saleem

saleem

Write on வெள்ளிக்கிழமை, 05 ஜனவரி 2018

உகாண்டா ஆஃப்ரிக்காவில் அமைந்துள்ள ஒரு நாடு. முறைப்படுத்தப்பட்ட கல்வி வழங்கும் அளவுக்கு பொருளாதார, சமூக சூழல் எதுவும் இல்லாத ஒரு நாடு. 

கட்டமைக்கப்பட்ட கல்வி வழங்க முடியாத சூழலில் அவர்களிடம் இருக்கும் வசதி வாய்ப்புகளைக் கொண்டே உகாண்டாவில் மாணவர்கள் மற்றும் இளைஞர்களின் வறுமை, வேலையின்மையை சரி செய்ய அவர்களை தொழில் முனைவோராகவும், தொழில் அதிபர்களாகவும் மாற்றும் ஆதாரக் கல்வி தொழில் கல்வி அவர்களுக்கு கற்பிக்கப்படுகிறது.
21 ஆம் நூற்றாண்டு இளைஞர்கள் பலர் "ஒரு வேலையைப் பெறுவதை" விருப்பத் தேர்வாக இல்லாமல் வாழ்வின் அடிப்படைத் தேவையாகப் பார்க்கிறார்கள்.

ugan
ஆனால் உலகம் முழுவதும் செய்யும் வேலை பறிக்கப்பட்டோர் எண்ணிக்கை அதிகரித்து வரும் அதேவேளை புதியவர்களுக்கு வேலை கிடைப்பதும் அரிதாகி வருகிறது. உகாண்டாவில் இந்த நிலை மிக மோசம்! வேலை வாய்ப்பில்லா இளைஞர்கள் 66 சதவீதம் பேரைக் கொண்டுள்ளது உகாண்டா. இது ஆஃப்ரிகா கண்டத்தின் மிகப் பெரும் சதவீதமாகும். மோசமான பொருளாதார சூழலில் சமூகவாழ்வில் அவர்களின் அடிப்படைத் தேவைகளை பெற்றுக்கொள்ள கல்வியும் அதை கற்பிக்கும் நிறுவனங்களும் அவர்களுக்கு அவசியமாகிறது. உகாண்டா இளைஞர்களுக்கு பல்வேறு அம்சங்களில் கல்வியும், தொழில் கல்வியும் கற்பிக்கப்படுகிறது. அது பற்றி அல்ஜஸீரா நடத்திய “ரெபெல் எஜூகேஷன்” டாக்குமெண்டரிக்காக நடத்திய கள ஆய்வே இந்த தொகுப்பு.

உகாண்டா இளைஞர்களுக்கு கற்பிக்கப்படும் முதல் அம்சம்!
நாற்பது அறிஞர்கள் தலைமையில் பல வழிகாட்டிகளைக் கொண்டு தொழில் கல்வி உகாண்டா இளைஞர்களுக்கு கற்பிக்கப்படுகிறது. அந்த வழிகாட்டிகள் அறிஞர்களோடு கூடி அமர்ந்து நேரத்தை செலவிட்டு புதிய தொழில் முனைவோர்களை உருவாக்குவது, தலைமைத்துவம், விமர்சன சிந்தனை, சிக்கல்களைத் தீர்க்கும் வழிமுறைகள் குறித்து கலந்தாலோசனை செய்கிறார்கள்.
அதன்பின் வழிக்காட்டிகள் அதை மாணவர்களுக்கு பயிற்றுவிக்கிறார்கள். அவர்களுக்கு பயிற்றுவிக்கும் வழிமுறைகளில் விளையாட்டும் பயன்படுத்தப்படுகிறது. அதன்வழி குழுவாக இயங்க பயிற்றுவிக்கப்படுகிறது. பொதுவெளிகளில் பேசவும் அவர்களுக்கு ஊக்குவிக்கப்படுகிறது.
அறிஞர்கள் உகாண்டா இளைஞர்களை வணிகத்தில் ஈடுபடவும் மேலும் அவர்கள் வாழும் சொந்த சமூகத்தின் தேவைகளை புரிந்துகொண்டு அதற்காக உழைக்கவும், திறந்த மனதோடு இருக்கவும் உற்சாகப்படுத்துகிறார்கள்.
உகாண்டா பெருந்தொகையான இளைஞர்களைக் கொண்ட நாடு. 70 சதவீதம் இளைஞர்கள் 30 வயதுக்குட்பட்டவர்கள். (குறிப்பாக நமது நாட்டில் நிலவும் ஒரு சிக்கல் அங்கும் இருப்பதை) உகாண்டாவின் கல்வித் திட்ட ஒருங்கிணைப்பாளர் இம்மானுவேல் கல்யாபி கூறுகிறார் : படித்து வரும் மாணவர்களுக்கும் சந்தைக்குத் தேவையான வேலைக்காரர்களுக்கும் இடையே பெருத்த வேறுபாடு நிலவுகிறது. இது படித்து வரும் பட்டதாரிகளுக்கு பெரும் சவாலாக இருக்கிறது.

கற்பிக்கப்படும் இரண்டாவது அம்சம்!
தொழில் முனைவோரை உருவாக்குவதில் கவனம் செலுத்தப்படுகிறது. வெறும் பாடமாக இல்லாமல் வாய்ப்புள்ள துறைகளுக்கு அங்கிருக்கும் சாத்தியமான நடைமுறைகளைக் கொண்டு பாடங்கள் பயிற்றுவிக்கப்படுகிறது.
உகாண்டாவின் கல்வி முறையில் முக்கியமாக சொல்ல வேண்டிய விஷயங்களில் ஒன்று (இந்தியாவிலும் கூட) அவர்கள் நிறைய கோட்பாட்டு அறிவை தருகிறார்கள். ஆனால் நடைமுறையில் என்ன நடக்கிறது. படித்து முடித்த பிறகு வேலை கிடைப்பதில்லை. படித்தவர்களிடம் பணியாற்றும் திறனும், திறமையும் இருப்பதில்லை. இதில் ஒரு பெரும் சவால் ஏற்படுகிறது.
புதிதாக வேலையில் சேரும் படித்தவர்களுக்கு வேலை செய்வதற்கான திறனையும் அதோடு சிறந்த கல்வியையும் வேலை தருபவரோ, அல்லது நிறுவனமோ மீண்டும் பயிற்றுவிக்க வேண்டிய சிக்கல் இருக்கிறது என்கிறார் இம்மானுவேல் கல்யாபி.
லிலியன் ஏரோ ஒலோக் (கல்வி ஆலோசகர்! உகாண்டா மகளிர் தொழில் முனைவோர் சங்கம், உகாண்டா உற்பத்தியாளர்கள் சங்க உறுப்பினர்,) 2009 இல் ஒரு தொழில் கல்வித் திட்டத்தை கொண்டு வந்தார். விதவைகள் மற்றும் HIV நோயால் பாதிக்கப்பட்ட 100 க்கு மேற்பட்ட பெண்களுக்கு ஆலோசனை வழங்கி சமூக ஆதரவோடு நிதி திரட்டி அந்த பெண்களுக்கு மறு சுழற்சி செய்யப்பட்ட பேப்பரிலிருந்து மணிகள் செய்ய பயிற்சியளித்து, செய்ய வைத்து அந்த மணிகளை இவரே பணம் கொடுத்து வாங்கிக் கொண்டார். லிலியனிடம் இப்போது 230 பெண்கள் வேலை செய்கிறார்கள். அவருடைய மணிகள் உலகம் முழுவது ஏற்றுமதி செய்யப்படுகிறது.
“நான் மாற்றத்தை காண விரும்புகிறேன், இந்தப் பகுதியில் இருக்கும் HIV நோய் பாதிக்கப்பட்டவர்கள், விதவைகள், கணவனில்லாத ஒற்றைத் தாய்மார்கள் வறுமையால் பாதிக்கப்பட்டோர்களை மத்திய தர வருவாய் ஈட்டும் சமூகமாக அவர்கள் ஏற்றம் பெற விரும்புகிறேன். இப்படி சொந்த வியாபாரம் செய்வது பல வகைகளில் எனக்கு உதவுகிறது” என்கிறார் லிலியன் ஏரோ ஒலோக்.

UGAAN
கற்பிக்கப்படும் மூன்றாவது அம்சம்!
தற்போது உகாண்டாவில் 350 பள்ளிகள் இயங்கி வருகிறது. தொடர்ச்சியாக இன்னும் 100 பள்ளிகள் ஆரம்பிக்கப்பட இருக்கிறது. 2024 ஆண்டை இலக்காக கொண்டு இத்திட்டம் செயல்படுத்தப்படுகிறது. ஆண்டுக்கு ஒரு மில்லியன் மாணவர்கள் பயனடைகிறார்கள். மேலும் ஆஃப்ரிக்கா முழுவதும் ஆண்டுக்கு நான்கு மில்லியன் மாணவர்கள் பயன் பெறும் வாய்ப்பும் உள்ளது.
வழிகாட்டிகள் மற்றும் அறிஞர்களின் வழிகாட்டுதல் வழியாக உகாண்டா இளைஞர்கள் பள்ளியில் படிக்கும் போதே ஒரு வியாபாரத்தை உருவாக்கிக் கொள்கிறார்கள்.
அந்த வழிகாட்டிகள் கூறுகிறார்கள் : நாங்கள் மாணவர்களை கண்காணித்தோம். அவர்கள் தங்களது படிப்பு, வீட்டு வாழ்க்கை, மன அழுத்தம் ஆகியவற்றை சமாளித்து வியாபாரத்தை வெற்றிகரமாக நடத்துகிறார்கள்.
அவர்களிடம் நிதி மூலதனம் குறைவாகவே இருக்கிறது. இருக்கும் பணத்தை முதலீடு செய்து அதிலிருந்து லாபத்தை எடுத்துக்கொள்கிறார்கள்.
வியாபாரத்திறன் மூலமாக நிதர்சன உலகை கண்டுகொள்கிறார்கள். அதற்கு ஏற்ப தங்களது வருங்காலத்தை திட்டமிடுகிறார்கள். தங்களது குடும்பத்திற்கும் உதவுகிறார்கள். தங்களது சமூகத்திலும் முக்கியப் பங்கு வகிக்கிறார்கள்.

“கல்வி என்றால் என்ன?"

இந்த கேள்வி ”ரெபெல் எஜுகெஷன்” டாக்குமெண்டரி படப்பிடிப்பின் போது என்னை நானே கேட்டுக்கொண்டது.
உகாண்டாவில் கல்வி ஆர்வலர்களை நான் சந்தித்தேன், அவர்கள் குறிப்பிட்ட சமூகத்தின் தேவைகளைப் பூர்த்தி செய்வதற்காக கல்வியை வடிவமைத்துக் கொண்டிருந்தார்கள். (இது போன்ற செயல்பாடுகள் கல்வியின் அடிப்படை தெரியாத கல்வியாளர்களை உருவாக்கி இருக்கிறது.) அதன்பின் நான் புரிந்து கொண்டது கல்வித்துறையில் புதிய கல்வியாளர்களை, பயிற்றுவிப்பாளர்களை உருவாக்க வேண்டும் என்பதுதான்.
உலகம் முழுவதும், ஒவ்வொரு தலைமுறையினரும் தங்கள் குழந்தைகள் பெறும் கல்வி பற்றி கவலைப்படுகிறார்கள் என்பதை நான் பார்த்தேன்.
நாம் தினசரி பத்திரிக்கைகளிலும் தலைப்புச் செய்திகளிலும் இன்றைய கல்வி முறை லட்சக்கணக்கான குழந்தைகளின் கல்வித் தரத்தை குறைத்திருக்கிறது என்ற செய்தியைப் பார்க்கிறோம்.
குருட்டு மனப்பாடம் செய்து பழக்கப்பட்டு பள்ளியிலிருந்து வெளியேறும் மாணவர்களுக்காக சிலர் கவலைப்படுகிறார்கள். சிலர் அதற்கு மாறாக, ஏழு வருடங்கள் வரை குழந்தைகளை பள்ளிக்கு அனுப்ப வேண்டாம் என்று அழைப்பு விடுக்கிறார்கள்.
அனைவருக்கும் தேவை என்ன என்பதில் ஒரு மாறுபட்ட பார்வை இருப்பது தெரிகிறது.
ஆனால் உகாண்டா போன்ற மக்கள் தொகைக்கு ஏற்ப வேலை வாய்ப்புகள் இல்லாத ஒரு நாட்டில் எழும் “எதற்காக மக்களுக்கு கல்வி கற்பிக்கப்படுகிறது?” என்ற கேள்விக்கு உண்மையான பதில் என்ன?
படித்தவர்களை வேலைக்கு அமர்த்த காலி இடங்கள் இல்லை. உகாண்டாவில் பிரச்சனைகள் தெளிவாவதைத் தினமும் கண்டேன். வேலை செய்யத் துடிக்கும் இளைஞர்களிடமிருந்து வேலை தேடி நூற்றுக்கணக்கான விளம்பரங்கள் கதவுகளில் ஒட்டப்படிருந்ததைப் பார்த்தேன். மக்கள் அடிப்படை வசதிகள் எதுவும் இல்லாத குடிசைப் பகுதிகளில் வாழ்ந்து வருகின்றனர்.
அங்கே பல்வேறு நிகழ்ச்சிகளைக் கண்டுகொள்வதற்கு வாய்ப்பு கிடைத்தது.

uganda education

உகாண்டாவின் உயர்நிலை பள்ளிகளுடன் என்ஜிஓ க்கள் சேர்ந்து சில திட்டங்களை நடைமுறைபடுத்தியுள்ளன. நேரம் அனுமதித்திருந்தால், அவர்களது வேலைகளை இன்னும் படமாக்கியிருப்பேன்.
உதாரணமாக, ஆடு வளர்ப்புத் திட்டம், மாணவர்களுக்கு ஆடு வளர்க்க பயிற்சி அளிக்கப்படுகிறது. விற்பதற்கு மட்டுமல்ல!

அவர்கள் வளர்க்கும் ஆடுகள் போடும் குட்டிகளை தங்கள் சமூகத்தில் உள்ள மற்றவர்களுக்கு வழங்குகிறார்கள். அதன் வழி பிறருடைய வாழ்வாதாரங்களை மேம்படுத்த உதவி செய்கிறார்கள்.
மாணவர்கள் அவர்களே உருவாக்கிய நவீன சாதனப் பொருட்களை விற்பனை செய்கிறார்கள். மேலும் மறுசுழற்சி செய்யப்பட்ட பிளாஸ்டிக் பைகளில் இருந்து செங்கற்கள் செய்ய பயிற்சி அளிக்கப்படுகிறது.
நாங்கள் நகருக்கு வெளியே புறப்பட்டோம். அந்தப் பகுதிகள் தெளிவாக இருந்தது. குறிப்பாக கிராமப்புற மக்களுக்கு புக்கீலி பள்ளி இருந்தது. அங்கு வாழும் குடும்பங்களுக்கு வாழ்வாதாரமாக விவசாயம் இருந்தது.
இந்த டாக்குமெண்டரி கள ஆய்வில் என்னை கவர்ந்தது இந்த இளம் மாணவர்கள், தொழில் முனைவோர் மற்றும் தலைமைத்துவ வழிகாட்டல் மூலம் அவர்களின் சமூகங்களில் மாற்றம் ஏற்படுத்தும் முகவர்களாக ஆகிவிட்டனர்.
இந்த திறன் சார்ந்த நடைமுறைக் கல்வி (practical skill-based education) நடைமுறையில் உள்ள படிக்கும் திறன் சார்ந்த கல்விக்கு (academic learning) முழுமையான மாற்றாக இல்லை. ஆனால் நடைமுறையில் இருக்கும் கல்வியை விட மேம்பட்டது.

Write on வெள்ளிக்கிழமை, 05 ஜனவரி 2018

இந்திய நாட்டின் அடிமைத்தனம் ஒழிந்து சுதந்திரம் பெறுவதற்குப் போராடிய பல்லாயிரம் தியாகிகளின் பட்டியலில் வெளிவராமல் போன முஸ்லிம்களின், முஸ்லிம் சமூகத்தின் பார்வைக்கே வராமல் இருந்த சுதந்திரப் போராட்ட வீரர் பண்டிட் அப்துல் காதர் ஜமாலி அவர்களின் வரலாறை படிக்கின்ற வாய்ப்பை தந்த சேயன் இப்ராகிம் அவர்களுக்கும் சமூகநீதி முரசு இதழுக்கும் வாழ்த்துக்கள். பாராட்டுக்கள். தொடரட்டும் உங்கள் சேவை.

Write on வெள்ளிக்கிழமை, 05 ஜனவரி 2018

இன்றைய சூழலில் உலகம் முழுவதும் திக்கற்று திசை தேடும் அகதிகளாக துயரங்களுக்கு உள்ளாகி இருப்பவர்கள் முஸ்லிம்கள். ஆப்கன், சிரியா, சூடான், ஈராக், சமீப காலத்தில் ரோஹிங்கியா என தொடர்ந்து சொந்த நாட்டை விட்டு அகதிகளாக வேறு நாடுகளுக்கு இடம் பெயரும் மக்களின் அவல நிலை, எதிர்காலம் பற்றிய செய்திகளைப் படித்த போது வேதனை தருகிறது. துயரங்களை சுமந்து திரியும் நிகழ்காலம், சூன்யமான எதிர்காலம் என வாழ்க்கை முழுவதும் எந்த பிடிமானமும் இல்லாத அகதிகளின் வாழ்க்கையை யோசித்துப் பார்க்கிற அகதிகளுக்கு மட்டுமல்ல. நமக்கும் அச்சம் தருகிறது. அல்லாஹ் பாதுகாப்பானாக.

Write on வெள்ளிக்கிழமை, 05 ஜனவரி 2018

மீனம்பூர் இதுவரை நான் கேள்விப்படாத பெயர், கேள்விப்படாத ஊர். தமிழக வரலாறும் முஸ்லிம்களின் வரலாறும் பின்னிப் பிணைந்த வரலாறாக மீனம்பூரின் வரலாறு இருந்தது. பல நூற்றாண்டுகளுக்கு முன்னால் நடந்த முஸ்லிம்களின் இடப் பெயர்ச்சி, அவர்களின் தொழில், திருமண முறை என அனைத்தையும் அறிய முடிந்தது. அறியாத ஊர்களின் வரலாறுகள், தகவல்கள் என பல செய்திகளைத் தரும் “மண்ணின் வரலாறு” தொடர் அருமை.
ஜமாலுத்தீன், திருநெல்வேலி

Write on வெள்ளிக்கிழமை, 05 ஜனவரி 2018

இளம் ஆலிம்களே உங்களைத்தான் கட்டுரைத் தொடர் பயனுள்ளதாக தொடர்ந்து வருவது மகிழ்ச்சியாக மட்டுமல்ல திருப்தியாகவும் இருக்கிறது. நவம்பர் மாதம் வெளிவந்த நபிமொழிக் கலை பெரும் பயனாக அமைந்தது. கம்யூட்டரில் நபிமொழிகளை தேடும் முறை அதை தாங்கிய சிடி க்கள் பற்றிய தகவல்கள், மேலும் நபிமொழிகளின் தரம், அறிவிப்பாளார் தொடர் பற்றிய என என அறிய இயலாமல் போன விஷயங்களை தெரிந்து அறிந்து கொள்ளும் வாய்ப்பை தந்திருக்கிறது இந்த தொடர். ஆசிரியர் கான் பாகவி அவர்களுக்கு அல்லாஹ் அருள் புரிவானாக. ஆமீன்.

Write on வெள்ளிக்கிழமை, 05 ஜனவரி 2018

நவம்பர் மாத தலையங்கம் அருமையான் செய்தியை தாங்கி வந்தது சிறப்புகுரியது. வணிகப் பாரம்பரியமும், தொழிலில் சிறப்பான செயல்பாடும் கொண்ட முஸ்லிம் சமூகம் தன்னுடைய பாரம்பரியத்தை மறந்து தொழில் செய்யும் திறமையற்று ஐந்துக்கும் பத்துக்கும் அலைபாயும் நிலைக்கு வந்திருப்பது வேதனைக்குரியது. மீண்டும் பாரம்பரியத்தை நோக்கி திரும்புவது தனிப்பட்ட ஒவ்வொரு முஸ்லிமுக்கும், முஸ்லிம் சமூகத்துக்கும் பெரும் பயனாக அமையும். வணிகத்தை நோக்கி முஸ்லிம் சமூகத்தை திருப்புவதற்காக நீங்கள் செய்து வரும் பணி மெச்சத்தக்கது. உங்கள் பணி சிறக்கவும் தொடரவும் அல்லாஹ் உங்களுக்கு உதவி செய்வானாக ஆமீன்.

Write on செவ்வாய்க்கிழமை, 02 ஜனவரி 2018
Write on செவ்வாய்க்கிழமை, 02 ஜனவரி 2018

அரபுலகில் வணிகச் சமூகமாக வாழ்வாங்கு வாழ்ந்தவர்கள் மக்காவின் வணிகப் பிரமுகர்கள். அவர்களுக்கு மத்தியில் உண்மையாளராகவும் வாய்மையாளராகவும் அறியப்பட்ட முஹம்மது நபியவர்கள் ஒரு நேர்மையான வணிகராக அன்றைய சமூகத்தால் ஏற்றுக் கொள்ளப்பட்டார்கள்.

வணிகம் என்பது வருமானத்தைப் பெருக்கும் வழியாக பார்க்கப்பட்ட மனித சமூகத்துக்கு மத்தியில் அல்லாஹ்வின் தூதர் முஹம்மது நபி மூலம் வணிகத்தை இறைவணக்கமாக மனிதகுலத்துக்கு செய்யும் சேவையாக மறுமையில் உயர்ந்த அந்தஸ்த்தை பெறும் காரணியாக வணிகத்துக்கும் வணிகர்களுக்கும் இஸ்லாம் சிறப்பிடத்தை வழங்கியது.
அல்லாஹ்வின் வழிகாட்டுதல் அடிப்படையில் முஹம்மது ஸல் அவர்களின் தோழர்கள், அவர்களுக்குப் பின் வந்த முஸ்லிம்கள் மிகப்பெரும் வணிகர்களாக அரபுலகம் உட்பட உலகம் முழுவதும் பரவிச் சென்றார்கள். தங்களது வணிகத்தில் கிடைத்த மேலதிக பொருளாதாரத்தை தங்களைச் சுற்றி வாழ்ந்த மனிதர்களுக்கு பகிர்ந்தளித்து தாங்கள் வாழ்ந்த நிலத்தை வளப்படுத்தினார்கள்.
தாம் குடியேறிய எல்லா பிரதேசங்களிலும் போலவே தமிழகத்திலும் வணிகத்தின் வழியாகவே இஸ்லாம் அறிமுகமானது. தொடக்கத்திலிருந்து தமிழக முஸ்லிம்களின் வரலாற்றை பார்க்கும் போது இதை அறிந்துகொள்ள முடியும். தங்களது வணிகத்தின் மூலம் தங்களது வரலாற்றை தமிழக மண்ணில் ஆரம்பித்த மண்ணின் மைந்தர்களோடு இரண்டறக் கலந்து தமிழகத்தில் தங்களது கலாச்சார பண்பாட்டுத் தனித்துவத்தைப் பாதுகாத்துக் கொள்ளும் நோக்கில் மஸ்ஜிதுகளை அமைத்தார்கள். அந்த மஸ்ஜிதுகளை மையமாக வைத்து குர்ஆன் மத்ரஸாக்களை, பாடசாலைகளை அமைத்துக் கொண்டார்கள்.
தமிழகத்தைப் பொருத்தவரையில் வாழ்வாலும் வணிகத்தாலும் முஸ்லிம் சமூகம் 1350 ஆண்டுகால மிக நீண்ட வரலாற்றைக் கொண்டது. தென் தமிழகத்தில் முஸ்லிம்கள் வணிகச் சமூகமாக அறிமுகமாகிப் பரவலாகக் குடியேறி, மண்ணின் மக்களாக தங்களை உறுதிப்படுத்திக்கொண்டு வரலாற்றிலே இடம்பிடித்தனர்.
காலம் காலமாக ஒரு வணிக சமூகமாக இனம் காணப்பட்டு வந்த தமிழக முஸ்லிம் சமூகம் தமது
வர்த்தகத்தின் மூலம் தாங்கள் வாழும் நிலத்தின் பொருளாதார வளர்ச்சிக்கு மிக உயர்ந்த பங்களிப்பை செய்துள்ளது.
கி.பி. 9 ஆம் நூற்றாண்டிலும் அதற்குப் பிந்திய நூற்றாண்டுகளிலும் தென்னிந்தியக் கடற்கரையோரங்களில் முஸ்லிம் வணிகர்களே கோலோச்சி வந்தனர். ஆசிய ஐரோப்பிய நாடுகளுக்கு ஏற்றுமதி இறக்குமதி செய்யும் வர்த்தகத்துக்கு முக்கியத்துவம் வழங்கி வணிகம் செய்த மிக நெடிய வரலாறு முஸ்லிம் சமூகத்துக்கு தமிழகத்தில் உண்டு.
கால மாற்றத்தில் போர்த்துக்கீசிய ஃப்ரெஞ்ச், பிரித்தானியர்களின் வருகை, அவர்களின் மேலாதிக்கம், கூட்டு வணிகம் ஆகியவை காரணமாக தென்னிந்தியக் கடற்கரையோரங்களில் முஸ்லிம்களின் வணிகம் கொஞ்சம் கொஞ்சமாக முடங்கியது.
தங்களின் கட்டுப்பாட்டினை இழந்த நெருக்கடியான காலக்கட்டத்தில், தமிழகத்தின் உட்பகுதிகளில் இருந்து புதிதாக முஸ்லிம் வியாபார சமூகம் ஒன்று அன்றைய மதராஸ் இன்றைய சென்னையில் வந்து குடியேறியது. அதற்கு முன்பே மதராஸில் பல்வேறு இந்தியப் பகுதிகளைச் சேர்ந்த முஸ்லிம்களும் வணிகம் நடத்தி வந்தார்கள்.
20 ஆம் நூற்றாண்டின் பிற்பகுதியில் மதராஸ் மகாணத்தில் முஸ்லிம்களே வர்த்தக உலகில் பெருமளவில் வியாபித்து இருந்தனர்.
வரலாறு முழுவதும் வணிகத்தில் முதன்மைச் சமூகம் என்ற சிறப்பான அடையாளத்தை பெற்றிருந்த தமிழக முஸ்லிம் சமூகம் இன்று மூன்றாம் நிலைக்குத் தள்ளப்பட்டுள்ளது. தன் பாரம்பரியம் அறியாமல் மாத ஊதியப் பணியாளர்களாக மாறிவரும் இன்றைய படித்த இளைய தலைமுறையிடம் வணிகத்தின் மேன்மையை விதைக்க வேண்டிய அவசியமும், தேவையும் உள்ளது.
இஸ்லாமியப் பரவலுக்கும், உலக வரலாறு கண்ட இஸ்லாமிய பொற்காலத்திற்கும், மேம்பட்ட முஸ்லிம்களின் சமூக வாழ்க்கைக்கும் முஸ்லிம் வணிகர்களின் பொருளாதாரமே அடித்தளமாய் அமைந்தது குறிப்பிடத்தக்கது.
வணிகம் குறித்த விரிவான வழிகாட்டுதல்களை இஸ்லாம் மனித சமூகத்துக்கு வழங்கியுள்ளது. ஆயுள் முழுவதும் கூலித் தொழிலில் கிடைக்காத அபிவிருத்தி நேர்மையான வகையில் செய்யப்படும் வணிகத்தில் கிடைக்கும்.
வணிகத்தில் கிடைத்த அளவிடமுடியாத அருள்வளத்தின் மூலம்தான் இறைஇல்லங்களும், அறிவாலயங்களான கல்வி நிறுவனங்களும் உருவாக்கப்பட்டு சமூகத்தின் பயன்பாட்டிற்கு வழங்கப்பட்டது என்பதற்கு நம் கண் முன் ஆயிரம் சாட்சிகள் இருக்கிறது.
வரலாற்றை மீட்டெடுக்கும் முகமாக வளரும் முஸ்லிம் இளம் தலைமுறையினரை வணிகத்தின் பக்கம் திருப்பவும் மாறிவரும் காலச் சூழ்நிலைக்கேற்ப தொழில் துறைகள் சம்பந்தமான அறிவைப் பெற உற்சாகப்படுத்துவதற்காகவும் தமிழ்நாடு முஸ்லிம் கல்வி இயக்கத்தின் சார்பில் “நாம் ஒரு வணிகச் சமூகம்” என்ற தலைப்பில் தொடர்ந்து வகுப்புகள் நடத்தப்பட்டு வருகின்றன.
பன்னாட்டு, உள்நாட்டு கூட்டு நிறுவனங்கள் தங்களது கூட்டு முயற்சியில் பெரும் பெரும் வணிக நிறுவனங்களை உருவாக்கி வணிக உலகை ஆகரமித்திருக்கும் இன்றை சூழலில் இது ஒரு தற்காலிகமான முயற்சியே!
அருள் வளம் நிறைந்த வணிகத்தை ஒரு அறிவாக, வாழும் காலத்தை உள்வாங்கி மாற்று வணிகச் சிந்தனைகளை அடுத்து வரும் இளம் தலைமுறையின் உள்ளத்தில் ஆழப்பதிக்க வேண்டும். இஸ்லாம் வழங்கும் வணிக வழிகாட்டுதல்களை இன்றைய சூழலோடு பொருத்தி ஒரு வணிகப் பள்ளியை உருவாக்குவதே நிரந்தரத் தீர்வாக அமையும்.
எனவே இன்ஷா அல்லாஹ் அதன் ஒரு முயற்சியாக பாண்டிச்சேரியில் உருவாக இருக்கும் பைத்துல் ஹிக்மா கல்வி நிறுவனத்தின் ஒரு பிரிவாக “இந்தோ - அரப் ஸ்கூல் ஆப் பிஸ்னஸ்” ஒன்று உருவாக்கப்பட இருக்கிறது.
அதில் சமூகத்தின் பங்களிப்பு அவசியம். சமூகப் பங்களிப்பு இல்லாமல் கல்வி நிறுவனங்கள் உருவாகுவது சாத்தியமற்றது.
முஸ்லிம் சமூகத்தின் வளர்ச்சிக்கு உதவும் ஒரு முன்மாதிரி வணிகப் பள்ளியை உருவாக்கும் இந்தப் பணியில் உங்களை இணைத்துக் கொள்ளுங்கள்.