார்’ என்ற தலைப்பில் நூலாக வெளியிட்டார். மாவட்ட முஸ்லிம் லீகில் மட்டுமின்றி மாநில லீகிலும் துணைத்தலைவராகவும், பொருளாளராகவும் பொறுப்பு வகித்தார்.
1945ஆம் ஆண்டு இவரது தந்தையாரால் தொடங்கப்பட்ட தென்னிந்திய இஷாஅத்துல் இஸ்லாம் சபையின் தலைவராகவும் 1969ஆம் ஆண்டு இவர் பொறுப்பேற்றார். 1986ஆம் ஆண்டு வரை அப்பொறுப்பில் நீடித்தார்.
நகர் மன்றத் தலைவர் : 2
1968ஆம் ஆண்டு நடைபெற்ற உள்ளாட்சித் தேர்தலில் இவர் முஸ்லிம் லீக் வேட்பாளராக தென்காசியில் தனது சொந்த வார்டில் நின்று வெற்றி பெற்றார். இத் தேர்தலில் தி.மு.கவும், முஸ்லிம்லீகும் கூட்டணி அமைத்துப் போட்டியிட்டன. தென்காசி நகர் மன்றத்தில் பெரும்பான்மையான இடங்களைக் கைப்பற்றிய தி.மு.க மற்றும் முஸ்லிம் லீக் உறுப்பினர்கள் சாகுல் கமீது சாகிபை நகர் மன்றத் தலைவராகத் தேர்ந்தெடுத்தனர். நகரப் பஞ்சாயத்தாக இருந்த தென்காசி 1966ஆம் ஆண்டு நகர சபையாக தரம் உயர்த்தப்பட்ட பிறகு நடந்த தேர்தலில் வெற்றி பெற்று இவர் நகரசபைத் தலைவராகத் தேர்ந்தெடுக்கப்பட்டதால், தென்காசி நகர சபையின் முதல் தலைவர் என்ற சிறப்பினைப் பெற்றார். (தென்காசிப் பஞ்சாயத்தின் முதல் தலைவராக இவரது தந்தையார் மு.ந.அ. 1923ஆம் ஆண்டு முதல் 1926ஆம் ஆண்டு வரை பதவி வகித்தார் என்பது குறிப்பிடத்தக்கது)
சாகுல் கமீது சாகிப் தனது பதவிக்காலத்தில் தென்காசி நகரில் பல்வேறு மக்கள் நலத்திட்டங்களை நிறைவேற்றினார். தென்காசி நகரப் பேருந்து நிலையத்தைப் புதுப்பித்துக் கட்டியது, புகை வண்டி நிலையத்திற்கு செல்லும் சாலையை தரம் வாய்ந்ததாக அமைத்துக் கொடுத்தது ஆகியன இவரது பதவிக் காலத்தில் நடைபெற்ற குறிப்பிடத்தக்க பணிகளாகும்.

சட்டமன்ற உறுப்பினர் :
1979ஆம் ஆண்டு மத்தியில் மொரார்ஜி தேசாய் தலைமையிலான ஜனதாக் கட்சி ஆட்சி கவிழ்ந்து அதன் பின்னர் பொறுப்பேற்ற சரண்சிங் ஆட்சியும் சில மாதங்களிலேயே கவிழ்ந்து அதன் பின்னர் அடுத்த ஆண்டு(1980) ஜனவரி மாதம் பாராளுமன்றத்திற்கு நடைபெற்ற பொதுத் தேர்தலில் காங்கிரஸ் கட்சி வெற்றி பெற்று மத்தியில் ஆட்சியைப் பிடித்தது. இந்திரா காந்தி மீண்டும் பிரதமரானார். shahulஇந்தத் தேர்தலில், தமிழகத்தில் தி.மு.க, காங்கிரஸ், முஸ்லிம் லீக் ஆகிய கட்சிகள் கூட்டணி அமைத்துப் போட்டியிட்டு 39 பாராளுமன்றத் தொகுதிகளில் 37 ஐக் கைப்பற்றின. எம்.ஜி.ஆர் தலைமையில் அப்போது தமிழகத்தின் ஆட்சிப் பொறுப்பிலிருந்த அ.தி.மு.கவுக்கு இரண்டு இடங்களே கிடைத்தன.
1980 பொதுத் தேர்தலின் போது பல மாநிலங்களில் ஆட்சிப் பொறுப்பிலிருந்த ஜனதாக் கட்சியும், தமிழகத்தில் ஆட்சிப் பொறுப்பிலிருந்த அ.தி.மு.கவும் பெரும் தோல்வியைச் சந்தித்த காரணத்தால் அவை மக்களின் நம்பிக்கையை இழந்து விட்டன என்று கூறி மத்திய அரசு அரசியல் சட்டத்தில் 356வது பிரிவைப் பயன்படுத்தி தமிழகம் உள்ளிட்ட ஒன்பது மாநில அரசுகளைக் கலைத்து உத்தரவிட்டது. (1977ஆம் ஆண்டு மத்தியில் ஜனதாக் கட்சி கூட்டணி வெற்றி பெற்று மொரார்ஜி தேசாய் பிரதமரானதும் பல மாநிலங்களில் ஆட்சிப் பொறுப்பிலிருந்த காங்கிர° கட்சி பெரும் தோல்வியைச் சந்தித்ததைக் காரணம் காட்டி அந்த அரசுகளைக் கலைத்து உத்தரவிட்டார். அதற்குப் பதிலடி கொடுக்கும் விதத்திலேயே இந்திராகாந்தியும் செயல்பட்டார்) கலைக்கபட்ட தமிழக சட்டமன்றத்திற்கு 1980ம் ஆண்டு மே மாதம் தேர்தல் நடைபெற்றது.
இத் தேர்தலிலும் தி.மு.க, காங்கிரஸ் கூட்டணியில் முஸ்லிம் லீகும் இடம் பெற்றிருந்தது. லீகிற்கு ஒதுக்கப்பட்ட எட்டுத் தொகுதிகளில் ஒன்றான கடையநல்லூரில் அக்கட்சியின் வேட்பாளராக சாகுல் கமீது சாகிப் நிறுத்தப்பட்டார். அ.தி.மு.க சார்பில் எம்.கனி என்ற முஸ்லிம் வேட்பாளர் களத்தில் இருந்தார். கடும் போட்டியில் லீகின் வேட்பாளரான சாகுல் கமீது சாகிப் அ.தி.மு.க வேட்பாளரை விட 1880 வாக்குகள் அதிகம் பெற்று வெற்றிபெற்றார். (வாக்குகள் விபரம் சாகுல் கமீது சாகிப் 38,225 - எம் கனி 36,345) இத் தேர்தலில் எட்டு தொகுதிகளில் போட்டியிட்ட முஸ்லிம் லீக் கடையநல்லூர் தொகுதியில் மட்டுமே வெற்றிபெற்றது.
முஸ்லிம் லீகின் முக்கியத் தலைவர்களான லத்தீப் சாகிப், பேரா. காதர் முகையதின் சாகிப், வந்தவாசி கே.ஏ. வகாப் சாகிப் ஆகியோர் வெற்றி வாய்ப்பை இழந்தனர். (அனைவரும் எதிர்பார்த்ததற்கு மாறாக, இத் தேர்தலில் தி.மு.க காங்கிரஸ் கூட்டணி பெரும் தோல்வியைச் சந்தித்து அ.தி.மு.க கூட்டணி வெற்றி பெற்று எம்.ஜி.ஆர் மீண்டும் தமிழக முதல்வரானார்) சட்டமன்றத்தில் முஸ்லிம் லீகின் ஒற்றை உறுப்பினராகயிருந்த சாகுல் கமீது சாகிப் சமுதாயப் பிரச்னைகளுக்காக உரக்கக் குரல் கொடுத்தார்.
அநேகமாக அனைத்து மானியக் கோரிக்கைகளிலும் கலந்து கொண்டு உரையாற்றுகின்ற வாய்ப்பு அவருக்குக் கிடைத்தது. அந்த வாய்ப்பை நன்முறையில் பயன்படுத்தி முஸ்லிம்களின் பிரச்னைகளுக்காக மட்டுமின்றி பட்டியலின மக்களின் பிரச்னைகளுக்காகவும் குரல் கொடுத்தார்.
அவர் பதவிப் பொறுப்பிலிருந்த போது தான் மீனாட்சிபுரம் மதமாற்றமும், புளியங்குடி கலவரமும் ஏற்பட்டன. அவை குறித்தும் சட்டசபையில் உரையாற்றினார். குறிப்பாகப் புளியங்குடி கலவரத்தில் பெரிதும் பாதிக்கபட்ட பட்டியலின மக்களுக்கு ஆதரவாகச் சட்டமன்றத்தில் பேசினார். ஏழை எளிய மக்களுக்கு வீட்டு மனைப் பட்டா வழங்குதல், குடிநீர்ப் பிரச்னை, கடையநல்லூர் நெசவாளர்கள் பிரச்னை, இலங்கைத் தமிழர் பிரச்னை எனப் பல்வேறு பிரச்னைகள் குறித்தும் சட்ட சபையில் மிக விரிவாகப் பேசியுள்ளார். அவரது சட்ட மன்றப் பணி அனைத்துத் தரப்பு மக்களாலும் பாராட்டப்பட்டது.
மீனாட்சிபுரம் மதமாற்றம்:
19.02.1981 அன்று திருநெல்வேலி மாவட்டம் செங்கோட்டைத் தாலுகாவிலுள்ள மீனாட்சிபுரம் என்ற கிராமத்தைச் சார்ந்த நூற்றுக்கணக்கான பட்டியலின மக்கள் (180 குடும்பத்தினர்) ஆதிக்க சாதியினரின் கொடுமைகளைத் தாங்கவொண்ணாது இஸ்லாத்தில் இணைந்தனர். இம் மக்கள் அப் போது தென்னிந்திய இஷா அத்துல் இஸ்லாம்சபையின் தலைவராக இருந்த சாகுல் கமீது சாகிப்பை அணுகித்தான் தாங்கள் இஸ்லாத்தில் இணைவதற்கான நடைமுறைகளை மேற்கொள்ளுமாறு கேட்டுக் கொண்டனர். ஆனால், இதன் காரணமாக பிரச்னைகள் ஏற்படக் கூடும் எனக் கருதிய அவர் முதலில் அம்மக்களின் வேண்டுகோளை ஏற்கத் தயங்கினார். எனினும் அம்மக்கள் தங்களது நிலைப்பாட்டில் உறுதியாக இருக்கவே, அவர்களை இஸ்லாத்தில் சேர்த்துக் கொள்வதற்குரிய நடைமுறைகளை நிறைவேற்றினார். அம்
மக்கள் முஸ்லிம்களாயினர்.
எனினும் அவர் எதிர்பார்த்தது போவே இந்துத்துவ அமைப்புகள் இந்த மதமாற்றத்தை ‘இந்து மதத்தை அழிக்கும் சதி’ என்ற ரீதியில் தமிழகமெங்கும் பிரச்சாரத்தை மேற்கொண்டு சட்டம், ஒழுங்குப் பிரச்னையை ஏற்படுத்தின. முஸ்லிம் அமைப்புகள் பட்டியலின மக்களை வற்புறுத்தியும், பணம் கொடுத்தும், வெளிநாட்டு வேலை வாய்ப்புக் கிடைக்கும் என்ற ஆசை வார்த்தைகளைக் கூறியும் மதம் மாற்றியதாகப் பிரச்சாரம் செய்தனர்.
பிஜேபியின் அகில இந்தியத் தலைவர்கள், தமிழக பிஜேபி மற்றும் இந்து முன்னணித் தலைவர்கள் என அனைவரும் மீனாட்சிபுரம் கிராமத்திற்கு வருகை தந்து பரபரப்பான அறிக்கைகளை வெளியிட்டுக் கொண்டிருந்தனர். இதனால் இது ஒரு தேசியப் பிரச்னையாக உருவெடுத்தது. தமிழகத்தில் அப்போதிருந்த எம்.ஜி.ஆர் தலைமையிலான அ.தி.மு.க அரசும் இந்த மதமாற்றத்தைக் கட்டாய மதமாற்றம் என்றும், இந்து மதத்தை அழிக்கும் சதி என்றும் கருதியது.
எனவே இந்த மதம் மாறிய மக்களுக்குப் பல்வேறு வழிகளிலும் உதவி செய்து கொண்டிருந்த தென்னிந்திய இஷா அத்துல் இஸ்லாம் சபையின் நடவடிக்கைகளையும் அதன் தலைவர் சாகுல் கமீது சாகிபையும் கண்காணிக்கத் தொடங்கியது. இந்துத்துவா அமைப்புகளைத் திருப்திப்படுத்த அவரைத் தேசிய பாதுகாப்புச் சட்டத்தின் கீழ் கைது செய்யவும் தமிழக அரசு திட்டமிட்டிருந்தது.
இதனை முன்கூட்டியே அறிந்து கொண்ட மாநில முஸ்லிம் லீக் தலைவர் அப்துஸ்ஸமது சாகிப் கேரளத் தலைவர் சி.ஹெச்.முகம்மது கோயா சாகிபை அழைத்துக் கொண்டு அப்போதையப் பிரதமர் இந்திரா காந்தியை நேரில் சந்தித்து வேண்டுகோள் விடுத்து தமிழக அரசின் கைது முயற்சியைத் தடுத்து நிறுத்தினார். இந்த நெருக்கடிகளுக்கு மத்தியிலும்
சாகுல் கமீது சாகிப் தனது சகோதரர் ரிபாய் சாகிபுடன் இணைந்து மீனாட்சிபுரத்தில் இஸ்லாத்தில் இணைந்த மக்கள் மார்க்கக் கல்விபெறவும். அங்கு மதரஸா, பள்ளிவாசல் கட்டப்படவும், வேறு பல இஸ்லாமியப் பணிகள் நடைபெறவும் தொடர்ந்து துணை நின்றார்.
சமத்துவ சகோதரத்துவ சங்கம் (எஸ்.எஸ்.எஸ்)
மீனாட்சிபுரம் மதமாற்ற நிகழ்வுக்குப் பின்னர், தமிழகத்தின் தென் மாவட்டங்களில் சமூகப் பதற்றம் அதிகரித்தது. இந்துத்துவா அமைப்புளின் தூண்டுதல் காரணமாக சாதி இந்து அமைப்புகள் முஸ்லிம்கள் மீதும், பட்டியலின மக்கள் மீதும் வெறுப்பும் பகைமையும் கொள்ள ஆரம்பித்தன. இந்து முன்னணித் தலைவரான இராம கோபாலன் அந்தக் காலகட்டத்தில் தமிழகமெங்கும் பிரச்சாரம் மேற்கொண்டு ‘இந்துக்களே முஸ்லிம்கள் நடத்தும் வணிக நிறுவனங்களில் பொருட்களை வாங்காதீர்கள், அவர்களை புறக்கணியுங்கள்’ என்று பிரச்சாரம் செய்து வந்தார்.
இந்து முன்னணியின் ‘ஞானரதம் தென் தமிழகத்தை வலம் வரப்போவதாகவும் செய்திகள் வெளிவந்தன. இந்நிலையில் முஸ்லிம்களும், பட்டியலின மக்களும் ஒன்றிணைந்து செயல்பட வேண்டியதன் தேவையை உணர்ந்த இரு தரப்பைச் சார்ந்த இளைஞர்களும், படித்தவர்களும் சாகுல் கமீது சாகிபை அணுகி ஒரு பொது அமைப்புத் தொடங்க வேண்டுமென வலியுறுத்தினர். இது சம்பந்தமான ஆலோசனைக் கூட்டம் அவரின் தலைமையின் கீழ் 10.01.1982அன்று கடையநல்லூர் கலந்தர் மஸ்தான் தெருவிலுள்ள ஜக்கரியா முஸ்லிம் சங்கத்தில் நடைபெற்றது.

இக் கூட்டத்தில் இருதரப்பு மக்களும் இணைந்த ‘சமத்துவ சகோதரத்துவ சங்கம்’ தொடங்குவதென முடிவு செய்யப்பட்டது. இதன் அமைப்பாளராக சாகுல் கமீது சாகிபும், தலைவராக முஸ்லிம் லீக் பிரமுகர் வி.எஸ். கமருத்தீனும், செயலாளராகப் பட்டியலின வகுப்பைச் சார்ந்த இராமநாதனும் கொள்கை பரப்பு செயலாளராக அதே வகுப்பைச் சார்ந்த இராஜாவும் தேர்ந்தெடுக்கப்பட்டனர். இந்த அமைப்பு சிறப்பான முறையில் செயல்படத் தொடங்கியது. எனினும் இந்துத்துவா அமைப்புகளால் இதனைப் பொறுத்துக் கொள்ள இயலவில்லை. ஏதாவது ஒரு பிரச்னையைக் கிளப்பிக் கலவரத்தைத் தூண்டுவதற்கு தக்க தருணத்தை அவர்கள் எதிர்பார்த்துக் காத்திருந்தனர்.
8.06.1982 அன்று சமத்துவ சகோதரத்துவச் சங்கத்தின் சார்பில் கடையநல்லூரில் நடந்த சிறப்பு கூட்டத்தில் முஸ்லிம்லீகின் தமிழ் மாநிலத் தலைவர் சிராஜுல் மில்லத் அப்துல் ஸமது சாகிப், அகில இந்தியத் தலைவர் இப்ராகிம் சுலைமான் சேட் சாகிப் மற்றும் சாகுல் கமீது சாகிப் ஆகியோர் உரையாற்றினார். இதில் கலந்து கொள்வதற்காக புளியங்குடி பகுதியிலிருந்து வேன்கள் மூலம் கடையநல்லூர் வந்து கொண்டிருந்த பட்டியலின மக்கள் மீது சொக்கம்பட்டி என்ற ஊரில் கூடியிருந்த தேவரின இளைஞர்கள் கற்களை வீசித் தாக்குதல் நடத்தினர். இதில் பட்டியலின மக்கள் பலருக்குக் காயமேற்பட்டது. இங்கு தான் கலவரத்திற்கான வித்து ஊன்றப்பட்டது. இக் கூட்டத்தில் கலந்து கொண்டு உரையாற்றிய முஸ்லிம்லீக் தலைவர் இப்ராகிம் சுலைமான் சேட் சாகிப் ‘ முஸ்லிம்களும் பட்டியலின மக்களும் அரசியல் ரீதியில் ஒன்றுபட்டுச் செயல்பட்டால் இந்த நாட்டின் ஆட்சி அதிகாரத்தைக் கைப்பற்றிவிடமுடியும்’ என்று
கூறியிருந்தார்.
இந்தக் கூட்டம் நடந்த மறு நாள் 9.6.82 அன்று புளியங்குடியில் பட்டியலின மக்களுக்கும், தேவரின மக்களுக்குமிடையே மோதல்கள் ஏற்பட்டன. இதில் தேவரின மக்கள் பாதிக்கப்பட்டனர். இதற்குப் பதிலடி கொடுக்கும் வகையில் அதற்கு மறுநாள் 10.06.1982 அன்று புளியங்குடி சுற்று வட்டாரப் பகுதிகளைச் சார்ந்த தேவரின மக்கள் ஒன்று திரண்டு அருகிலிருந்த அய்யாபுரம் என்ற பட்டியலின மக்கள் நிறைந்து வாழ்கின்ற கிராமத்திற்குச் சென்று திடீர்த் தாக்குதலில் ஈடுபட்டனர். இத்தாக்குதலில் எட்டு பட்டியலின மக்கள் கொல்லப்பட்டனர். இதனைத் தொடர்ந்து புளியங்குடிசுற்றுவட்டாரப் பகுதிகளுக்கும் கலவரம் பரவியது. புளியங்குடியில் பட்டியின மக்கள் மீது காவல்துறையின் துப்பாக்கிச் சூடு நடத்தினர். இதில் இருவர் உயிரிழந்தனர். புளியங்குடியிலும் வாசுதேவநல்லூரிலும் முஸ்லிம்களுக்குச் சொந்தமான வணிக நிறுவனங்கள் தாக்கப்பட்டுச் சேதமுற்றன. வாசுதேவநல்லூரில் ஒரு முஸ்லிம் கொல்லப்பட்டார்.
கடையநல்லூர் பொதுக் கூட்டத்தில் சுலைமான் சேட் பேசியது தான் கலவரத்திற்குக் காரணம் என இந்துத்துவ அமைப்புகள் குற்றம் சாட்டின. குமுதம், துக்ளக் ஆகிய இதழ்களும் இதே ரீதியில் கருத்துக்களைத் தெரிவித்திருந்தன. கலவரம் நடந்து கொண்டிருக்கும்போதே சாகுல் கமீது சாகிப் தேசிய பாதுகாப்புச் சட்டத்தின் கீழ் கைது செய்யப்பட்டு சிறையில் அடைக்கப்பட்டார். மூன்றுமாதகால சிறை வாசத்திற்குப் பின் அவர் விடுதலை செய்யப்பட்டார்.
இதன் பின்னர் இச்சங்கத்தின் செயல்பாடுகள் படிப்படியாகக் குறைந்து ஒரு கட்டத்தில் நின்று போனது.
இஸ்லாமியப் பேரவை:
1983ஆம் ஆண்டு சாகுல் கமீது சாகிப் சென்னையில் தமிழ் நாடு இஸ்லாமியப் பேரவை என்ற புதிய அமைப்பு ஒன்றைத் தொடங்கினார். இது கட்சி சார்பற்ற தொண்டு இயக்கம் என்றும் இதில் முஸ்லிம்கள் அனைவரும் சேர்ந்து பணியாற்றலாம் என்று அறிவித்தார்.
முஸ்லிம்லீகின் சட்டமன்ற உறுப்பினராகவும், மாவட்ட முஸ்லிம் லீக் தலைவராகவும் இருக்கும் அவர், இது போன்ற தனி அமைப்பு ஒன்றைத் தொடங்கியதை முஸ்லிம் லீகின் மாநிலத் தலைமை ஏற்கவில்லை. அதனை ஒழுங்கீனமான செயலாகக் கருதியது. முஸ்லிம்களுக்காக முஸ்லிம் லீக் இருக்கும் போது இன்னொரு அமைப்பு ஏன் என்று கேள்வி எழுப்பிது. இந்த அமைப்பைக் கலைத்து விடவேண்டுமென்றும் இல்லையெனில் ஒழுங்கு நடவடிக்கை எடுக்கப்படும் என மாநிலத் தலைமை அவரை எச்சரித்தது. ஆனால் அவர் இந்த அமைப்பைக் கலைக்க மறுத்து விட்டார்.
இதன் காரணமாக 1984ஆம் ஆண்டு திருச்சியில் நடைபெற்ற கட்சியின் மாநில பொதுக் அவரை முஸ்லிம் லீகின் அடிப்படை உறுப்பினர் பதவியிலிருந்து நீக்கியது. அப்போது அவர் சட்டமன்ற உறுப்பினராகவும், நெல்லை மாவட்ட முஸ்லிம் லீக் தலைவராகவும் இருந்தார் என்பது குறிப்பிடத்தக்கது.
பொதுப்பணிகள்:
கட்சியிலிருந்து நீக்கப்பட்ட பின்பு, அவர் பல்வேறு பொதுப்பணிகளில் ஈடுபட்டார். ‘இஸ்லாமிய இதயக்குரல்’என்ற மாத இதழைத் தொடங்கி அதில் தனது எண்ணங்களையும், கருத்துக்களையும் எழுதி வந்தார். நாட்டு நடப்புகளை விமர்சிக்கும் கேலிச் சித்திரங்களையும் அதில் இடம்பெறச் செய்தார். 1993 ஆம் ஆண்டு ‘இஸ்லாமிய சகோதரத்துவ அமைப்பு’ என்ற அமைப்பு ஒன்றைத் தொடங்கினார். அவ்வமைப்பின் தலைவராக அவரும், செயலாளர் பேராசியர் ஏ.அஷ்ரப் அலியும் தேர்ந்தெடுக்கப்பட்டனர். பாபரி மஸ்ஜித் இடிப்பிற்குப் பின்னர் தொடங்கப்பட்ட இந்த அமைப்பு முஸ்லிம்களிடையே அரசியல் விழிப்புணர்வை ஏற்படுத்த முயற்சித்தது. அவர் மாவட்டமெங்கும் சுற்றுப் பயணம் மேற்கொண்டு பல ஊர்களில் இதன் கிளைகளை நிறுவினார். இந்த அமைப்பின் சார்பாக ‘இஸ்லாமிய சகோதரத்துவக் குரல்’என்ற மாத இதழைத் தொடங்கி நடத்தி வந்தார். அதில் பெரும்பாலான அரசியல் சார்ந்த கட்டுரைகளை அவரே எழுதினார்.
24.09.1994, 25.09.1994 ஆகிய நாட்களில் முஸ்லிம் அனாதை நிலைய ஆதரவில் பாளையங்கோட்டையில் கல்வி விழிப்புணர்வு மாநாடு ஒன்று நடைபெற்றது. தமிழகத்தின் பல்வேறு பகுதிகளிலிருந்தும் வந்த கல்வியாளர்கள் இம்மாநாட்டில் கலந்து கொண்டனர். இம் மாநாட்டின் வரவேற்புக் குழுத் தலைவராக இருந்த அவர் மாநாடு வெற்றிகரமாக நடைபெறப் பாடுபட்டார்.
மேலும் சிறுபான்மையினர் கல்வி விழிப்புணர்வுக் கூட்டங்களை சென்னை, திருச்சி, மதுரை, கோவை, பாளையங்கோட்டை ஆகிய நகரங்களில் நடத்தினார். தனது சிறிய தந்தையாரால் தென்காசியில் தொடங்கப்பட்டு செயல்பட்டு வந்த காட்டுபாவா நடுநிலைப் பள்ளியின் தாளாளராகவும் பொறுப்புவகித்தார். நெல்லை மாவட்டத்திலுள்ள சில முஸ்லிம் ஜமாஅத்துகளில் பிரச்னைகள் ஏற்பட்டபோது அதில் தலையிட்டு சுமூகமாகத் தீர்த்து வைத்தார். இளமையிலேயே அவர் கவிதை எழுதும் ஆற்றல் பெற்றிருந்தார். நினைத்த மாத்திரத்தில் கவிதை எழுதி விடுவார். பொதிகைக் கவிஞர் என்ற சிறப்புப் பெயரும் அவருக்குண்டு.
அவரது கவிதைகள் இஸ்லாமிய இதயக்குரல் இதழிலும். பிற இஸ்லாமிய இதழ்களிலும் வெளிவந்தன. எனினும் அவை நூல் வடிவம் பெறவில்லை.
பண்பு நலன்கள்:
சாகுல் கமீது சாகிப் மிகுந்த நெஞ்சுரம் மிக்கவராகத் திகழ்ந்தார். யாருக்கும் அஞ்சாமல் தனது கருத்துக்களை எடுத்துரைத்து வந்தார். அவரது சில செயல்பாடுகள் விமர்சனங்களுக்கு உள்ளான போதிலும் அதனைப் பொருட்படுத்தாது தனது வழியில் சென்றார். எப்போதும் பச்சை நிற ஆடைகளையே உடுத்துவார். பச்சை நிறத் தொப்பி, பச்சைத் துண்டு, பச்சைப் பேனா என இஸ்லாமிய நிறமான பச்சை மீது இச்சை கொண்டிருந்தார்.
முடிவுரை:
சாகுல் கமீது சாகிப்பிற்கு 1951 ஆம் ஆண்டு திருமணம் நடைபெற்றது. துணைவியார் பெயர் சாராபீவி.
இத்தம்பதியினருக்கு முகம்மது இப்ராகிம், முகம்மது இஸ்மாயில் ஆகிய இரு புதல்வர்களும், ரபக் ஜமால் பாத்திமா, ஜமால் ஹமீதா பானு ஆகிய இரு மகள்களும் உண்டு. மூத்த புதல்வர் இப்ராகிம் பாளையங்கோட்டை சதக்கத்துல்லா அப்பா கல்லூரியில் பணியாற்றுகிறார். தென்காசி காட்டுபாவா உயர்நிலைப் பள்ளியின் தாளாளராகவும் பொறுப்பு வகிக்கிறார். இளையவர் அப்பள்ளியின் தலைமை ஆசிரியராகப் தற்போது பணியாற்றி வருகிறார்.
தனது வாழ்க்கையின் பிந்தியக் காலகட்டத்தில் சாகுல் கமீது சாகிப் தென்காசியிலேயே வசித்து வந்தார். அந்நகரில் பல்வேறு பொதுப்பணிகளிலும் ஈடுபட்டு வந்தார். சில காலம் உடல் நலிவுற்றிருந்த அவர் 14.04.2002 அன்று மரணமுற்றார். அவரது வாழ்க்கையே போராட்டமாக இருந்தது. அவரை ஒரு சமுதாயப் போராளி என்று அழைப்பதே பொருத்தமானது.
நன்றி: தகவல்கள் அளித்திட்ட சாகுல் கமீது சாகிபின் புதல்வர் முகம்மது இப்ராகிம் மற்றும் சமத்துவ சகோதரத்துவ சங்கத்தின் கொள்கைப் பரப்புச் செயலாளராயிருந்த கடையநல்லூர் இராஜா ஆகியோருக்கு.
கட்டுரையாளருடன் தொடர்பு கொள்ள ... 99767 35561