பராக் ஒபாமா-நரேந்திர மோடி: யார் சிறந்த ஜனநாயகவாதி?

- ப.ரகுமான்
modi"மக்களால், மக்களின், மக்களுக்காக" (of the people, for the people, by the people) என்பதே ஜனநாயகம். இப்படிப்பட்டதொரு வரலாற்றுச் சிறப்புமிக்க வரையறுப்பை நமக்கு வழங்கியவர், அமெரிக்க அதிபராக இருந்த ஆபிரஹாம் லிங்கன். 1863 ஆம் ஆண்டு நவம்பர் 19ஆம் தேதி நிகழ்த்திய புகழ்பெற்ற கெட்டிஸ்பர்க் உரையில் அவர் இப்படிக் குறிப்பிட்டார். அடிமை முறையை ஒழித்துக்கட்டுவதற்காக தன்னுயிரை ஈந்த அந்த பெருமகன் ஜனநாயகத்திற்கான வரையறையை வழங்கி 150 ஆண்டுகள் உருண்டோடிவிட்டன. யுஎஸ் என்றும், (வட)அமெரிக்கா என்றும் குறிப்பிடப்படும் அமெரிக்க ஐக்கிய நாடுகளோ 1776 ஆம் ஆண்டிலேயே சுதந்திரம் பெற்றுவிட்டன. ஆனால் அனைவருக்குமான பாரபட்சமற்ற வாக்குரிமை என்பது 1965 இல் தான் அமெரிக்காவில் சாத்தியமாயிற்று. அந்த வகையில் அமெரிக்காவை மிகப்பழமையான ஜனநாயக நாடு என்று கூறுவது பொருளற்றது. இந்தியாவில் அதற்கு முன்னரே, அனைவருக்குமான வாக்குரிமை முறை நடைமுறைக்கு வந்துவிட்டது. மேலும் இந்தியா உலகின் மிகப்பெரிய ஜனநாயக நாடு என்று கூடச் சொல்லப்படுகிறது. இப்படிப்பட்ட ஜனநாயக நாட்டிற்கு, அப்படிப்பட்ட ஜனநாயக நாட்டிலிருந்து வந்த ஒபாமா, அடிமை வம்சத்தை நிறுவிய அலாவுதீன் கில்ஜியின் (சிரிக்) கோட்டை அரங்கத்தில் பேசியபோது குறிப்பிட்டார்:
"உங்களது அரசமைப்புச் சட்டம் ஒவ்வொரு குடிமகனின் கண்ணியத்தையும் கட்டிக்காக்கும் உறுதியுடன் தொடங்குகிறது. 'மனிதர்கள் அனைவரும் சமம்' என எங்களது சுதந்திரப் பிரகடனம் முழங்குகிறது. இந்த லட்சியங்களின்படி வாழ நம்முடைய இரு நாடுகளிலும் பல தலைமுறைகள் பாடுபட்டிருக்கின்றன. கறுப்பின விடுதலைக்காக போராடிய மார்ட்டின் லூதர் கிங் இந்தியா வந்தபோது, சில பள்ளிக்குழந்தைகளுக்கு, இவரும் நம்மைப்போல தீண்டத்தகாதவர் என அறிமுகப்படுத்தி வைக்கப்பட்டார். என்னுடைய பாட்டன், கென்யாவில் பிரிட்டிஷ் ராணுவத்தில் சமையல்காரர். (என்னுடைய மனைவி) மிஷேலின் குடும்பத்தில் அடிமைகளும், அடிமை உடைமையாளர்களும் இருந்தனர். நாங்கள் பிறந்தபோது, எங்களைப் போன்றவர்களுக்கு அமெரிக்காவின் சில பகுதிகளில் வாக்குரிமை இல்லை. அசாதாரணமான வாய்ப்புகளால் அமெரிக்கா ஆசிர்வதிக்கப்பட்டிருந்தபோதும் என்னுடைய தோலின் நிறம் காரணமாக நான் வேறுபாடாக நடத்தப்பட்ட தருணங்களும் உண்டு. படுபயங்கரமான சமத்துவமற்ற உலகில் நாம் வாழ்ந்தபோதிலும் சமையல்காரரின் பேரன் அதிபராக முடியும், அரசமைப்புச் சட்டத்தை எழுத தலித் உறுதுணைபுரிய முடியும், தேநீர் விற்பவர் பிரதமராக முடியும் எனும் வாய்ப்புள்ள நாடுகளில் வாழ்கிறோம் என்பதை நினைத்து பெருமிதம் அடைகிறோம்."
சுருக்கமாகச் சொன்னால், தேநீர் விற்ற ஒருவர் இந்தியாவின் பிரதமராக வரவும், சமையல்காரரின் பேரன் அமெரிக்க அதிபராக வரவும் முடியும் என்பதை ஜனநாயகம்தான் சாத்தியப்படுத்தியிருக்கிறது என்கிறார் ஒபாமா.
இந்த பேச்சினூடாக, தாம் கறுப்பினத்தவர் என்பதால் அமெரிக்காவில் பாரபட்சமாக நடத்தப்பட்டதையும், அனைவருக்குமான வாக்குரிமை என்பது தாம் பிறந்த பிறகே எட்டப்பட்டது என்பதையும் குறிப்பிடுகிறார். இதேபோல தேநீர் விற்ற மோடி பிரதமராக வரமுடிந்திருக்கிறது என்பதன் மூலம், சமத்துவமற்ற உலகில் சமத்துவத்தை எட்ட ஜனநாயகம் பயன்பட்டிருக்கிறது என்பதும் அவரது கருத்து. சமத்துவமற்ற இந்தியாவில், ஜனநாயகத்தின் மூலம் பிரதமர் பதவியை எட்டிப் பிடித்த மோடி இந்த ஜனநாயகத்தை வளப்படுத்த என்ன செய்து கொண்டிருக்கிறார்? அதை விளங்கிக் கொள்ள முதலில் ஜனநாயகம் என்ற அடிப்படையில் இந்தியாவை விளங்கிக் கொள்ள வேண்டும். இரண்டே வரிகளில் அம்பேத்கர் அழகாகச் சொன்னார்: “நாம் அரசியலில் ஜனநாயகமும், சமூகத்தில் ஜனநாயக மறுப்பும் பெற்றுக் கொண்டிருக்கிறோம்” .
ஆக இந்தியச் சமூகம் என்பது ஜனநாயகமறுப்புத்தன்மை கொண்டது; இங்கே எல்லோரும் ஆட்சியாளர்களாக வந்துவிட முடியாது. அதற்குக் காரணம் சாதியும், சாதி முறையும்தான்.
ஆனால் மோடி தலைமையிலான பாஜக அரசு ஆட்சிக்கு வந்தவுடன், இந்திய வரலாற்று ஆய்வு கவுன்சிலின் (Indian Council of Historical Research -ICHR) தலைவராக எல்லப்பிரகத சுதர்சனராவ் (Yellapragada Sudershan Rao) என்பவரை நியமித்தபோது வரலாற்று ஆய்வு வட்டாரங்களில் அவரைப் பற்றி யாருக்கும் தெரிந்திருக்கவில்லை. அவரைப் பற்றி புகழ்பெற்ற வரலாற்றாய்வாளரான டி.என்.ஜா பின்வருமாறு குறிப்பிட்டார்: "சாதி முறையை (அதன் அசல் வடிவில்) கொண்டுவர வேண்டும் என்று எல்லப்பிரகத சுதர்சனராவ் விரும்புகிறார். அப்படிக் கொண்டுவரப்பட்டால், அந்த முறையின் கீழ் மோடி பிரதமராக வர முடியாது". இதைத்தான் சமூகத்தில் ஜனநாயக மறுப்பு என்கிறார் அம்பேத்கர். அந்த ஜனநாயக மறுப்புக்கான அத்தனை வேலைகளும் மோடி ஆட்சிக்கு வந்த நாளிலிருந்து அரங்கேற்றப்படுகின்றன.
மோடி நியமித்த சுதர்சனராவ் சாதிமுறை பற்றி என்ன சொன்னார் என்பது ஒருபுறம் இருக்கட்டும்; குஜராத் முதலமைச்சராக இருந்தபோது 2007 இல் கர்மயோகம் என்ற நூலில் மோடி எழுதினர்: "மலம் அள்ளுபவர்கள் பிழைப்புக்காக அதைச் செய்கிறார்கள் என நாம் நம்பவில்லை. அது உண்மையானால் தலைமுறை தலைமுறையாக அவர்கள் அதைச் செய்து வந்திருக்க மாட்டார்கள். இது, ஒட்டுமொத்த சமூகம் மற்றும் கடவுள்களின் மகிழ்ச்சிக்காக தலித்துகள் செய்ய வேண்டிய வேலை என்ற அறிவொளியை பெற்றதால்தான், கடவுள் அவர்கள் மீது சுமத்திய கடமையை செய்ய வேண்டும் என்பதால்தான், உள்ளார்ந்த ஆன்மீக செயல்பாடாக, இந்த துப்புரவு பணி நூற்றாண்டுகளாகத் தொடர்ந்திருக்க வேண்டும். தலைமுறை தலைமுறையாகத் தொடர்ந்து வந்திருக்க வேண்டும். வேறு பணியையோ தொழிலையோ தேர்ந்துகொள்ள தலித்துகளின் முன்னோர்களுக்கு வாய்ப்பளிக்கப்படவில்லை என்பதை ஏற்க முடியாது".
தலித்துகள் மலம் அள்ளும் வேலையை கர்மயோகம் எனக் கருதி, விருப்பத்துடன் மேற்கொண்டு வருகிறார்கள், அவர்களை யாரும் கட்டாயப்படுத்தவில்லை என்பதே இதன் நேரடிப் பொருள். இப்படிப் பேசியவர், 21 ஆம் நூற்றாண்டில் நமது இந்தியப் பிரதமராக இருப்பவர்தான். சாதிமுறையை மீறி அவரால் எப்படி பிரதமர் பதவிக்கு வர முடிந்தது என்பதையும் இதன் மூலமே நாம் விளங்கிக் கொள்கிறோம்.
பார்ப்பனீய, சனாதன, வர்ணாசிரம கொள்கைகளை, அம்பேத்கரின் சொற்களில் சொல்வதென்றால், சமூகத்தில் ஜனநாயகத்தை மறுக்கும் கோட்பாடுகளை கட்டிக்காப்பவர் என்பதால்தான் அந்தப் பொறுப்புக்கு அவரால் வரமுடிந்திருக்கிறது. ஒபாமாவிற்கு யார் இதை விளங்க வைப்பது?
"சதுர் வர்ணம் மயா சிருஷ்டம்" (நால் வர்ணங்களும் கடவுளின் படைப்பு) என்று கூறும் பகவத் கீதை தேசிய புனித நூலாக அறிவிக்கப்படும் என்கிறார் வெளியுறவு அமைச்சர் சுஷ்மா சுவராஜ். பாஜகவிற்கு வாக்களிக்காதவர்கள் முறைகேடாகப் பிறந்தவர்கள் என்கிறார் மத்திய அமைச்சர் சாத்வி நிரஞ்சன் ஜோதி. இந்து-முஸ்லிம் ஒற்றுமையை பேசினார் என்பதற்காக காந்தியை சுட்டுக்கொன்ற கோட்சேவை தேசபக்தன் என்கிறார் பாஜக எம்.பி. சாக்சி மகராஜ். "சமஸ்கிருதத்தின் வழியாக புராதன அறிவியல்" என்ற பெயரில் 9 ஆயிரம் ஆண்டுகளுக்கு முன்னரே, கோள்களுக்கு இடையே பயணம் செய்யும் விண்கலம் இந்தியாவில் சாமியார்களால் கண்டுபிடிக்கப்பட்டது என இந்திய அறிவியல் பேராயத்தில் ஆய்வுக்கட்டுரை படிக்கப்படுகிறது. பல ஆயிரம் ஆண்டுகளுக்கு முன்னரே இந்தியாவில் பிளாஸ்டிக் சர்ஜரியும், ஸ்டெம் செல் சிகிச்சையும் இருந்தன என்று பேசுகிறார் மோடி. இந்தியாவில் இருப்பவர்கள் அனைவரும் இந்துக்கள் என்று கூறிக்கொண்டு, 'கர்வாப்சி' என்ற பெயரில் கட்டாய மதமாற்றம் செய்வதில் தொடங்கி, கோட்சேவுக்கு கோவில் கட்டும் அறிவிப்புகள் வரை மோடி ஆட்சியில் நச்சரவங்கள் தலைதூக்கி ஆடுவதும் இன்று சாத்தியமாகிறது. சிறுபான்மையினரின் வழிபாட்டுத் தலங்கள் தாக்கப்படுகின்றன, பல பகுதிகளில் கலவரச்சூழல்களின் கீழ் அவர்கள் அச்சுறுத்தப்படுகின்றனர். இதை மத சுதந்திரத்திற்கு பாதிப்பு என்ற குறுகிய அர்த்தத்தில் ஒபாமா விளங்கிக் கொண்டதால்தான், "இந்திய அரசைமப்புச் சட்டத்தின் 25 ஆவது பிரிவு உறுதி செய்யும் அனைவருக்குமான மத சுதந்திரத்தைக் கட்டிக்காக்க வேண்டியது இந்திய அரசின் பொறுப்பு" என்று குட்டிச் சொல்கிறார் ஒபாமா.
கட்டாய மதமாற்றம், கட்டாய மதமாற்ற தடைச் சட்டம் போன்ற விவகாரங்களால், சிறுபான்மையினர் அதிலும் குறிப்பாக கிறிஸ்தவர்களே கடுமையாகப் பாதிக்கப்படக் கூடியவர்களாக இருக்கிறார்கள் என்பதால், மத சுதந்திரத்திற்கு பாதிப்பு என்ற வரம்புக்குள் வைத்து இதைப் புரிந்துகொள்வது தவறானது. அந்த தவறை ஒபாமா ஏன் செய்கிறார் என்பதை, இந்தப் பேச்சுக்கு 2 நாட்களுக்கு முன்னர் காந்தி நினைவிடத்திற்கு சென்றபோது ஒபாமா என்ன கருத்தை பதிவு செய்தார் என்பதைப் பார்த்தால் புரிந்துகொள்ள முடியும். காந்தியின் வழிமுறை இந்தியாவில் இன்னும் உயிர்த்துடிப்போடு இருக்கிறது என்று அங்கு எழுதினார் ஒபாமா. அமெரிக்க விசா மறுக்கப்பட்ட மோடி, இந்தியாவில் தம்மை ஆரத் தழுவி வரவேற்றதை, "ஒரு கன்னத்தில் அறைந்தால் மறுகன்னத்தைக் காட்டும் கொள்கை" என்று ஒபாமா புரிந்து கொண்டாரா? அல்லது காந்தியைக் கொலை செய்த கோட்சேவை பாஜக எம்.பி. தேசபக்தன் என்று சொல்வதும், கோட்சேவைப் போற்றித் திரைப்படம் எடுப்பதும், கோட்சேவுக்கு சிலைகள் வைத்து, கோவில் கட்டப்போவதாகச் சொல்லும் அமைப்பின் நிறுவனருக்கு மத்திய அரசு பாரத ரத்னா விருது வழங்குதும் என, காந்தியைக் கொன்ற கோட்சேவின் வழிமுறை அதிகாரவர்க்கத்தின் ஆசியுடன் உயிர்பெறத் துடிப்பது ஒபாமாவுக்கு தெரியாமலா போயிருக்கும்? என்ற கேள்விகளை ஒருபுறம் ஒதுக்கி வைத்து விடுவோம்.
மேலைக் கல்வி பெற்று, தென்னாப்பிரிக்காவில் வழக்கறிஞராகப் பணியாற்றி கோட்-சூட் அணிந்த நவநாகரிக கோமானாக இந்தியா திரும்பிய காந்தி, இங்கிருந்த ஏழ்மையைப் பார்த்து, பிரிட்டிஷார் வர்ணித்தது போல "அரை நிர்வாணப் பக்கிரியாக" மாறினார் என்று கூறப்படுகிறது. அவரது லட்சியங்கள் இப்போதும் உயிர்த்துடிப்புடன் இருப்பதாக ஒபாமா கூறுகிறார். அந்தோ பரிதாபம்! தேநீர் விற்றவராக வாழ்க்கையைத் தொடங்கிய, எளிய பின்னணியைக் கொண்ட மோடி, இந்தியாவின் ஏழைகளது உழைப்பில் வந்த வரிப் பணத்தில், 10 லட்ச ரூபாய் செலவில் கோட்-சூட் அணிந்து நவநாகரிக கோமானாக காட்சி தருகிறார்.
இன்று இந்தியாவில் 3 சதவீத ஆளும் வர்க்கத்தினருக்காக, ஆளும் வர்ணத்தினர் நலனுக்காக, 97 சதவீதம் பேரை ஒடுக்குவதற்காக, மயக்குவதற்காக, திசை திருப்புவதற்காக மோடி இந்த வேடம் தரித்து நிற்கிறார் என்பது ஒபாமாவுக்குத் தெரியாதா என்ன? ஆக இது மத சுதந்திரம் தொடர்பான பிரச்சினை அல்ல; சிறுபான்மையினர் பிரச்சினையும் அல்ல. மாறாக, தொழிலாளர்கள், விவசாயிகள், பழங்குடிகள், ஒடுக்கப்பட்டோர் என இந்த நாட்டின் பெரும்பான்மை மக்கள் பிரச்சினை. அமெரிக்காவில் 2008 பொருளாதார நெருக்கடியைத் தொடர்ந்து, வால் ஸ்ட்ரீட் முற்றுகைப் போராட்டத்தின்போது திரண்டெழுந்த மக்கள், "நாங்கள் 99 சதவீதம், நீங்கள் ஒரு சதவீதம்" என ஆளும் வர்க்கங்களைப் பார்த்து முழங்கினார்களே, அப்போது ஒரு சதவீதம் பேர் பக்கம் நின்ற ஒபாமா இதைச் சொல்வார் என எதிர்பார்ப்பதில் நியாயமில்லைதான்.
சரி போகட்டும், சுதந்திரம், ஜனநாயகம் பற்றி பேசும் ஒபாமா அதிபராக இருக்கும் அமெரிக்காவில் கறுப்பினத்தவரின் இன்றைய நிலை என்ன? அமெரிக்க மக்கள் தொகையில், ஆஃப்ரிக்கன்-அமெரிக்கன் என்று சொல்லப்படும் கறுப்பினத்தவர் எண்ணிக்கை 12 முதல் 13 சதவீதம். ஆனால் சிறைச்சாலைகளில் அவர்களின் எண்ணிக்கை 40 சதவீதம். கல்லூரிகளில் சேரும் கறுப்பினத்தவர் எண்ணிக்கை இதைவிட குறைவு. காவல்துறையால் கொடூரமாக வதைக்கப்படுவதும், சுட்டுக்கொல்லப்படுவதும் கறுப்பினத்தவர்களுக்கு சர்வசாதாரணமாக நடைபெறுகிறது. அண்மையில் மிசௌரி மாநிலத்தின் பெர்குசன் நகரில் கறுப்பின இளைஞர் காவல்துறையால் சுட்டுக்கொல்லப்பட்டதும், அதற்கு எதிராக மக்கள் கிளர்ந்தெழுந்து கலகத்தில் இறங்கியதும் ஒரு சோற்றுப் பதம்.
இப்போது சொல்லுங்கள், உலகின் மிகப் பழமையான ஜனநாயக நாட்டின் புகழும், மிகப்பெரிய ஜனநாயக நாட்டின் புகழும் கூட்டாக பட்டொளி வீசிப் பறப்பதுதானே முறை!
- ப.ரகுமான்